Go Tswalwa Lefsa​—Go Direga Bjang?

JESU ga se a bolela le Nikodemo feela ka bohlokwa, sebaki le morero wa go tswalwa lefsa eupša gape o boletše mabapi le kamoo batho ba tswalwago lefsa ka gona. Jesu o itše: “Ka ntle le gore motho a tswalwe ka meetse le ka moya, a ka se ke a tsena mmušong wa Modimo.” (Johane 3:5) Ka go rialo, motho o tswalwa gape ka meetse le ka moya. Eupša polelwana e rego “ka meetse le ka moya” e bolela ka’ng?

“Ka Meetse le ka Moya”—Ke Eng?

Ka ge e be e le seithuti sa bodumedi sa Mojuda, Nikodemo ka ntle le pelaelo o be a tlwaelane le tirišo ya Mangwalo a Seheberu ya polelwana e rego “moya wa Modimo”—matla a Modimo a šomago ao a ka tutuetšago batho gore ba dire ditiro tše di kgethegilego. (Genesi 41:38; Ekisodo 31:3; 1 Samuele 10:6) Ka gona, ge Jesu a be a diriša lentšu “moya,” Nikodemo a ka ba a ile a o kwešiša e le moya o mokgethwa, matla a Modimo a šomago.

Go thwe’ng ka meetse ao Jesu a boletšego ka wona? Ela hloko ditiragalo tšeo di begilwego gatee-tee pele le ka morago ga poledišano ya Jesu le Nikodemo. Ditiragalo tše di bontšha gore Johane Mokolobetši le barutiwa ba Jesu ba be ba kolobetša batho meetseng. (Johane 1:19, 31; 3:22; 4:1-3) Mokgwa wo o ile wa tlwaelwa kudu kua Jerusalema. Ka baka leo, ge Jesu a be a bolela ka meetse, Nikodemo a ka ba a ile a lemoga gore Jesu o be a bolela ka meetse a kolobetšo, e sego meetse ka kakaretšo. *

Go Kolobetšwa “ka Moya o Mokgethwa”

Ge e ba go ‘tswalwa ka meetse’ go šupa go go kolobetšwa ka meetse, ke’ng seo se bolelwago ke go ‘tswalwa ka moya’? Pele ga poledišano ya Nikodemo le Jesu, Johane Mokolobetši o be a tsebišitše gore kolobetšo e ka se dirwe ka meetse feela eupša e be e tla dirwa le ka moya. O itše: “Nna ke le kolobeditše ka meetse, eupša yena o tla le kolobetša ka moya o mokgethwa.” (Mareka 1:7, 8) Mongwadi wa Ebangedi e lego Mareka o hlalosa ge kolobetšo e bjalo ya mathomo e direga. O ngwala gore: “Bogareng bja matšatši ao, Jesu a tla a e-tšwa Natsaretha ya Galilea gomme a kolobetšwa Jorodane ke Johane. Gatee-tee ge a e-tšwa meetseng a bona magodimo a bulega, gomme a bona moya o theogela go yena, o le bjalo ka leeba.” (Mareka 1:9, 10) Ge Jesu a be a kolobetšwa Jorodane, o ile a inwa ka meetseng.  Ge a be a amogela moya go tšwa legodimong, e be e le ge a kolobetšwa ka moya o mokgethwa.

Mo e ka bago nywaga e meraro ka morago ga kolobetšo ya gagwe, Jesu o ile a nea barutiwa ba gagwe kgonthišetšo e rego: “Lena le tla kolobetšwa ka moya o mokgethwa matšatši a sego kae ka morago ga se.” (Ditiro 1:5) Seo se ile sa direga neng?

Letšatšing la Pentekoste ngwageng wa 33 C.E., barutiwa ba Jesu ba e ka bago ba 120 ba be ba bokane ka ntlong kua Jerusalema. “Ka tšhoganetšo gwa ba le lešata le le tšwago legodimong le bjalo ka ledimo le matla, la tlala ntlo ka moka yeo ba bego ba dutše ka go yona. Ke moka, gwa bonagala maleme a ekego ke mollo go bona . . . , gomme ka moka ga bona ba tlala moya o mokgethwa.” (Ditiro 2:1-4) Ka lona letšatši leo, ba bangwe kua Jerusalema ba ile ba kgothaletšwa gore ba kolobetšwe ka meetse. Moapostola Petro o ile a botša lešaba gore: “Itsholeng, gomme yo mongwe le yo mongwe a kolobetšwe leineng la Jesu Kriste bakeng sa tebalelo ya dibe tša lena, gomme le tla amogela mpho e sa lefelelwego ya moya o mokgethwa.” Karabelo e bile efe? “Bao ba amogetšego lentšu la gagwe ka pelo ka moka ba ile ba kolobetšwa, gomme ka letšatši leo gwa okeletšwa meoya e ka bago dikete tše tharo.”—Ditiro 2:38, 41.

Dikolobetšo tše Pedi

Dikolobetšo tše di utolla’ng mabapi le go tswalwa lefsa? Di bontšha gore go tswalwa lefsa go phethwa ka dikolobetšo tše pedi. Ela hloko gore Jesu o ile a thoma ka go kolobetšwa ka meetse. Ke moka a amogela moya o mokgethwa. Ka tsela e swanago, barutiwa ba lekgolong la pele la nywaga ba ile ba kolobetšwa pele ka meetse (ba bangwe ba kolobeditšwe ke Johane Mokolobetši), ke moka ba amogela moya o mokgethwa. (Johane 1:26-36) Ka mo go swanago barutiwa ba bafsa ba 3 000 le bona ba ile ba kolobetšwa pele ka meetse, ke moka ba amogela moya o mokgethwa.

Ge re nagana ka dikolobetšo tšeo di bilego gona ka Pentekoste ya 33 C.E., re swanetše go letela gore go tswalwa lefsa go direge bjang lehono? Ka tsela yona yeo e diregilego go baapostola ba Jesu le barutiwa ba lekgolong la pele la nywaga. Sa pele, motho o itshola dibeng tša gagwe, a sokologa tseleng ya gagwe e mpe, a neela bophelo bja gagwe go Jehofa gore a mo rapele le go mo hlankela, gomme a bonagatša boineelo bja gagwe phatlalatša ka kolobetšo ya meetseng. Ke moka, ge e ba Modimo a mo kgetha gore a hlankele e le mmuši Mmušong wa Gagwe, o tlotšwa ka moya o mokgethwa. Karolo ya pele ya ditiragalo tše tše pedi (go kolobetšwa ka meetse) e thongwa ke motho; karolo ya bobedi (go kolobetšwa ka moya) e thongwa ke Modimo. Ge motho a kolobetšwa ka tšona ka moka, o tswetšwe lefsa.

Lega go le bjalo, ke ka baka la’ng Jesu poledišanong ya gagwe le Nikodemo a ile a diriša polelwana e rego “a tswalwe ka meetse le ka moya”? O be a gatelela gore bao ba kolobetšwago ka meetse le ka moya ba tla fetoga ka tsela e makatšago. Sehlogo se se latelago se ahla-ahla karolo yeo ya go tswalwa lefsa.

[Mongwalo wa tlase]

[Seswantšho go letlakala 9]

Johane o ile a kolobetša Baisiraele bao ba itsholago ka meetse