Lengwalo le le Tšwago Russia

Leeto la go ya “Mafelelong a Lefase”

SEFOFANE sa rena se senyenyane se ile sa thakgoga Yakutsk gomme ganyenyane-ganyenyane sa rotoga sa taboga molapo wa Tuymaada. Re tlogela matsha a mantši a kgahlilego a mehutahuta le a fetanago ka bogolo, re ile ra fofa ka godimo ga dithaba tša Verkhoyanskiy, tšeo di nago le dintlha tše di bipilwego ke lehlwa tšeo di phadimetšwego ke letšatši. Ka morago ga go sepela dikhilomithara tše 900, sefofane sa rena se ile sa tsokama motseng wa Deputatskiy.

A e be le mathomo a maeto a-ka a kua repabliking ya Sakha, yeo gape e tsebjago e le Yakutia, e lego naga e botse le yeo go lego thata go dula go yona, e bile e le e kgolo kudu go feta dinaga ka moka tša Yuropa Bodikela. Ke lefelo leo go lona boemo bja leratadima bo ka tlogago go phišo e ka bago ya 40°C selemo go ya go marega ao a ka tonyago go fihla go -70°C le yeo go yona go nago le mašalela a marapo a diphoofolo tše dikgolo kudu tšeo di kilego tša phela kgale. Gaešita le ge go fetile nywaga e mentši ka morago ga ketelo ya-ka ya mafelelo, ke sa dutše ke gopola gabotse ditorotswana tšeo di aparetšwego ke mouwane o montši, dietša tše di phadimago tša leboa, gotee le batho ba Yakut bao ba tletšego lethabo e bile ba nago le sebete.

Motse wa Deputatskiy e be e se wona feela wo re bego re swanetšego go o etela. Nna le yoo ke bego ke sepela le yena re be re swanetše go etela le metse e mengwe. Wa mathomo e be e le motse wa Khayyr, wo o lego dikhilomithara tše 300 go ya leboa, kgaufsi le Lewatle la Laptev, ka leboa la Siberia. Ke ka baka la’ng re ile ra kgetha go tšea leeto le? Pejana, yo mongwe wa Dihlatse tša Jehofa o be a ile a etela metse ye gomme a hwetša batho ba bantši bao ba bego ba nyaka go ithuta ka mo go oketšegilego ka Beibele. Go ile gwa bonala rena bao re dulago Yakutsk, yeo e lego bokgoleng bja dikhilomithara tše 1 000 go tloga moo, re le kgaufsi kudu le bona! Re ile ra bona gore batho ba ba be ba nyaka kgothatšo le thušo.

Ge re fihla Deputatskiy, re ile ra hwetša monna yo a bego a otlela koloi a lebile Khayyr, gomme o ile a re nametša a ba a re holofetša go re lefiša tšhelete e nyenyane. Re ile ra dika-dika ge re bona koloi ya gagwe—ya kgale, yeo e dirilwego mehleng ya Soviet e bile e sa kgahliše. Lega go le bjalo, re ile ra namela gomme ra sepela le yena mantšiboeng ao. Re be re sa tsebe seo se letšego ka pele.

Ditulo tša koloi yeo di be di tonya go swana le mohlakatšididi o lego ka ntle, gomme go se go ye kae re ile ra lemoga gore di be di ka se ruthele. Re ile ra kgopela gore re eme ge sebaka se bulega gomme ra tsoma diaparo tše borutho tša boya, tšeo re ilego ra hlatlaganya ka tšona. Eupša phefo e ile ya fo tšwela pele e re tonya.

Mootledi wa rena, e lego monna yo mosehlana wa ka Leboa, o be a thabile kudu. Gatee-tee o ile a botšiša gore, “Na le ile la bona dietša tša leboa?” Ke be ke se ka ka ka di bona, ka gona o ile a emiša koloi gomme ra fologa ka go abula. Ka lebakanyana, re ile ra  lebala tšohle. Ke ile ka ema tsii, ke makaditšwe ke dietša tše di phadimago le tše nago le mebala tšeo di lego bjalo ka digareteine tše di tšewago ke moya—ponagalo ya mohlolo yeo e bonagalago eka e godingwana ga rena moo re ka e fihlelelago ka letsogo.

Koloi ya rena e ile ya šarelwa mokgobong wa lehlwa, felo tsoko mohlakatšididing o kgahlilego lefsifsing la ka masa. Re ile ra thuša mootledi go tloša koloi ya gagwe moo—gomme re ile ra dira bjalo le ka makga a mmalwa ka morago ga moo—ge re be re lebile Khayyr re sepela ditseleng tšeo di thutšwego gona moo lehlweng. Ke ile ka lemoga ge letšatši le hlaba gore ditsejana tšeo re bego re sepela go tšona ge e le gabotse e be e le dinoka tše di kgahlilego! Mafelelong, mosegareng wa sekgalela, diiri tše 16 ka morago ga ge re tlogile Deputatskiy, re ile ra fihla Khayyr. Gaešita le ge re be re nagana gore re be re tlo babja ka baka la go sepela nako e telele phefong, re ile ra tsoga re lapologile mesong e latelago. Menwana ya-ka ya maoto ke yona feela yeo e bego e hwile bogatšu, mohlomongwe ka baka la phefo. Badudi ba moo ba ile ba mpha makhura a go tlola gore ke tlole menwana yeo ka ona.

Ka mo go tlwaelegilego, re be re tla etela batho ka magaeng a bona gomme ra boledišana le bona ka ditaba tše dibotse. Lega go le bjalo, mo Khayyr gatee-tee ge batho ba e-kwa gore re gorogile, ba ile ba tla go rena! Ka dibeke tše pedi le seripa letšatši le lengwe le le lengwe, re be re ithuta Beibele le batho ba moo, ka dinako tše dingwe go tloga e sa le mesong kudu go fihla bošego. E be e le mo go kgahlišago go kopana le batho ba bantši ba borutho le ba amogelago baeng bao ba nago le kgahlego dilong tša moya. Bakgekolo ba mmalwa ba ma-Yakut ba ile ba re botša gore: “Re dumela go Modimo. Taba ya gore le tlile mo, mo mafelelong a lefase, e re bontšha gore Modimo o gona!”

Re ile ra makatšwa ke metlwae ya moo. Ka mohlala, batho ba dira mokgobo wa dikgapetla tša meetse a kgahlilego kgaufsi le nywako ya bona eka ke mokgobo wa dikgong. Nako le nako ge ba nyaka meetse, ba no tšea kgapetla e tee ya meetse a kgahlilego ba e tsenya ka ketleleng e kgolo mollong bakeng sa go e tološa. Badudi ba moo ba ile ba re fa hlapi e makatšago ya kua Arctic yeo e bitšwago chir, yeo e rothišago mare ge e lokišitšwe e le stroganina, sešebo sa motseng woo. Hlapi ye e kgahla ba sa tšwa go e tanya, ke moka ya kgebelelwa, ya tšhelwa ka motswakong wa letswai le pherefere, gomme ya jewa ka yona nako yeo. Badudi ba moo gape ba be thabela go re botša ditaba ka mašaledi a marapo a diphoofolo tše dikgolo tšeo di kilego tša phela kgale, a bjalo ka dinaka tše dikgolo, le mašaledi a mehlare, ao gantši ba a hwetšago lefelong lona leo.

Go tloga Khayyr, ke ile ka sepela dikhilomithara tše makgolo, kudu-kudu ka sefofane, ke etela bao ba kgahlegelago go ithuta Beibele ba metsaneng e mengwe ya Yakutia. Ruri batho ba mo ke ba borutho e bile ba na le lerato! Lebakeng le lengwe ke ile ka gahlana le mošemanyana yo mongwe yo a ilego a tseba ka tsela e itšego gore ke be ke tšhoga ge ke sepela ka sefofane. Ge a nkgothatša, o ile ntirela karata e nago le molaetša. O ile a thala dithaga tše pedi le sefofane se senyenyane gomme a ngwala gore: “Sasha, ge o fofa ka sefofane, o se ke wa tšhoga gore o tla wa. Mateo 10:29.” Ke ile ka kgomega gakaakaang ge ke be ke bala lengwalo leo! Go lona ke badile mantšu a Jesu a mabapi le dithaga a rego: “Ga go le e tee ya tšona yeo e tlago go wela fase Tatago lena a sa tsebe.”

Ke anegile feela tše sego kae tša dilo tšeo di nkgahlilego kua Yakutia. Lefelo le leo le tonyago o šoro le tla dula le nkgopotša ka batho ba borutho le ba kgahlišago bao ba dulago “mafelelong a lefase” e le ka kgonthe.

[Diswantšho go letlakala 25]

Re ile ra hwetša batho ba Yakut e le ba borutho le ba amogelago baeng