O Ela Hloko Seo re ka se Kgonago
Batamela Kgaufsi le Modimo
O Ela Hloko Seo re ka se Kgonago
“RURI ke lekile ka thata, eupša ga se ka ka ka ikwa eka ke dirile ka mo go lekanego.” Mantšu a a boletšwe ke mosadi yo mongwe ge a bolela ka maiteko a gagwe a go kgahliša Modimo. Na Jehofa Modimo o amogela maiteko a mabotse ao a dirwago ke barapedi ba gagwe? Na o naganela bokgoni bja bona le maemo a bona? E le gore re arabe dipotšišo tše, ke mo go holago go ela hloko seo se bolelwago ke Molao wa Moše mabapi le dibego tše itšego, bjalo ka ge o hwetšagala go Lefitiko 5:2-11.
Molaong wa Moše, Modimo o be a nyaka dihlabelo tše di fapa-fapanego bakeng sa go lefelela dibe. Maemo ao go bolelwago ka ona ditemaneng tše, motho o dirile sebe a sa ikemišetša. (Ditemana 2-4) Ge a lemoga gore o dirile sebe, o be a swanetše go ipolela sebe sa gagwe le go dira sehlabelo sa selefa—“e ka ba sehuswana sa nku ya thsadi, le xe e le sa putšana.” (Ditemana 5, 6) Eupša go thwe’ng ge e ba e be e le modiidi gomme a se na nku goba putšana yeo a ka e dirago sebego? Na Molao o be o nyaka gore motho a adime phoofolo e bjalo gomme a tsene sekolotong? Na o be a swanetše go šoma go fihlela a kgona go e reka, ke moka a diegiše go lefelela dibe tša gagwe?
Ge o bonagatša tsela yeo Jehofa a bego a naganela ka gona, Molao o itše: “Xe a ka hlaêlêlwa ke se se lekanaxo nku, xôna a tlišetšê Morêna mekurwanyane e mebedi, le xe e le maebana a mabedi.” (Temana 7) Polelwana e rego “xe a ka hlaêlêlwa ke” gape e ka fetolelwa e le “ge e ba letsogo la gagwe le sa fihlelele.” Ge e ba Moisiraele a be a diila kudu moo a ka se kgonego go tliša nku, Modimo o be a thabela go amogela selo se sengwe seo a ka se fihlelelago—mekurwanyane e mebedi goba maebana a mabedi.
Go thwe’ng ge e ba motho a be a sa kgone go tliša gaešita le dinonyana tše pedi? Molao o boletše gore: “Xôna a tlišê ntlatlana ya bupi byo bo tokilwexo, e bê selobá sa xaxwe.” (Temana 11) Go bao ba bego ba diila kudu, Jehofa o ile a kgetha go ba nea sebaka gomme a dumelela seloba seo se se nago madi. * Kua Isiraele, bodiidi ga se bja ka bja thibela motho le ge e le ofe go lefelela dibe tša gagwe goba tokelo ya go dira khutšo le Modimo.
Ke’ng seo re ithutago sona ka Jehofa go tšwa molaong wa mabapi le dilefa? Ke Modimo yo a nago le kwelobohloko, yo a kwešišago le yoo a elago hloko seo barapedi ga gagwe ba ka kgonago go mo nea sona. (Psalme 103:14) O nyaka gore re batamele kgaufsi le yena le go hlagolela tswalano e botse le yena gaešita le ge re e-na le maemo a thata, a bjalo ka botšofadi, go se phele gabotse mmeleng, boikarabelo bja lapa goba boikarabelo bjo bongwe. Re ka homotšwa ke go tseba gore Jehofa Modimo o kgahlwa ke ge re dira sohle seo re ka se kgonago.
[Mongwalo wa tlase]
^ ser. 7 Mohola wa phoofolo yeo go bego go dirwa sehlabelo ka yona o be o le mading a yona, ao Modimo a bego a a lebelela e le a makgethwa. (Lefitiko 17:11) Na se se bolela gore dibego tša bupi tšeo di bego di tlišwa ke badiidi di be di se bohlokwa? Le gatee. Jehofa o be a tšeela godimo moya wa boikokobetšo le wa go neela dibego tše bjalo ka go rata. Go feta moo, dibe tša setšhaba ka moka—go akaretša le tša badiidi—di be di bipša ke madi a diphoofolo tšeo go bego go direlwa Modimo dihlabelo ka tšona ka Letšatši la Poelanyo la ngwaga le ngwaga.—Lefitiko 16:29, 30.