Babadi ba Rena ba a Botšiša

Na Modimo o Dumelela go Nyala Segadikane?

Aowa; tekanyetšo yeo Modimo a e beilego Edene ka lenyalo la mathomo e be e le ya go nyala mosadi o tee. Jesu Kriste ka morago o ile a tiiša tekanyetšo yeo bakeng sa balatedi ba gagwe.—Genesi 2:18-24; Mateo 19:4-6.

Na banna ba bjalo ka Aborahama, Jakobo, Dafida le Solomone ba pele ga mehla ya Bokriste ba be ba se na basadi ba fetago o tee? Go bjalo, eupša Beibele e hlalosa bjang tswalano e bjalo? E utolla dikgohlano le ditshele tšeo di tšweletšego malapeng a Aborahama le Jakobo ka baka la go nyala segadikane. (Genesi 16:1-4; 29:18–30:24) Ka morago, Molao wa Modimo o be o akaretša taelo ye go kgoši e nngwe le e nngwe: “Le xôna a se kê a tšea basadi ba bantši, xore pelo ya xaxwe e se aroxê.” (Doiteronomio 17:15, 17) Solomone o hlokomologile taelo yeo ka go nyala basadi ba fetago 700! Ka manyami, pelo ya Solomone ruri e ile ya arošwa go Jehofa ka baka la tutuetšo e mpe ya basadi ba gagwe ba bantši. (1 Dikxoši 11:1-4) Go molaleng gore Beibele ga e bolele gabotse ka go nyala segadikane.

Lega go le bjalo, ba bangwe ba ka ipotšiša lebaka leo ka lona Modimo a ilego a kgetha go dumelela segadikane magareng ga batho ba gagwe. Nagana ka se: Na o ile wa itumelela go dula o e-na le fenitšhara e itšego ka nakwana gaešita le ge o be o swanetše go reka e nngwe, mohlomongwe o bea mabaka ka gore e be e tla ba mo go sa kwagalego go e tloša ka nako yeo? Ke therešo gore ditsela tša Modimo le dikgopolo tša gagwe di phagametše tša rena. (Jesaya 55:8, 9) Lega go le bjalo, re ka lemoga mabaka a mangwe a šomago ao ka ona a ilego a dumelela go nyala segadikane ka nakwana.

Gopola gore kua Edene, Jehofa o ile a holofetša gore go be go tla tla “peu” yeo mafelelong e bego e tla fediša Sathane. Ka morago, Aborahama o ile a botšwa gore e be e tla ba tatago setšhaba se segolo le gore Peu yeo go boletšwego ka yona e sa le pele e be e tla tšwa lešikeng la gagwe. (Genesi 3:15; 22:18) Sathane o be a ikemišeditše go thibela Peu yeo go fihla. Ka go rialo o be a ikemišeditše go fediša setšhaba seo sa bogologolo sa Isiraele. Gantši o be a gokeletša Isiraele go dira sebe e le gore setšhaba se lahlegelwe ke kamogelo le tšhireletšo ya Modimo.

Go thuša Isiraele kgahlanong le ditlhaselo tša Sathane, Jehofa o ile a romela baporofeta ba gagwe leboelela gore ba nee batho ba gagwe temošo ge ba thoma go hlokomologa ditekanyetšo tša go loka. Lega go le bjalo, o tsebile e sa le pele gore batho ba gagwe gantši ba be ba tla palelwa ke go kwa gaešita le ditaelo tša motheo, tše swanago le yeo e iletšago borapedi bja medimo ya diswantšho. (Ekisodo 32:9) Ge e ba ba be ba tla thatafalelwa ke go kwa molao wo wa motheo, gona ba be ba ka kwa bjang molao wo o bego o iletša go nyala basadi ba bantši? Ka ge a kwešiša batho ka mo go phethagetšego, Jehofa o ile a bona gore e be e se ya hlwa e e-ba nako ya go iletša mokgwa woo, wo e bego e šetše e le kgale o hlomilwe mehleng yeo. Ge nkabe a ile a iletša go nyala segadikane ka nako yeo, Sathane a ka be a ile a hwetša tsela e bonolo kudu ya go gokeletša Isiraele sebeng.

Go dumelela ga Modimo ka nakwana gore batho ba nyale segadikane go bile le mehola e mengwe. Go thušitše setšhaba go gola ka pela. Go ba le badudi ba bantši go thušitše go dira gore setšhaba se tšwele pele se le gona go ba go fihla nakong ya Mesia. Le gona, go nyala segadikane go ka ba go ile gwa šireletša basadi ba bangwe, ka go ba nea lefelo la bodulo gotee le lapa dinakong tše kotsi.

Lega go le bjalo, gopola gore Jehofa ga se a thoma mokgwa wo wa go nyala segadikane. O ile a o dumelela ka nako e lekanyeditšwego, eupša o ile a o laola ka go tia go phema gore o dirišwe gampe. (Ekisodo 21:10, 11; Doiteronomio 21:15-17) Ge Jehofa a be a kgetha go fediša mokgwa wo wa go nyala segadikane go barapedi ba gagwe, o dirišitše Morwa wa gagwe go tiiša tekanyetšo ya lenyalo yeo e bego e beilwe kua Edene. Ka gona, Jesu o ile a iletša balatedi ba gagwe go nyala segadikane. (Mareka 10:8) Ke moka, therešo ye e ile ya kwagala gabotse: Molao wa Moše o be o le kaone nakong ya wona, eupša “molao wa Kriste” o kaone le go feta.—Bagalatia 6:2.