Na o ka ba le Khutšo mo Lefaseng la Mathata?

NA O phela ka khutšo? Go ba bantši, karabo e lego molaleng ke aowa. Ba phela mafelong a tletšego dintwa, khuduego ya tša dipolitiki, bošoro gare ga merafo, goba botšhošetši. Gaešita le ge o sa lebeletšane le mathata a bjalo, o ka no ba o amogwa khutšo ke bosenyi, tlaišego, le diphapano le bašomi-gotee goba baagišani. Malapa le wona gantši a bjalo ka lefelo la ntwa go e na le go ba ao a nago le khutšo.

Batho ba bantši ba hlologetše go ba le khutšo ya ka gare. Ba ka e tsoma bodumeding, diseminaring tša go naganišiša, goba dihlopheng tša yoga. Ba bangwe ba leka go hwetša khutšo dilong tša tlhago—ba ya maikhutšong, go yo namela dithaba le go phatša dithokgwa, goba go etela mafelong ao a nago le methopo ya meetse a go fiša. Gaešita le ge batho bao ba tsomago khutšo ba bonagala ba hwetša tekanyo e itšego ya khutšo ya ka gare, go se go ye kae ba lemoga gore khutšo yeo ga e kgotsofatše e bile ga ba be le yona nako e telele.

Ka gona ke kae moo o ka hwetšago khutšo ya kgonthe? Mothopo wa khutšo ke Mmopi wa rena, Jehofa Modimo. Ka baka la’ng? Ka gobane ke “Modimo yo a neago khutšo.” (Baroma 15:33) Ka tlase ga pušo ya Mmušo wa gagwe wo o lego kgaufsi le go fihla, “khutšo e tlo ba e kgolo.” (Psalme 72:7, PK; Mateo 6:9, 10) Se ke seo se fetago kgole khutšo yeo e tlišwago ke batho. Khutšo e bjalo gantši e fo ba e le go tsena dintwa gare. Eupša khutšo ya Modimo e tla fediša dibaki ka moka tša ntwa le ditshele. Ge e le gabotse, ga go yo a tlago go ithuta ntwa. (Psalme 46:8, 9) Ruri go tla ba le khutšo ya kgonthe mafelelong!

Gaešita le ge kholofelo ye e le e botse, o ka no ba o duma go ba le tekanyo e itšego ya khutšo gona bjale.  Na go na le tsela ya go hwetša khutšo ya ka gare yeo e ka go thušago mo mehleng ya rena e tletšego mathata? Se se thabišago ke gore Beibele e re bontšha kamoo re ka hwetšago khutšo ye ka gona. Ela hloko tlhahlo e nngwe yeo e lego go kgaolo ya bone ya lengwalo la Paulo le le yago go Bafilipi. Hle bala temana 4 go ya go 13 ka Beibeleng ya gago.

“Khutšo ya Modimo”

Go temana 7 re bala gore: “Khutšo ya Modimo ye e fetago kgopolo yohle e tla diša dipelo tša lena le matla a lena a monagano ka Kriste Jesu.” Khutšo ye ga e tlišwe ke go fo naganišiša goba go kaonefatša semelo. Go e na le moo, e tšwa go Modimo. Khutšo ye ke e matla kudu moo e lego gore e ‘feta kgopolo yohle.’ Go molaleng gore e feta dipelaelo tša rena ka moka, tsebo gotee le tlhaologanyo. Re ka no se bone tharollo ya mathata a rena, eupša khutšo ya Modimo e ka re tlatša ka kholofelo e nago le motheo o tiilego ya gore ka letšatši le lengwe mathata a rena ka moka a tla fela.

Na se ga se kgonege? Go ya ka batho ga se kgonege; eupša “dilo tšohle di a kgonega go Modimo.” (Mareka 10:27) Tumelo le go bota Modimo di re thuša go laola go tshwenyega ga rena. Nagana ka ngwana yo monyenyane yo a timetšego ka lebenkeleng le legolo. Seo a se tsebago ke gore o swanetše go hwetša mmagwe gomme tšohle di tla loka. Go swana le ngwana yoo ge a hweditšwe, re ka re, re ka holofela gore Modimo o tla re kuka. O tla re thuša go tloša dipelaelo tša rena mafelelong.

Ba bantši ba barapedi ba Jehofa ba ile ba hwetša khutšo ya Modimo ge ba le ka tlase ga diteko tše šoro. Ka mohlala, ela hloko Nadine, yo a ilego a senyegelwa ke mpa. O anega ka gore: “Ke thatafalelwa ke go bolela ka maikwelo a-ka, gomme ke dula ke leka go itira eka dilo di ntshepelela gabotse. Eupša ka gare, ke be ke e-kwa bohloko kudu. Mo e nyakilego go ba letšatši le lengwe le le lengwe, ke be ke tšhollela Jehofa sa mafahleng ka thapelo gomme ke mo lopa gore a nthuše. Ke ile ka bona gore thapelo e matla, ka gobane nako le nako ge ke be ke gateletšegile kudu gomme ke nagana gore, ‘ga ke sa kgona,’ ke be ke e-kwa ke e-na le khutšo ya ka gare. Ke be ke ikwa ke šireletšegile.”

Tšhireletšo ya Pelo ya Gago le Monagano

A re boeleng go lengwalo la Bafilipi 4:7. Le bolela gore khutšo ya Modimo e tla diša dipelo tša rena le matla a rena a monagano. Go fo swana le mohlapetši yo a letilego kampa ya madira, khutšo ya Modimo e diša dipelo tša rena, e le gore dikgopolo tša go rata dilo tše di bonagalago, dipelaelo tše di sa nyakegego le ditekanyetšo tše di sa boifego Modimo di se ke tša tsena. Ela hloko mohlala.

Batho ba bantši mo lefaseng le le nago le mathata ba dumela gore ge motho a nyaka go thaba le go ikwa a šireletšegile, o swanetše go ba le motlalo wa ditšhelete. Ka go hlahlwa ke ditsebi, batho ba ka beeletša ditšhelete tša bona dithotong. Na ka morago ga go dira bjalo ba ikwa ba e-na le khutšo? Ga se gore go bjalo. Ka go belaela ba ka fela ba lebelela gore na dilo di rekišwa ka bokae letšatši le lengwe le le lengwe, ba ipotšiša ge e ba ba swanetše go rekiša, go reka goba go swara dithoto tša bona. Ge kgwebo ya dithoto e lahlegelwa ke tšhelete, ba ka tšhoga. Beibele ka ntle le pelaelo ga e kgahlanong le go dira dipeeletšo, eupša e nea keletšo ye e bohlale: “E a rataxo mahumô xa a hore ka ôna; mo-lla-boati xa a holexe selô. Le tšôna ké lefêla. Borôkô byo bose ké bya modiri, xe a lle ka xonyane le xe e le ka kudu. Mohumi ó hlobaetšwa ke xo hora.”—Mmoledi 5:9, 11.

Bafilipi 4:7 e phetha ka go bolela gore khutšo ya Modimo e diša dipelo tša rena le matla a rena a monagano “ka Kriste Jesu.” Go na le kgokagano efe magareng ga Kriste Jesu le khutšo ya Modimo? Jesu o kgatha tema e kgolo go phethagatšweng ga morero wa Modimo. Jesu o gafile bophelo bja gagwe e le gore re ka lokollwa sebeng le lehung. (Johane 3:16) Le gona ke Kgoši e dutšego sedulong ya Mmušo wa Modimo. Go tseba tema yeo e kgathwago ke Jesu go ka ba le tutuetšo e kgolo khutšong ya rena ya monagano le ya pelo. Go bjalo bjang?

Ge e ba re itshola e le ka kgonthe dibeng tša rena gomme re kgopela tebalelo motheong wa sehlabelo sa Jesu, Modimo o tla re lebalela, e lego seo se re thušago go ba le khutšo ya monagano le ya pelo. (Ditiro 3:19) Ge re lemoga gore bophelo bo ka se thabelwe ka mo go feletšego go ba go fihla nakong ya Mmušo o tlago wa Kriste, re phema  go phela ka tsela yeo nkego ga re na kholofelo ya bokamoso. (1 Timotheo 6:19) Ke therešo gore re ka se phele re se na mathata, eupša re ka homotšwa ke kholofelo e kgonthišeditšwego ya gore bophelo bjo bokaone-kaone bo letše ka pele.

Kamoo o ka Hwetšago Khutšo ya Modimo ka Gona

Ka gona o ka hwetša khutšo ya Modimo bjang? Re hwetša thušo ya kamoo re ka dirago seo ka gona go Bafilipi 4:4, 5, yeo e balegago ka gore: “Ka mehla thabang Moreneng. Ke tla buša ke re, Thabang! Anke go leka-lekana ga lena go tsebje bathong bohle. Morena o kgaufsi.” Ge Paulo a be a ngwala mantšu ao, o be a lahletšwe kgolegong ka tsela e hlokago toka kua Roma. (Bafilipi 1:13) Go e na le go lla ka baka la tsela e hlokago toka yeo a swerwego ka yona, o ile a kgothaletša badumedi-gotee le yena gore ba dule ba thabile Moreneng. Go molaleng gore lethabo la gagwe le be le ithekgile ka tswalano ya gagwe le Modimo, e sego ka maemo a gagwe. Le rena re swanetše go ithuta go thabela go hlankela Modimo go sa šetšwe maemo a rena. Ge re tseba Jehofa gakaone e bile re phetha thato ya gagwe ka botlalo kudu, re tla mo hlankela ka lethabo le le oketšegilego. Ke moka, seo se tla re tlišetša kgotsofalo le khutšo ya ka gare.

Go oketša moo, re kgothaletšwa gore re be ba nago le teka-tekano. Ge e ba re hlagolela teka-tekano, re ka se letele gore re dire dilo tšeo re ka se kgonego go di dira. Re a tseba gore ga se ra phethagala; le gore re ka se kgone go dira dilo ka moka gabotse. Bjale, ke ka baka la’ng re swanetše go hlobaela ka baka la go nyaka go ba ba phethagetšego goba, bonyenyane, go nyaka go ba ba phalago batho ka moka? Le gona re ka se letele gore batho ba bangwe e be ba phethagetšego. Ka baka leo, re ka dula re phohlišitše maswafo ge ba re fošetša. Phetolelo e nngwe ya lentšu la Segerika sa mathomo la “go leka-lekana” ke “go feto-fetoga le maemo.” Ge e ba re feto-fetoga le maemo ditabeng tša go fapana ka dipono, re phema ditshele, tšeo di sa re holego ka selo eupša di re amogago khutšo yeo re nago le yona le ba bangwe gotee le khutšo ya rena ya ka gare lebakeng le itšego la nako.

Lefokwana le le latelago go Bafilipi 4:5 le le rego, “Morena o kgaufsi,” le ka bonala le sa nyalelane le taba ye. Go se go ye kae Modimo o tliša tshepedišo e mpsha ya dilo yeo e tlago go tšeela ye ya kgale legato ka tlase ga Mmušo wa gagwe. Eupša le gona bjale a ka ba kgaufsi le yo mongwe le yo mongwe yo a batamelago go yena. (Ditiro 17:27; Jakobo 4:8) Go lemoga gore o kgaufsi go re thuša gore re thabe, re be le teka-tekano le gore re se ke ra belaela mabapi le mathata a lehono goba ka bokamoso, bjalo ka ge temana 6 e bontšha.

Ge re lebelela temana 6 le 7, re lemoga gore khutšo ya Modimo ke mafelelo a lebanyago a thapelo. Ba bangwe ba lebelela thapelo e fo ba e le sebopego sa go naganišiša, ba nagana gore mohuta o mongwe le o mongwe wa thapelo o ka oketša boiketlo bja bona bja ka gare. Lega go le bjalo, Beibele e re ke go boledišana le Jehofa go tšwa pelong, poledišano ya kgaufsi kudu go swana le ya ge ngwana a boledišana le motswadi yo lerato ka dilo tšeo di mo thabišago le tšeo di mo tshwenyago. Ke mo go homotšago go tseba gore re ka batamela Modimo gomme ra mmotša ‘dilo tšohle.’ Re ka botša Tatago rena wa legodimong ka selo le ge e le sefe seo se lego monaganong wa rena goba se lego ka gare-gare dipelong tša rena.

Temana 8 e re kgothaletša go tsepamiša kgopolo dilong tšeo di kgahlišago. Lega go le bjalo, go fo naganišiša ka dilo tšeo di kgahlišago ga se mo go lekanego. Bjalo ka ge temana 9 e hlalosa, re swanetše go diriša le keletšo e botse ya Beibele. Go dira bjalo go tla dira gore re be le letswalo le le hlwekilego. Seema se sengwe se bolela therešo ge se re: Letswalo le lebotse ke mosamelo o boleta!

Ee, o ka hwetša khutšo ya ka gare. E tšwa go Jehofa Modimo, yoo a e neago bao ba mmatamelago le bao ba nyakago go latela tlhahlo ya gagwe. Ka go hlahloba Lentšu la gagwe, e lego Beibele, o ka tlwaelana le dikgopolo tša gagwe. Go diriša keletšo ya gagwe ga se ka mehla go lego bonolo. Eupša go nyaka gore re dire sohle seo re ka se kgonago ka gobane “Modimo wa khutšo o tla ba le [wena].”—Bafilipi 4:9.

[Ntlhakgolo go letlakala 10]

“Khutšo ya Modimo . . . e tla diša dipelo tša lena.”​—BAFILIPI 4:7

[Ntlhakgolo go letlakala 12]

Ke mo go homotšago go tseba gore re ka batamela Modimo gomme ra mmotša ‘dilo tšohle’