Beibele e Fetoša Maphelo

Ke ka baka la’ng monna yoo bophelo bja gagwe bo bego bo theilwe dithuthuthung, dihlare-taging le dipapading a ile a kgetha go ba modiredi wa nako e tletšego? Ke’ng seo se tutueleditšego mopetšhi yo mogolo go tlogela go lemalela ga gagwe go petšha le go hlokomela lapa la gagwe ka mošomo o hlomphegago? Ke’ng seo se hlohleleditšego kgarebe yeo e bego e godišitšwe e le yo mongwe wa Dihlatse tša Jehofa eupša e ilego ya tlogela ditekanyetšo tša Beibele go naganišiša ka bophelo bja yona? Ela hloko seo batho ba ba se bolelago.

PEGO YA BOPHELO BJA GAGWE

LEINA: TERRENCE J. O’BRIEN

NYWAGA: 57

NAGA: AUSTRALIA

BOPHELO BJA PELE E E-BA MOKRISTE: GO DIRIŠA DIHLARE-TAGI LE GO RATA DITHUTHUTHU

BOPHELO BJA-KA BJA NAKONG E FETILEGO: Ke goletše motseng wa leema-ema wa Brisbane, e lego motse-mošate wa Queensland. Lapa lešo e be e le Makatholika, eupša ge ke e-na le nywaga e seswai, re ile ra kgaotša go ya kerekeng gomme ga se ra ka ra hlwa re bolela ka bodumedi. Ge ke e-na le nywaga e lesome, lapa lešo le ile la hudugela Gold Coast kua Australia. Re be re dula kgaufsi le lebopo la lewatle gomme ke ile ka fetša mathomo a nywaga ya-ka ya mahlalagadi ke rutha le go bapala maphotong.

Lega go le bjalo, ga se ka ka ka thabela bjana bja-ka. Tate o ile a tlogela lapa lešo ge ke be ke e-na le nywaga e seswai. Mma o ile a nyalwa gape gomme lapeng lešo, dino-tagi le dingangišano e be e le karolo ya ka mehla ya bophelo. Bošegong bjo bongwe, ka morago ga ngangišano e šoro magareng ga batswadi ba-ka, ke be ke dutše malaong a-ka gomme ke dira keno ya gore ge nka nyala, le ka mohla nka se ke ka ngangišana le mosadi wa-ka. Go sa šetšwe mathata a lapa, lapa lešo—la bana ba tshela, mma le tate yo e sego wa madi—le be le e-na le ditswalano tša kgaufsi.

Nywageng ya-ka ya mahlalagading, dithaka tša-ka tše dintši di be di rabela kgahlanong le taolo. Di be di kgoga patše, motšoko le dihlare-tagi tše dingwe gomme di be di diriša le dino-tagi gampe. Ke be ke phela bophelo bja go se tshwenyege go etša dithaka tša-ka. Le gona ke be ke thabela go namela dithuthuthu. Gaešita le ge ke ile ka akaretšwa dikotsing tše kgolo tše mmalwa, ke ile ka tšwela pele ke rata dithuthuthu gomme ka dira phetho ya gore ke phatše Australia ka sethuthuthu sa-ka.

Go sa šetšwe tokologo ka moka yeo ke bego ke e-na le yona, gantši ke be ke ikwa ke gateletšegile  ge ke nagana ka maemo a lefase le kamoo batho ba bantši ba bego ba sa tshwenyege ka mathata a batho. Ke be ke duma go tseba therešo ka Modimo, bodumedi le maemo a lefase. Eupša ge ke be ke botšiša baruti ba babedi ba Katholika dipotšišo tša-ka, ke ile ka nyamišwa ke dikarabo tša bona. Ke ile ka boledišana le baruti ba fapa-fapanego ba Protestanta ka ditaba tše swanago eupša ke ile ka nyamišwa le ke dikarabo tša bona. Ke moka, mogwera o ile a rulaganya gore ke kopane le Eddie, e lego yo mongwe wa Dihlatse tša Jehofa. Ke ile ka boledišana le Eddie ka makga a mane gomme ka lekga le lengwe le le lengwe o be a araba dipotšišo tša-ka a diriša Beibele. Go tloga mathomong a poledišano, ke be ke tseba gore ke hweditše selo se se kgethegilego. Lega go le bjalo, nakong yeo ke be ke sa bone bohlokwa bja go fetoša bophelo bja-ka ka tsela le ge e le efe.

KAMOO BEIBELE E FETOTŠEGO BOPHELO BJA-KA: Leetong la-ka la go phatša Australia, ke ile ka ba le dipoledišano le Hlatse e nngwe, yeo ke gahlanego le yona tseleng. Eupša ge ke boela Queensland, ga se ka ka ka ikgokaganya le Dihlatse lebakeng la dikgwedi tše tshelelago.

Ke moka, ka letšatši le lengwe ge ke e-ya gae ke e-tšwa mošomong, ke ile ka bona banna ba babedi bao ba bego ba apere gabotse ba swere mekotla ya dipuku ba sepela setarateng gomme ke ile ka nagana gore e swanetše go ba e le Dihlatse tša Jehofa. Ke ile ka ya go bona, ka kgonthiša gore ruri ke bona Dihlatse tša Jehofa gomme ka ba kgopela gore ba ithute Beibele le nna. Gatee-tee ke ile ka thoma go ya dibokeng tša Dihlatse gaešita le go ya kopanong e kgolo yeo e bego e swerwe kua Sydney ka 1973. Lega go le bjalo, ge ba gešo—kudu-kudu mma—ba lemoga seo ke bego ke se dira, ba ile ba nyama kudu. Ka lebaka le gotee le mabaka mangwe, ke ile ka kgaotša go kopanela le Dihlatse. Ke ile ka fetša ngwaga ke nweletše selong se sengwe seo ke bego ke se rata kudu, e lego papadi ya cricket.

Lega go le bjalo, mafelelong ke ile ka lemoga gore nako feela yeo ke bego ke ikwa ke thabile e le ka kgonthe ke ge ke be ke ithuta Beibele le Dihlatse tša Jehofa. Ke ile ka ikgokaganya le tšona gape gomme ka thoma go ya dibokeng. Ke ile ka ba ka kgaotša bogwera bja-ka le bagwera ba-ka bao ba dirišago dihlare-tagi.

Seo ge e le gabotse se ilego sa ntutueletša go dira diphetogo tše e be e le seo ke ithutilego sona ka motho yo mongwe ka Beibeleng e lego Jobo. Hlatse yeo e bego e le botho eupša e tiile e bitšwago Bill e be e dula e boledišana le nna ka Beibele. Ka morago ga ge re ithutile ka taba ya Jobo, Bill o ile a mpotšiša gore ke motho ofe yo mongwe yoo Sathane a mo latofatšago ka gore ga a hlankele Modimo ka pelo moka. (Jobo 2:3-5) Ke ile ka bolela ka batho bohle bao go bolelwago ka bona ka Beibeleng bao ke bego ke ba tseba gomme Bill ka go se fele pelo o ile a araba ka gore, “Ee, ee, le bona.” Ke moka o ile a ntebelela ka mahlong gomme a re, “Sathane o rialo le ka wena!” Ke ile ka makala kudu. Pele ga thuto yeo, ke be ke tseba gore dithuto tšeo ke bego ke ithuta tšona e be e le therešo. Eupša ga bjale ke be ke kwešiša lebaka leo ka lona ke bego ke swanetše go diriša seo ke ithutago sona. Ka morago ga dikgwedi tše nne, ke ile ka kolobetšwa bjalo ka yo mongwe wa Dihlatse tša Jehofa.

KAMOO KE ILEGO KA HOLEGA KA GONA: Ke a tšhoga ge ke nagana gore bophelo bja-ka bo ka be bo le bjang gona bjale ge nkabe ke se ka ithuta go phela ka ditekanyetšo tša Beibele. Mohlomongwe nkabe ke hwile. Bagwera ba-ka ba bantši ba nakong e fetilego ba hwile ka baka la dihlare-tagi goba dino-tagi. Le gona ba be ba e-na le manyalo a se nago lethabo. Ke nagana gore bophelo bja-ka e ka be e le bjo bo swanago.

Ga bjale ke nyetše gomme nna le mosadi wa-ka Margaret re thabela go hlankela ofising ya lekala ya Dihlatse tša Jehofa ya Australia. Ga go le o tee wa lapa lešo yo a ilego a ntlatša borapeding bja-ka  go Jehofa. Lega go le bjalo, ge nywaga e dutše e e-ya, nna le Margaret re ile ra thabela go ithuta Beibele le batho le banyalani ba mmalwa bao ba ilego ba fetoša maphelo a bona, bjalo ka ge le nna ke dirile. Ge se se dutše se direga, re ile ra ba le bagwera ba bantši ba babotse. Go oketša moo, Margaret, yo a godišitšwego e le Hlatse, o ile a nthuša go phetha keno yeo ke e dirilego mo e nyakilego go ba nywaga e 40 e fetilego. Re bile lenyalong le le thabilego ka nywaga ya ka godimo ga e 25. Ga se ka mehla re dumelelanago ka selo se sengwe le se sengwe, eupša go ba go fihla gona bjale ga se ra ka ra ngangišana. Bobedi bja rena re leboga Beibele bakeng sa seo.

PEGO YA BOPHELO BJA GAGWE

LEINA: MASAHIRO OKABAYASHI

NYWAGA: 39

NAGA: JAPANE

BOPHELO BJA PELE E E-BA MOKRISTE: MOPETŠHI

BOPHELO BJA-KA BJA NAKONG E FETILEGO: Ke godišitšwe kua Iwakura, lefelong le le nyenyane kudu la mo e ka bago leeto la seripa-gare sa iri ge o sepela ka setimela go tšwa Nagoya. Ke gopola gore mma le tate e be e le ba botho kudu. Lega go le bjalo, ke ile ka tseba ka morago gore tate e be e le yakuza, goba sekebekwa, yoo ka nako e telele a bego a fepa lapa lešo la batho ba bahlano ka bomenetša. O be a e-nwa bjala kudu letšatši le lengwe le le lengwe gomme ge ke e-na le nywaga e 20, o ile a hwa ka baka la bolwetši bja sebete.

Tate e be e le mo-Korea, ka gona lapa lešo gantši le be le kgethollwa ke batho ba motse. Taba ye le mathata a mangwe a ile a dira gore ke se thabele nywaga ya-ka ya mahlalagading. Ke be ke tsena sekolong se phagamego eupša ke e-ba gona ka sewelo gomme ke ile ka kgaotša ka morago ga ngwaga. Ke be ke šetše ke e-na le pego ya molato maphodiseng gomme seo ge se akaretšwa le go ba mo-Korea se ile sa dira gore ke thatafalelwe ke go hwetša mošomo. Mafelelong, ke ile ka hwetša mošomo eupša ka ikgobatša matolo gomme ka se sa hlwa ke kgona go šoma mošomo o thata.

Ke ile ka thoma go iphediša ka go bapala pachinko, e lego sebopego sa go petšha seo se akaretšago sedirišwa seo se swanago le motšhene wa pinball. Nakong yeo, ke be ke dula le kgarebe yeo e bego e nyaka gore ke hwetše mošomo wa maleba le gore ke e nyale. Eupša ke be ke dira tšhelete e ntši ka go petšha gomme ke sa nyake go fetoša tsela ya-ka ya bophelo.

KAMOO BEIBELE E FETOTŠEGO BOPHELO BJA-KA: Ka letšatši le lengwe, yo mongwe wa Dihlatse tša Jehofa o ile a re etela gomme a ntlogelela puku ya Life—How Did It Get Here? By Evolution or by Creation? Ke be ke se ka ka ka naganišiša ka potšišo ye. Lega go le bjalo, ka morago ga go bala puku yeo, ke ile ka dumela go ithuta ka mo go oketšegilego ka Beibele. Ke be ke dula ke ipotšiša gore go direga eng ge motho a e-hwa. Dikarabo tše di kwagalago tšeo ke di hweditšego go tšwa Beibeleng mabapi le se le ditaba tše dingwe di dirile gore ke ikwe eka go wa makgapetla mahlong a-ka.

Ke ile ka lemoga go nyakega ga go diriša seo ke ithutilego sona go tšwa Beibeleng. Ka gona ke ile ka ngwadiša lenyalo la-ka ka molao, ka kgaotša go kgoga, ka kota moriri wa-ka o motelele woo ke bego ke o tayile ka mmala wa gauta gomme ka kaonefatša  ponagalo ya-ka. Ke ile ka ba ka kgaotša go petšha.

Go be go se bonolo go dira diphetogo tše. Ka mohlala, ke ile ka palelwa ke go kgaotša go kgoga motšoko ka matla a-ka. Eupša ka thapelo e tšwago pelong le go ithekga ka Jehofa Modimo, ke ile ka kgaotša. Le gona, mošomo wa mathomo woo ke o hweditšego ka morago ga go kgaotša go bapala pachinko, e be e le tlhohlo go nna. Ke be ke gola feela seripa sa tšhelete yeo ke bego ke e hwetša ge ke petšha e bile mošomo woo o be o le thata le o gateletšago. Ditemana tše dingwe tša Beibele tšeo di nthušitšego nakong yeo e thata ke Bafilipi 4:6, 7. Di re: “Le se ke la belaela ka selo, eupša dilong tšohle tsebišang Modimo dikgopelo tša lena ka thapelo le ka topo gotee le ka go leboga; gomme khutšo ya Modimo ye e fetago kgopolo yohle e tla diša dipelo tša lena le matla a lena a monagano ka Kriste Jesu.” Mabakeng a mantši, ke bone therešo ya kholofetšo ye.

KAMOO KE ILEGO KA HOLEGA KA GONA: Ge ke be thoma go ithuta Beibele le Dihlatse tša Jehofa, mosadi wa-ka ga se a ka a thaba. Eupša ge a be a bona diphetogo tše dikgolo tšeo ke bego ke di dira boitshwarong bja-ka, o ile a ntlatša dinakong tša-ka tša go ithuta gomme a thoma go ya dibokeng tša Dihlatse tša Jehofa le nna. Ga bjale bobedi bja rena re Dihlatse tša Jehofa. Go kgona go hlankela Modimo re le gotee ke tšhegofatšo e le ruri!

Pele ga ge nka ithuta Beibele, ke be ke nagana gore ke thabile. Lega go le bjalo, ga bjale ke tseba seo lethabo la kgonthe e lego sona. Go phela ka ditekanyetšo tša Beibele go tloga go se bonolo, eupša ke kgodišegile gore ke tsela e kaone-kaone ya bophelo.

PEGO YA BOPHELO BJA GAGWE

LEINA: ELIZABETH JANE SCHOFIELD

NYWAGA: 35

NAGA: UNITED KINGDOM

BOPHELO BJA PELE E E-BA MOKRISTE: O BE A PHELELA GO ITHABIŠA MAFELO-BEKENG

BOPHELO BJA-KA BJA NAKONG E FETILEGO: Ke goletše kua Hardgate, toropo yeo e lego ka ntlenyana ga Glasgow, Scotland. Ge ke be ke e-na le nywaga e šupa, mma, yoo e bego e le yo mongwe wa Dihlatse tša Jehofa, o ile a thoma go nthuta Beibele. Lega go le bjalo, ge ke e-ba le nywaga e 17, ke be ke kgahlegela go fetša nako e ntši le bagwera ba-ka ba sekolong—re e-ya go di-nightclub, re theetša mmino wo o nago le moretheto wa godimo le go nwa dino-tagi. Ke be ke sa nagane selo ka dilo tša moya. Ke be ke phelela go ithabiša mafelo-bekeng. Lega go le bjalo, tšeo ka moka di ile tša fetoga ge ke be ke e-na le nywaga e 21.

 Ke ile ka etela ba bangwe ba leloko kua Leboa la Ireland. Ge ke le moo, ke ile ka bona Orange Walk, moo Maprotestanta a dirago mogwanto. Lehloyo le legolo le kgethollo tšeo ke di bonego di bontšhwa magareng ga Maprotestanta le Makatholika lebakeng leo di ile tša ntšhoša. Ge e le gabotse, di ile tša nthuša gore ke hlaphogelwe. Ke ile ka gopola dilo tšeo mma a nthutilego tšona go tšwa Beibeleng e bile ke be ke tseba gore Modimo a ka se tsoge a amogetše bao ba hlokomologago ditekanyetšo tša gagwe tše lerato. Ke moka, ke ile ka lemoga kapejana gore ke be ke swaregile ka go phegelela dikgahlego tša-ka gomme ke hlokomologa tsela yeo Modimo a bego a nyaka gore ke phele bophelo bja-ka ka yona. Ke ile ka dira phetho ya gore ge ke boela gae Scotland, ke tla nyakišiša seo ge e le gabotse Beibele e se rutago.

KAMOO BEIBELE E FETOTŠEGO BOPHELO BJA-KA: Ge ke boela dibokeng tša Dihlatse tša Jehofa motseng wa gešo ka lekga la pele, go be go le thata e bile ke be ke tšhogile. Lega go le bjalo, bohle ba ile ba dira gore ke ikwe ke amogelegile. Ge ke be ke thoma go diriša dilo tšeo ke bego ke ithuta tšona go tšwa Beibeleng, setho se botho kudu sa phuthego se ile sa mpontšha kgahlego ka mo go kgethegilego. Se ile sa nthuša e le ruri gore ke ikwe ke le karolo ya phuthego gape. Bagwera ba-ka ba nakong e fetilego ba ile ba tšwela pele ba ntaletša go ya go di-nightclub, eupša ke ile ka ba botša gore ke be ke ikemišeditše go phela ka ditekanyetšo tša Beibele. Mafelelong, ba ile ba kgaotša go ikgokaganya le nna.

Nakong e fetilego, ke be ke lebelela Beibele e le feela puku ya melao. Ga bjale boemo bja-ka bja kgopolo bo fetogile. Ke ile ka thoma go lebelela batho bao go bolelwago ka bona ka Beibeleng e le batho ba kgonthe bao ba bego ba e-na le maikwelo le mafokodi go fo swana le nna. Le bona ba ile ba dira diphošo, eupša Jehofa Modimo o ile a ba lebalela ge ba be ba itshola e le ka kgonthe. Ke ile ka ba le kgodišego ya gore gaešita le ge ke ile ka hlanogela Modimo ge ke be ke sa le yo monyenyane, o be a tla ntebalela le go lebala diphošo tša-ka tša nakong e fetilego ge ke leka ka thata go mo kgahliša.

Boitshwaro bja mma le bjona bo ile bja nkgahla kudu. Gaešita le ge ke ile ka tlogela Modimo, yena ga se a ka a Mo tlogela. Mohlala wa gagwe wa potego o ile wa dira gore ke lemoge gore go hlankela Jehofa go be go swanelwa ke boiteko. Ge ke be ke sa le yo monyenyane e bile ke dira boboledi bja ntlo le ntlo le mma, ke be ke sa bo thabele e bile ke sa ipone ke fetša nako e telele ke dira boboledi bathong. Lega go le bjalo, ga bjale ke ile ka dira phetho ya go leka go diriša mantšu a Jesu a lego go Mateo 6:31-33. O itše: “Le ka mohla le se ke la belaela la re, ‘Re tla ja’ng?’ goba, ‘Re tla nwa’ng?’ goba, ‘Re tla apara’ng?’. .  Tatago lena wa legodimong o a tseba gore dilo tše ka moka le a di nyaka. Ka gona, tšwelang pele le tsoma mmušo pele le toko ya gagwe, gomme dilo tše tše dingwe ka moka le tla di okeletšwa.” Gatee-tee ka morago ga go kolobetšwa bjalo ka yo mongwe wa Dihlatse tša Jehofa, ke ile ka tlogela mošomo wa-ka wa boiphedišo wa nako e tletšego, ka hwetša mošomo wa nakwana gomme ka ba modiredi wa nako e tletšego.

KAMOO KE ILEGO KA HOLEGA KA GONA: Ge ke be ke sa le yo monyenyane gomme ke phelela feela go ithabiša mafelo-bekeng, ga se ka ka ka ikwa ke kgotsofetše. Bophelo bja-ka bo be bo se na morero. Ga bjale ka ge ke hlankela Jehofa ka mo go tletšego, ke ikwa ke kgotsofetše e le ruri. Bophelo bja-ka bo na le morero. Ga bjale ke nyetšwe gomme nna le monna wa-ka re etela diphuthego tše di fapa-fapanego tša Dihlatse tša Jehofa beke le beke bakeng sa go di kgothatša. Ke lebelela modiro wo e le tokelo e kgolo bophelong bja-ka. Ke tloga ke leboga Jehofa bakeng sa go mpha sebaka se sengwe!

[Ntlhakgolo go letlakala 27]

“Go tloga mathomong a poledišano, ke be ke tseba gore ke hweditše selo se se kgethegilego. Lega go le bjalo, nakong yeo ke be ke sa bone bohlokwa bja go fetoša bophelo bja-ka ka tsela le ge e le efe”

[Ntlhakgolo go letlakala 29]

“Ke ile ka palelwa ke go kgaotša go kgoga motšoko ka matla a-ka. Eupša ka thapelo e tšwago pelong le go ithekga ka Jehofa Modimo, ke ile ka kgaotša”

[Ntlhakgolo go letlakala 30]

“Nakong e fetilego, ke be ke lebelela Beibele e le feela puku ya melao. Ga bjale boemo bja-ka bja kgopolo bo fetogile. Ke ile ka thoma go lebelela batho bao go bolelwago ka bona ka Beibeleng e le batho ba kgonthe bao ba bego ba e-na le maikwelo le mafokodi go fo swana le nna”