Batamela Kgaufsi le Modimo

Jehofa o re Nea Kgetho

Doiteronomio 30:11-20

“GANTŠI ke be ke e-ba le poifo e sa kwagalego ya gore nka se botegele Jehofa.” Mantšu ao a boletšwe ke mosadi yo mongwe wa Mokriste yoo a bego a bona eka dilo tšeo a di dirilego e sa le ngwana di be di tla dira gore a dule a palelwa bophelong. Na ruri go bjalo? Na ruri re bahlaselwa ba hlokago kholofelo ba maemo? Aowa. Jehofa Modimo o re file tokologo ya boikgethelo, ka gona re ka itirela dikgetho tša kamoo re tlago go phela ka gona. Jehofa o nyaka gore re dire diphetho tše nepagetšego gomme Lentšu la gagwe, Beibele, le re botša kamoo re ka dirago seo ka gona. Ela hloko mantšu a Moše ao a hwetšwago go Doiteronomio kgaolo 30.

Na go thata go tseba seo Modimo a se nyakago go rena le go se dira? * Moše o re: “Taêlô yé ke Xo laêlaxo yôna lehono xa e Xo šite, xa e kxolê le wêna.” (Temana 11) Jehofa ga a nyake seo re ka se kgonego go se dira. Melao ya gagwe ke e kwagalago le e fihlelelegago. Gape go a kgonega gore re e tsebe. Ga go nyakege gore re rotogele “lexodimong” goba go selela “mošola wa lewatlê” e le gore re ithute seo Modimo a se nyakago go rena. (Temana 12, 13) Beibele e re botša thwii gore re swanetše go phela bjang.—Mika 6:8.

Lega go le bjalo, Jehofa ga a re gapeletše go mo kwa. Moše o re: “Lehono fá pele xa xaxo ke beile bophelô le tše botse, le lehu le tše mpe.” (Temana 15) Re lokologile go kgetha magareng ga bophelo le lehu gotee le botse le bobe. Re ka kgetha go rapela le go kwa Modimo re e-na le tebelelo ya ditšhegofatšo goba ra kgetha go se mo kwe gomme ra ba le ditla-morago tše sa kgahlišego. Go sa šetšwe gore re kgetha eng, kgetho ke ya rena.—Temana 16-18; Bagalatia 6:7, 8.

Na Jehofa o na le taba gore re kgetha eng? Ee, go bjalo! Moše o boletše a buduletšwe ke Modimo gore: “Ikxetheleng bophelô.” (Temana 19) Lega go le bjalo, re kgetha bophelo bjang? Moše o hlalositše gore: “Lè le ba ba rataxo Morêna Modimo wa lena, Lè e-kwa se a se bolêlaxo, Lè mo xomaretše.” (Temana 20) Ge e ba re rata Jehofa, re tla nyaka go mo kwa le go mo kgomarela ka potego, go sa šetšwe seo se ka diregago. Ka tsela yeo, re kgetha bophelo—tsela e kaone-kaone ya bophelo gona bjale ka tebelelo ya bophelo bjo bo sa felego lefaseng le lefsa leo le tlago la Modimo.—2 Petro 3:11-13; 1 Johane 5:3.

Mantšu a Moše a ruta therešo yeo e kgothatšago. Go sa šetšwe seo o ilego wa se dira mo lefaseng le kgopo, ga o mohlaselwa yo a se nago kholofelo; le gona o ka se dule o palelwa. Jehofa o go file seriti ka go go nea tokologo ya boikgethelo. Ee, o ka kgetha go rata Jehofa, go mo kwa le go dula o mmotegela. Ge e ba o dira kgetho e bjalo, Jehofa o tla šegofatša maiteko a gago.

Therešo ye—ya gore re lokologile go itirela kgetho ya go rata le go hlankela Jehofa—e homoditše mosadi yo a tsopotšwego mathomong a sehlogo se. O re: “Ke rata Jehofa. Ka dinako tše dingwe, ke be ke lebala gore se bohlokwa kudu ke taba ya gore ke rata Jehofa. Ka gona nka kgona go botega.” Ka thušo ya Jehofa, le wena o ka kgona.

[Mongwalo wa tlase]