Na o be o Tseba?

Ke ka baka la’ng Beibele e tswalanya borapedi bja modimo wa maaka Baali le menyanya e gobogilego ya thobalano?

Modingwana wa Bakanana e lego Baali, ge e le gabotse e be e le modingwana wa go nontšha. Barapedi ba wona ba be ba dumela gore Baali o be a ikarabela bakeng sa tšweletšo mašemong a bona le diruiweng tša bona. Ka baka leo, go ya ka puku ya Manners and Customs in the Bible, “thobalano mafelong a borapedi a tikologong yeo e be e hlametšwe go kgothaletša go nontšhwa ga naga ka go dira gore modingwana wa ledimo e lego Baali le mogwera wa wona Asherah ba robalane, gomme se se bake puno le mehlape e mentši.”

Bakanana ba be ba dumela gore Baali o theogela ka tlase ga lefase sehleng seo dipula di sa nego ka ge a fentšwe ke Mot, e lego modingwana wa komelelo le lehu. Lega go le bjalo, go be go dumelwa gore mathomo a dipula a be a swaya go boela ga Baali maatleng a pušo gomme seo se latelwa ke motlalo wa dimela le bophelo. Bakanana ba be ba keteka sehla se ka menyanya e hlokago taolo. Se se bontšha lebaka leo ka lona go latela ga Baisiraele Baali wa Peoro go ilego gwa feleletša ka gore ba dire “boôtswa le basadi ba Moaba.”—Numeri 25:1-3.

Jesu o be a bolela’ng ge a be a re bamangwalo le Bafarisei ba swana le “mabitla a takilwego”?

Jesu o ile a sola bamangwalo le Bafarisei ka gore ke baikaketši gomme a ba botša gore: “Le swana le mabitla a takilwego, ao ka ntle a bonagalago a le botse eupša ka gare a tletše marapo a bahu le mehuta ka moka ya go se hlweke.” (Mateo 23:27) Bajuda ba be ba tlwaetše go dira gore mabitla a bonagale gabonolo ka go a taka goba go a penta ka kalaka, bofelong bja sehla sa dipula ka letšatši la bo-15 la kgwedi ya Adara, e lego kgwedi pele ga Paseka. Ge e le gabotse, dipula di be di tloša bošweu.

Go ya ka The Jewish Encyclopedia, go swawa ga mabitla go be go dirwa bakeng sa go šireletša “barapedi ba bantši bao ba bego ba phatša mebila nakong ya monyanya wa Paseka” gore ba se šilafale. Molao woo o lego go Numeri 19:16 o bolela gore motho le ge e le ofe yo a bego a ka kgoma setopo, lerapo la motho goba lebitla o be a tla šilafala matšatši a šupago. Go ba yo a sa hlwekago ka mokgwa wa borapedi go be go thibela Baisiraele go kgatha tema ditirong tša borapedi bjo bo sekilego, ba e-kwa bohloko ka baka la lehu la yo mongwe. (Lefitiko 15:31) Jesu o ile a bolela ka seswantšho se matšatši pele ga Paseka, ka baka leo, tiragalo ya ngwaga le ngwaga ya go taka mabitla e be e tla be e le dikgopolong tša batheetši ba gagwe. Jesu o be a bolela gore baganetši ba gagwe ba bodumedi e be e se seo ba bonagalago ba le sona le gore go ikgokaganya le bona go be go ka šilafatša motho moyeng.

[Seswantšho go letlakala 15]

Letlapa la motaga la Baali-wa-legadima, lekgolo la bo-14 goba la bo-13 la nywaga B.C.E.

[Mothopo]

Musée du Louvre, Paris