KA December 2009 le ka January 2010, dikgorokgolo tše pedi tša tsheko kua Russia di ile tša tsebatša phatlalatša gore tumelo ya bodumedi bja Dihlatse tša Jehofa e kotsi kudu. Go bonagala histori e be e ipoeletša. Ge Masoviet a be a buša Russia, diketekete tša Dihlatse di ile tša pharwa ka molato wa maaka wa gore e be e le manaba a mmušo. Di ile tša rakwa, tša romelwa dikgolegong le go išwa dikampeng tša mošomo wa kgapeletšo. Ka morago ga gore mmušo woo o phuhlame, Dihlatse tša Jehofa di ile tša lokollwa melatong yeo di bego di pharilwe ka yona. Mmušo o mofsa o ile wa tsošološa leina la tšona le lebotse ka molao. * Gona bjale, batho ba bangwe ba sa dutše ba bonagala ba ikemišeditše go senya Dihlatse leina.

Mathomong a ngwaga wa 2009, balaodi ba mmušo ba ile ba hlasela tokologo ya bodumedi ya Dihlatse tša Jehofa. Ka February feela, basekiši ba ile ba dira dinyakišišo tša ka godimo ga tše 500 nageng ka moka. Morero wa lesolo le e be e le ofe? E be e le go kgonthišetša seo go bego go thwe ke go tshela molao ga Dihlatse. Dikgweding tšeo di latetšego, maphodisa a ile a hlasela diboka tša bodumedi tša khutšo tšeo di bego di swaretšwe Diholong tša Mmušo le magaeng a Dihlatse. A ile a thopa dipuku le dithoto tša tšona. Balaodi ba mmušo ba ile ba raka boramolao bao ba tšwago dinageng tše dingwe bao ba bego ba thuša go emelela Dihlatse gomme ba ba thibela gore ba se sa tsena nageng gape.

Ka October 5, 2009, bahlankedi ba lekgetho ba ile ba thibela  go romelwa ga dipuku tšeo di theilwego Beibeleng mollwaneng kgauswi le St. Petersburg. Dipuku tše di be di gatišitšwe Jeremane gomme di reretšwe gore di romelwe diphuthegong tše dintši tša Russia. Sehlopha se se kgethegilego sa baemedi ba balekgetho ba Russia bao ba šomago ka phahlo e kotsi yeo e tsenago ka nageng ba ile ba hlahloba dilo tšeo di romelwago. Ka baka la’ng? Dipampiri tša molao di be di re dilo tšeo di romelwago “di ka ba le ditaba tšeo morero wa tšona e lego go tsoša diphapang tša bodumedi.”

Go se go ye kae tlaišo ye e ile ya ba e šoro le go feta. Dikgorokgolo tša Tsheko tša Russian Federation le tša Repabliki ya Altay (karolo ya Russia) di ile tša bolela phatlalatša gore dipuku tše dintši tšeo di dirišwago ke Dihlatse, go akaretša makasine wo o o balago gona bjale, di kotsi kudu. Dihlatse tša Jehofa di ile tša dira boipiletšo bja molao gomme dinaga tša ka ntle di ile tša bontšha gore di tshwenyegile—eupša ga se gwa ka gwa fetoga selo! Morago bjale diphetho tša dikgoro tša tsheko di eme di tiile gomme di dira gore go romelwa goba go abja ga dipuku tšeo di theilwego Beibeleng go se be molaong kua Russia.

Dihlatse di be di tla arabela bjang boitekong bjo bja go di senya leina le go thibela modiro wa tšona? Le gona diphetho tša Dikgoro tša Tsheko di bontšha’ng ka tokologo ya bodumedi ya badudi ba Russia ka moka?

Ka Labohlano, February 26, 2010, Dihlatse tša Jehofa tšeo e ka bago tše 160 000 tša Russia ka moka di ile tša thoma go aba dikopi tše dimilione tše 12 tša pampišana e kgethegilego e nago le sehlogo se se rego Could It Happen Again? A Question for the Citizens of Russia. Ka mohlala, motseng wa kua Siberia wa Usol’ye-Sibirskoye, Dihlatse tše makgolo di ile tša kgobokana ditarateng ka 5:30 mesong. Gare ga tšona go be go na le tšeo di ilego tša hudušetšwa Siberia ka 1951 ka baka la tumelo ya tšona. Di ile tša kgotlelela boemo bja leratadima bja di-digree Celsius tše -40 e le gore di abe dipampišana tšeo di bego di di swere tše 20 000.

E le gore di dire tsebišo ya lesolo la matšatši a mararo, Dihlatse tša Jehofa di ile tša swara lekgotla le boraditaba kua Moscow, motsemošate wa Russia. Gare ga bao ba bego ba kgopetšwe gore ba bolele, go be go na le Mna. Lev Levinson, e lego setsebi seo se tšwago go Mokgatlo wa Ditshwanelo tša Batho. O ile a laodiša ka boripana ka tshwarompe le tlaišo tše di se nago tlhaologanyo tšeo Dihlatse tša Jehofa di ilego tša lebeletšana le tšona kua Jeremane ya Nazi le Soviet Union, a ba a bolela le ka go lokollwa ka molao mo go latetšego ga Dihlatse. O ile a ba a re: “Mopresidente Yeltsin o ile a laela gore dihlopha ka moka tša bodumedi tšeo di ilego tša tlaišwa mehleng ya Soviet di  tsošološwe. Ge e le dilo ka moka tšeo di bego di di lobile di be di swanetše go ba di bušeditšwe go tšona. Dihlatse tša Jehofa di be di se na lefelo la tšona la bodumedi ka tlase ga Soviet Union, eupša di ile tša bušetšwa leina la tšona le lebotse.”

Leina leo le lebotse le kotsing gape. Mna. Levinson o ile a re: “Batho ba ba sa dutše ba tlaišetšwa lefeela nageng yona ye yeo e kilego ya re e a itshola.”

Na lesolo leo la go phatlalatša pampišana le ile la fihlelela morero wa lona? Mna. Levinson o itše: “Ge ke be ke le tseleng ya go ya lekgotleng la boraditaba ke ile ka bona batho ka ditimeleng ba dutše fase ba bala pampišana yeo Dihlatse tša Jehofa di e abago Russia lehono. . . . Batho ba dutše fase ba e bala e bile ba e bala ka kelohloko.” * Ka mohlala, ela hloko diphihlelo tše di latelago.

Mokgekolo yo a dulago seleteng seo se tletšego ka Mamoseleme sa bogareng bja Russia o ile a amogela pampišana gomme a botšiša gore e bolela ka eng. Ge a be a botšwa gore e bolela ka ditshwanelo le ditokologo tša batho ba Russia, o ile a re: “Go na le motho yoo mafelelong a lebišago tlhokomelo ditabeng tše! Ge e le gabotse, Russia e be e dutše e boela mehleng ya Soviet Union. Ke leboga kudu. Modiro wa lena e tloga e le o mobotse!”

Mosadi yo mongwe kua Chelyabinsk yo a ilego a newa pampišana o ile a re: “Ke šetše ke e hweditše gomme ke e badile. Ke tloga ke ema le lena. Ga go na bodumedi bjo ke bo tsebago bjo bo bego bo ka emela tumelo ya bjona ka tsela e rulagantšwego gabotse gakaakaa. Ke rata mokgwa wo le aparago ka wona, e bile le diriša temogo ka mehla. Go molaleng gore le na le kgodišego e tiilego ka ditumelo tša lena. Ke bona eka Modimo o na le lena.”

 Kua St. Petersburg, monna yo a ilego a re o šetše a hweditše pampišana o ile a botšišwa ge e ba a thabetše seo a se badilego. O ile a araba ka gore: “Ee. Ge ke be ke e bala ke ile ka thothomela ka ba ka lla. Makgolo o be a gateletšegile maikwelong [mehleng ya Soviet] gomme o ile a mpotša ditaba tše dintši ka batho bao ba bego ba golegilwe le yena. Go be go ena le ba bantši bao e bego e le dikebekwa e bile go be go na le bao ba bego ba se na molato eupša ba ile ba golegwa ka baka la tumelo ya bona. Ke nagana gore batho ka moka ba swanetše go tseba seo se ilego sa direga, ka gona seo le se dirago se nepagetše.”

Dihlatse tša Jehofa di be di dutše di thabela tokologo yeo di bilego le yona kua Russia nywagasomeng e mebedi e fetilego. Lega go le bjalo, di tseba gabotse kamoo go lego bonolo ka gona gore di amogwe tokologo yeo. Taba ya ge e ba tatofatšo yeo e lebišitšwego go tšona e šupa gore Russia e boela nakong ya leswiswi ya kgatelelo, e tla bonagala ge nako e dutše e eya.

Lega go le bjalo, Dihlatse tša Jehofa di tloga di ikemišeditše go tšwela pele ka modiro wa tšona wa go bolela molaetša wa Beibele wa khutšo le kholofelo go sa šetšwe seo se ka diregago. Pampišana e kgethegilego e akaretša boikemišetšo bja tšona, ka go re: “Kgatelelo le ka mohla e ka se ke ya atlega. Re ka se ke ra kgaotša go bolela ka temogo le ka tlhompho ka Jehofa Modimo le ka Lentšu la gagwe, e lego Beibele. (1 Petro 3:15) Ga se ra ka ra kgaotša ge re be re gateletšwe o šoro ke Jeremane ya Nazi, ga se ra ka ra kgaotša mehleng ya leswiswi le lesoleso la kgatelelo ya naga ya rena, e bile re ka se kgaotše le gona bjale.—Ditiro 4:18-20.”