Beibele e re: “Yo bohlale ke yo a bonego kotsi a ikuta, eupša ba se nago temogo ba fetile ba wela kotsing.” (Diema 22:3) Ye ke keletšo e bohlale e ka dirišwago dinakong tša dikotsi. Ke gabohlale go tšhabela lefelong le le šireletšegilego ge go newa temošo mabapi le go thuthupa ga thabamollo mo go tlago, kgonagalo ya mafula goba tlhaselo ya ledimo. Bophelo bo bohlokwa go feta ntlo goba dilo tše dingwe tše di bonagalago.

Ba bangwe ba ka kgona go kgetha go se dule lefelong leo le hlaselwago ke dikotsi gantši. Molaodi yo mongwe o re: “Kgonagalo ya dikotsi tša tlhago ke e kgolo kudu mafelong a itšego. Ke karolo e nyenyane kudu ya Lefase yeo e lego lefelong le kotsi gomme dikotsi tše dintši tše dikgolo tša nakong e tlago di tla direga mafelong ao.” Ka mohlala, se se ka direga mafelong a melala a mabopong goba mafelong a lego kgauswi le methaladi yeo e bakago tšhišinyego ya lefase. Ge o ka phema go dula mafelong a bjalo ao dikotsi di diregago gantši go ona goba wa hudugela lefelong le le šireletšegilego, o ka fokotša kudu kgonagalo ya go ka hlaselwa ke dikotsi.

Go sa šetšwe megato ka moka ya go itšhireletša yeo o e gatago, o ka ikhwetša o le mohlaselwa wa kotsi e sa lebelelwago. O ka lebeletšana le yona gabonolo ge e ba o ile wa rulaganya e sa le pele. Se se dumelelana gabotse le keletšo e lego go Diema 22:3, yeo e tsopotšwego pejana. Na o lokišeleditše mokotla wa boemo bja tša tšhoganetšo wo o tla o tšeago ge kotsi e fihla? Kgatišo ya 1-2-3 Disaster Education e kgothaletša go ba le dilo tše di latelago: Ditlabakelo tša thušo ya pele, meetse a lego ka mapotlelong, dijo tšeo di sa bolego le mangwalo a bohlokwa. E tla ba gabohlale go ikgopotša le lapa la gago mehuta ya dikotsi tšeo di ka diregago le gore ke eng seo se ka dirwago kotsing e nngwe le e nngwe.

Se se ka thuša boemong le ge e le bofe. Beibele e bolela ka Modimo e le “Tate wa dikgaugelo le Modimo wa khomotšo yohle, yo a re homotšago ditlaišegong tša rena tšohle.” Temana e nngwe e mo hlalosa e le Modimo “yo a homotšago bao ba nyamilego.”—2 Bakorinthe 1:3, 4; 7:6.

Ee, Modimo o tloga a lemoga maemo ao a welago bao ba bontšhago tumelo go yena. Ke Modimo yo lerato e bile o nea kgothatšo ka ditsela tše di sa swanego. (1 Johane 4:8) Go rapelela moya o matla o mokgethwa wa Modimo e sego mehlolo, go ka nea thušo boemong le ge e le bofe. Moya o mokgethwa o ka gopotša bao ba lebeletšanego le  matshwenyego ditemana tša Beibele tšeo di ka ba homotšago le go ba thoba. Ruri bahlanka ba botegago ba Modimo ba tla ikwa go swana le Dafida, kgoši ya Isiraele ya bogologolo, yo a itšego: “Gaešita le ge ke sepela moeding wa kgampi ya leswiswi, ga ke boife selo se sebe, gobane wena o na le nna; molamo wa gago le lehlotlo la gago ke dilo tšeo di nkhomotšago.”—Psalme 23:4.

Lekgolong la pele la nywaga, moporofeta wa Mokriste yo a bitšwago Agabuse o ile a bontšha gore “tlala e kgolo e tla tloga e wela lefase ka moka; e lego yeo ruri e ilego ya ba gona mehleng ya Kelaudio.” Tlala e ile ya kgoma kudu bontši bja barutiwa ba Jesu kua Judea. Ke’ng seo se ilego sa dirwa ke barutiwa ba mafelong a mangwe ge ba ekwa ka tlalelo ya Bakristegotee le bona? Pego e re: “Barutiwa ba ikemišetša go romela tirelo ya thušo go bana babo bona bao ba dulago Judea, yo mongwe le yo mongwe wa bona go ya kamoo a bego a ka kgona ka gona.” (Ditiro 11:28, 29) Ka lerato ba ile ba arabela ka gore ba romele ditlabakelo tša tlhakodišo.

Bahlanka ba Modimo ba arabela ka tsela e swanago lehono ge masetlapelo a direga. Dihlatse tša Jehofa di tsebja kudu ka go thuša badumedigotee le tšona. Ka mohlala, ge tšhišinyego e matla ya lefase e be e hlasela Chile ka February 27, 2010, Dihlatse tša Jehofa di ile tša arabela ka go akgofa go thušeng bao ba hlasetšwego. Karla, yoo legae la gagwe le ilego la gogolwa ke tsunami, o anegile ka gore: “E bile mo go homotšago le mo go kgothatšago go bona ge ka letšatši le le latelago [Dihlatsegotee] di goroga di etšwa mafelong a mangwe go tlo re thuša. Ga go pelaelo gore Jehofa o be a re homotša ka ditiro tše dibotse tša baithaopi bao. Ke ile ka ikwa ke ratwa e bile ke šireletšegile.” Rakgolo’agwe, yo e sego Hlatse, o ile a bona thušo yeo e bego e newa. O itše: “Se se tloga se fapane kudu le seo ke se bonego kerekeng ya ka ka nywaga e mentši.” Seo a se bonego se ile sa mo tutueletša go kgopela Dihlatse tša Jehofa go ithuta Beibele le yena.

Go kopanela le bao ba ratago Modimo e ka ba thušo e kgolo dinakong tša tlalelo. Lega go le bjalo, na go tla ka gwa ba le nako yeo ka yona dikotsi di ka se sa hlwago di eba gona lefaseng? Anke re boneng seo se bolelwago ke Beibele ka taba ye.