Ke belegetšwe Moundsville, motse o homotšego wo o bapilego le Noka ya Ohio ka leboa la Virginia Bodikela, U.S.A. Ke be ke le ngwana wa bobedi baneng ba bane, bao ba bararo ba bona e bego e le bašemane, ka gona go be go dula go le bose ka gae. Batswadi ba ka e be e le batho ba šomago ka thata le ba botegago bao ba ratago batho. Ga se ra ka ra ba le tšhelete e ntši, eupša re be re dula re ena le seo se nyakegago. Ka ge e le Dihlatse tša Jehofa, batswadi ba ka ba ile ba dira seo ba ka se kgonago go re ruta melao ya motheo ya Beibele ge re be re sa le ba banyenyane.

Lega go le bjalo, ge ke fihla nywageng ya mahlalagading, pelo ya ka e be e šetše e thomile go aroga go seo ke bego ke se rutilwe. Ke be ke belaela gore bophelo bja go hlahlwa ke melao ya motheo ya Beibele bo be bo ka ba le morero goba ya ba bjo bo kgotsofatšago. Ke ile ka nagana gore motho a ka thaba e le ka kgonthe ge feela a lokologile ka mo go feletšego. Go se go ye kae, ke ile ka kgaotša go ya dibokeng tša Bokriste. Ba babedi ba baratho ba ka ba ile ba ntlatša borabeleng bjoo. Batswadi ba rena ba ile ba dira sohle seo ba ka se kgonago go leka go re thuša, eupša re ile ra gana thušo ya bona.

Ke be ke sa lemoge gore kganyogo ya ka ya go ba le seo ke bego ke re ke tokologo e be e tla ntira gore ke lemalele dilo tše itšego. Letšatšing le lengwe ge ke be ke eya gae ke etšwa sekolong, mogwera yo mongwe wa ka o ile a mpha sekerete. Ke ile ka se amogela. Go tloga letšatšing leo go ya pele, ke ile ka amogela mekgwa e mengwe e mentši e gobatšago. Ge nako e dutše e eya, ke be ke diriša dihlaretagi le bjala gampe, e bile ke phela bophelo bjo bo gobogilego. Nywageng e mmalwa e latetšego, ganyenyane-ganyenyane ke ile ka diriša dihlaretagi tše kotsi le go feta gomme ka fetoga lekgoba la tše dintši tša tšona. Ka ge ke ile ka nwelela ditemalelong tša ka, ke ile ka thoma go rekiša dihlaretagi e le gore ke thekge tsela ya ka ya bophelo.

Le ge ke be ke leka ka matla go hlokomologa letswalo la ka, le be le dula le nkgopotša gore tsela ya ka ya bophelo e be e fošagetše. Lega go le bjalo, ke be ke bona gore go be go šetše go senyegile gomme nka se kgone go boela morago. Go sa šetšwe gore ke be ke dikologwa ke batho meletlwaneng le dikhonsateng, gantši ke be ke ikwa ke lewa ke bodutu e bile ke gateletšegile. Ka dinako tše dingwe, ke be ke nagana kamoo batswadi ba ka e lego hlomphegago  le ba lokilego gomme ke ipotšiša gore ke ka baka la eng ke arogetše kgole ka tsela ye.

Gaešita le ge ke be ke itlhobogile, ba bangwe ba be ba se ba ntlhoboga. Ngwageng wa 2000, batswadi ba ka ba ile ba ntaletša gore ke ye kopanong ya selete ya Dihlatse tša Jehofa. Ke ile ka ya le bona ke sa rate. Seo se mmakaditšego ke gore le baratho ba ka ba babedi bao ba bego ba arogile le bona ba ile ba ya.

Ge re be re le kopanong, ke ile ka gopola gore ke be ke le khonsateng ya mmino wa rock lefelong lona leo ngwageng o fetilego. Phapano yeo ke e bonego e ile ya nkgoma ka garegare. Khonsateng yeo, lefelo leo le be le šilafetše e bile le tletše ka muši wa disekerete. Ba bantši bao ba bego ba tlile khonsateng ba be ba se na bogwera, e bile molaetša wa mmino woo o be o gateletša. Eupša moo kopanong, ke be ke dikologilwe ke batho bao ba thabilego e le ka kgonthe—batho bao ba nkamogetšego ka borutho, gaešita le ge ke be ke ena le nywaga e mentši ke sa ba bone. Lefelo leo le be le hlwekile gomme molaetša woo o bego o fetišwa o be o nea kholofelo. Go bona ditlamorago tše dibotse tša therešo ya Beibele go ile gwa dira gore ke ipotšiše gore ke ka baka la eng ke ile ka e gana!—Jesaya 48:17, 18.

Gateetee ka morago ga kopano yeo, ke ile ka dira phetho ya go boela phuthegong ya Bokriste. Baratho ba ka, bao le bona ba ilego ba kgongwa ke seo ba se bonego kopanong, ba ile ba dira phetho ya go boela ka phuthegong. Boraro bja rena re ile ra amogela thuto ya Beibele.

Temana ya Beibele yeo e ilego ya nkgoma ka mo go kgethegilego ke ya Jakobo 4:8, yeo e rego: “Batamelang Modimo gomme o tla le batamela.” Ke ile ka lemoga gore ke be ke swanetše go hlwekiša bophelo bja ka ge e ba ke be ke nyaka go batamela Modimo. Gare ga diphetogo tše dingwe, ke ile ka swanelwa ke go tlogela motšoko le go kgaotša go diriša dihlaretagi le bjala gampe.—2 Bakorinthe 7:1.

Ke ile ka tlogela bagwera ba ka ba kgale gomme ka hwetša bagwera ba bangwe gare ga barapedi ba Jehofa. Mogolo wa Mokriste yoo a ithutilego Beibele le nna o ile a nthuša kudu. O be a dula a nteletša mogala le go nketela go bona gore ke tsoga bjang. Go fihla le lehono, ke yo mongwe wa bagwera ba ka ba paale.

Seruthwaneng sa 2001, ke ile ka bonagatša boineelo bja ka go Modimo ka go kolobetšwa meetseng, bjalo ka ge baratho ba ka ba dirile. O ka akanya ka lethabo leo batswadi ba ka le moratho wa ka yo monyenyane yo a botegago ba bilego le lona ge lapa la gabo rena mafelelong le be le rapela Jehofa ka botee.

Ke be ke fela ke nagana gore melao ya motheo ya Beibele ke e thibelago kudu, eupša ga bjale ke e tšea e le tšhireletšo e bohlokwa. Beibele e mphile matla a go kgaotša go diriša le go rekiša dihlaretagi le gore ke be setho seo se nago le mohola sa setšhaba.

Ke na le tokelo ya go ba karolo ya borwarre bja lefase ka bophara bja barapedi ba Jehofa. Batho ba ba ratana e le ka kgonthe, e bile ba hlankela Modimo ka botee. (Johane 13:34, 35) Borwarreng bjoo ke hweditše tšhegofatšo e kgethegilego kudu—mosadi wa ka, Adrianne, yoo ke mo ratago kudu e bile ke mo tšeelago godimo. Re thabišwa kudu ke gore re hlankela Mmopi wa rena mmogo.

Go e na le go phegelela tsela ya bophelo ya boithati, ga bjale ke ithaopetše go hlankela bjalo ka modiredi wa nako e tletšego, gomme ke ruta batho kamoo le bona ba ka holwago ke Lentšu la Modimo. Modiro wo o ntlišeditše lethabo le legologolo. Nka bolela ka kgodišego e kgolo kudu gore Beibele e fetotše bophelo bja ka. Mafelelong ke hweditše tokologo ya kgonthe.