Re swanetše go dira’ng gore re kgahle Modimo? Na go na le melao e mentši kudu yeo re swanetšego go e latela? Re leboga gore ga go bjalo. Go ya ka Morwa wa Modimo, Jesu Kriste, seo Modimo a nyakago gore re se dire se ka akaretšwa ka lentšu letee.—Bala Mareka 12:28-31.

Thoma ka go ela hloko boemo bjoo Jesu a boletšego mantšu ao a le go bjona. O be a ruta tempeleng ka Nisani 11, matšatši a sego kae pele ga lehu la gagwe. Manaba a gagwe a be a leka go mo tanya ka go mmotšiša dipotšišo tšeo di bakago ngangišano. Nako le nako, o be a ba tswalela melomo ka dikarabo tša gagwe. Ka morago, Jesu o ile a botšiša potšišo ye: “Taelo ya pele go ditaelo ka moka ke efe?”—Temana 28.

Yeo e be e le potšišo e thata. Bajuda ba bangwe ba be ba ngangišana ka taba ya gore ke molao ofe go melao e 600 yeo e bego e bopa Molao wa Moše wo e bego e le wa pele, goba wo o bego o le bohlokwa go feta e mengwe ka moka. Go bonagala ba bangwe ba be ba ngangišana ka gore melao ka moka e be e lekana ka go ba bohlokwa le gore e be e le phošo go tšeela melao e mengwe godimo go feta e mengwe. Jesu o be a tla araba potšišo yeo bjang?

Ge a araba, Jesu ga se a bolela taelo e tee eupša o boletše tše pedi. Sa pele, o itše: “O rate Jehofa Modimo wa gago ka pelo ya gago ka moka, ka moya wa gago ka moka, ka monagano wa gago ka moka le ka matla a gago ka moka.” (Temana 30; Doiteronomio 6:5) Mantšu “pelo,” “monagano,” “moya” le “matla” a ka sepedišana ka seo a se bolelago. * Tlhaloso ke gore: Go rata Jehofa go swanetše go akaretša motho yo a feletšego, bokgoni bja gagwe ka moka gotee le matla. Puku e nngwe ya ditšhupetšo tša Beibele e bea taba ye ka gore: “Motho o swanetše go rata Modimo ka mo go feletšego.” Ge e ba o rata Modimo ka tsela yeo, o tla dira sohle seo o ka se kgonago gore letšatši le letšatši o phele ka tsela yeo e dirago gore o amogelwe ke Modimo.—1 Johane 5:3.

Sa bobedi, Jesu o itše: “O rate moagišani wa gago ka mokgwa wo o ithatago ka wona.” (Temana 31; Lefitiko 19:18) Go rata Modimo le go rata moagišani go a sepedišana. Go rata moagišani go tlišwa ke go rata Modimo. (1 Johane 4:20, 21) Ge e ba re rata baagišani ba rena ka mokgwa woo re ithatago ka wona, re tla ba swara ka tsela yeo re nyakago gore ba re sware ka yona. (Mateo 7:12) Ka go re’alo, re bontšha gore re rata Modimo yo a dirilego rena—gotee le bona—ka seswantšho sa gagwe.—Genesi 1:26.

Ditaelo tša gore re rate Modimo le moagišani di bohlokwa gakaaka’ng? Jesu o itše: “Ga go na taelo e nngwe e fetago tše.” (Temana 31) Pegong e sepedišanago le ye, Jesu o itše ditaelo tše dingwe ka moka di ithekgile ka tše tše pedi.—Mateo 22:40.

Go thabiša Modimo ga go thata. Sohle seo a se nyakago go rena se ka akaretšwa ka lentšu letee: lerato. Seo e ile ya dula e le—e bile e tla dula e le—seka seo se hlaolago borapedi bja therešo. Eupša lerato ga le bontšhwe feela ka mantšu goba maikwelo; le bontšhwa ka ditiro. (1 Johane 3:18) O re’ng o sa ithute kamoo o ka hlagolelago le go bontšha gore o rata Jehofa, Modimo yoo e lego “lerato”?—1 Johane 4:8.