Ge Modimo a be a bopa batho, o be a rerile gore ba phele ka mo go sa felego mo lefaseng ntle le gore le ka mohla ba tlaišwe ke bolwetši goba lehu. Lega go le bjalo, motho wa pele e lego Adama, o ile a se kwe Mmopi gomme a lahlegelwa ke tebelelo ya go phela ka mo go sa felego. Ka ge re le ditlogolo tša Adama, re abetše lehu go yena. (Baroma 5:8, 12; 6:23) Modimo wa therešo e lego Jehofa, o ile a romela Morwa wa gagwe, Jesu, lefaseng go tlo re hwela le go lopolla seo se lahlegetšego Adama.—Bala Johane 3:16.

Lehu la Jesu le dira gore re kgone go lebalelwa dibe le go phela ka mo go sa felego. Beibele e re nea seswantšhokgopolo sa kamoo bophelo bo tlago go ba ka gona lefaseng ge re se sa hlwa re tlaišwa ke botšofadi, bolwetši le lehu.—Bala Jesaya 25:8; 33:24; Kutollo 21:4, 5.

Mantšiboeng a pele ga ge Jesu a ka hwa, o ile a botša balatedi ba gagwe gore ba gopole lehu la gagwe ka go dira monyanya o bonolo. Go gopola lehu la Jesu ka tsela yeo ngwaga le ngwaga go re dira gore re naganišiše ka tsela yeo Jesu le Jehofa ba ratago batho ka gona.—Bala Luka 22:19, 20; 1 Johane 4:9, 10.

Lenyaga, Segopotšo sa lehu la Jesu se ka Mošupologo April 14, ka morago ga ge letšatši le sobetše. O laletšwa gore o be gona tiragalong ye le Dihlatse tša Jehofa lefelong la geno.—Bala Baroma 1:11, 12.