Bana ba gago ba ka ithuta go rata Modimo ge feela ba bona bohlatse bja gore o gona le gore o a ba rata. E le gore ba rate Modimo, ba swanetše go mo tseba. (1 Johane 4:8) Ka mohlala, ba swanetše go tseba gore: Morero wa Modimo ge a be a bopa batho e be e le ofe? Ke ka baka la’ng Modimo a dumelela tlaišego? Modimo o tla direla batho eng nakong e tlago?—Bala Bafilipi 1:9.

E le gore o thuše bana ba gago go rata Modimo, o swanetše go ba bontšha gore le wena o a mo rata. Ge ba bona seo, ba ka latela mohlala wa gago.—Bala Doiteronomio 6:5-7; Diema 22:6.

Lentšu la Modimo ke le matla. (Baheberu 4:12) Ka gona thuša bana ba gago go ithuta dithuto tša motheo tša lona. Jesu o be a botšiša batho dipotšišo, a ba theetša, le go ba hlalosetša Mangwalo gore a fihlelele dipelo tša bona. E le gore o fihlelele bana ba gago pelong, o ka ekiša ditsela tša Jesu tša go ruta.—Bala Luka 24:15-19, 27, 32.

Go oketša moo, dipego tša Beibele tša kamoo Modimo a ilego a dirišana le batho di ka thuša bana go tseba Modimo le go mo rata. Dikgatišo tšeo di rulagantšwego bakeng sa morero wo di hwetšagala go www.mr1310.com/nso.—Bala 2 Timotheo 3:16.