Go sa šetšwe gore o šoma kudu ka monagano, ka diatla, goba o šoma ka tšona ka bobedi, lemoga gore “boitapišo bja mohuta le ge e le ofe bo a hola.” (Diema 14:23) Bo hola bjang? Ka mohlala, go šoma ka thata go re thuša gore re hlokomele dinyakwa tša rena tša dilo tše di bonagalago. Ke therešo gore Modimo o holofetša gore o tla nea bao ba mo rapelago ka potego dinyakwa tša bona. (Mateo 6:31, 32) Eupša le yena o letetše gore re kgathe tema ya rena ka gore re leke ka mafolofolo go hwetša ka potego tšhelete ya go iphediša.—2 Bathesalonika 3:10.

Ka gona, re ka lebelela mošomo e le tsela ya go fihlelela pakane e itšego. Mošomo ke tsela e hlomphegago ya go hlokomela boikarabelo bja rena. Joshua wa nywaga e 25 o re: “Go itlhokomela ke selo se segolo. Ge e ba o kgona go lefelela seo o se nyakago, gona mošomo wa gago o phetha morero wa wona.”

Go feta moo, go šoma ka thata go dira gore re be le boitlhompho. Go ba gona, go šoma ka thata e fo ba sona seo—go thata. Ge e ba re itaya gore re kgomarele mošomo wa rena—gaešita le ge o bonagala o lapiša goba o le thata—re ka kgotsofatšwa ke go tseba gore re dira se se swanetšego. Re fentše ntwa ya tshekamelo ya go phema go šoma ka thata. (Diema 26:14) Ka go re’alo, mošomo o dira gore motho a kgotsofale ka mo go tseneletšego. Aaron, yo a tsopotšwego sehlogong se se fetilego, o re: “Ke rata tsela yeo ke ikwago ka yona ka morago ga go fetša letšatši ka moka ke šoma. Nka ba ke lapile—le ba bangwe ba ka ba ba se ba šetša mošomo wa ka—eupša ke a tseba gore ke dirile se sengwe.”

Beibele e bolela ka tsela ya go reta monna yo a “kgonago mošomo wa gagwe” le mosadi yo a “[dirago] mošomo le ge e le ofe wo diatla tša gagwe di thabelago go o dira.” (Diema 22:29; 31:13) Ke therešo gore motho ga a fo ba le bokgoni ka go itiragalela feela. Le gona ke ba sego kae ba rena bao ba thabelago go dira dilo tšeo re sa di kgonego. Mohlomongwe ke lona lebaka leo ka lona ba bantši ba sa thabelego mošomo wa bona; ba fo ba ba sa dire boiteko bjo bo lekanego bja go ithuta gore ba o kgone.

Ge e le gabotse, motho a ka ithuta go thabela mo e nyakilego go ba mošomo wa mohuta le ge e le ofe ge e ba a na le pono e botse ka wona—ke gore, ge e ba a šetša go ithuta kamoo a ka dirago mošomo wa gagwe gabotse. William wa nywaga e 24 o re: “Ge e ba o itapiša ka gohle mošomong wa gago gomme o bona dienywa tša wona, seo se kgotsofatša kudu. O ka se ikwe ka tsela yeo ge e ba o kgaoletša goba o šoma ganyenyane feela.”

Phema molaba wa go dulela go nagana feela ka gore o gola bokae. Go e na le moo, ipotšiše dipotšišo tše di swanago le tše: ‘Ke ka baka la’ng mošomo wo o nyakega? Go be go tla direga’ng ge e ba o be o sa dirwe—goba o sa dirwe gabotse? Mošomo wa ka o hola ba bangwe bjang?’

Ke mo go botse gore o naganišiše kudu ka potšišo yeo ya mafelelo, ka gobane mošomo o kgotsofatša kudu ge re bona kamoo o holago batho ba bangwe. Jesu ka boyena o itše: “Go na le lethabo le legolo go neeng go feta go amogeleng.” (Ditiro 20:35) Go oketša go bao ba holwago ke ditirelo tša rena ka go lebanya—ba bjalo ka bareki le bathwadi—go na le ba bangwe bao ba holwago ke go šoma ga rena ka thata. Bona ba akaretša ditho tša malapa a rena le bahloki.

Ditho tša malapa a rena. Ge hlogo ya lapa e šoma ka thata go hlokomela ditho tša lapa la yona, e di hola bonyenyane ka ditsela tše pedi. Ya pele, e kgonthišetša gore di na le dinyakwa tša nama tša bophelo, e lego dijo, diaparo le madulo. Ka go re’alo e phethagatša boikarabelo bja yona bjo e bo neilwego ke Modimo bja go ‘babalela bao e lego ba gabo yona.’ (1 Timotheo 5:8) Ya bobedi, motho yo a fepago ba lapa ka mafolofolo o ruta ka mohlala bohlokwa bja go šoma ka thata. Shane, yo a tsopotšwego sehlogong se se fetilego, o re: “Tate ke mohlala o mobotse wa motho yo a nago mekgwa e mebotse ya go šoma gabotse. Ke monna yo a botegago yo a šomilego ka thata bophelo bja gagwe ka moka, nako e ntši a šoma e le mmetli. Mohlaleng wa gagwe ke ithutile bohlokwa bja go šoma ka diatla tša gago, o aga dilo tšeo di tlago go hola ba bangwe.”

Bahloki. Moapostola Paulo o ile a eletša Bakriste gore ba “šome ka thata, . . . gore [ba] be le seo [ba] ka se abelago yo mongwe yo a hlokago.” (Baefeso 4:28) Ruri ge re šoma ka thata go itlhokomela le go hlokomela ba malapa a rena, le rena re ka ba boemong bjo bobotse bja go thuša bao ba nyakago thušo. (Diema 3:27) Ka gona go šoma ka thata go dira gore re be le lethabo le legolwanyane la go nea.

Thutong ya gagwe e tumilego ya Thabeng, Jesu o itše: “Ge yo mongwe yo a nago le matla a go gapeletša go dira tirelo monabo wa khilomithara, eya le yena dikhilomithara tše pedi.” (Mateo 5:41) O ka diriša bjang molao wa motheo wo o lego mantšung ao mošomong wa gago? Go e na le gore o dire mo gonyenyane, tsoma ditsela tša go dira mo gontši go feta kamoo go nyakegago. Ipeele dipakane; iteke gore o dire mošomo wa gago gakaone goba kapejana go feta ka mo go letetšwego. Ikgantšhe le ka dikarolo tše dinyenyane tša mošomo wa gago.

Ge o dira go feta seo se kgopelwago, go ka direga gore o thabele mošomo wa gago. Ka baka la’ng? Ka gobane o laola ditiro tša gago. O dira mo go oketšegilego ka gobane o nyaka go dira bjalo, e sego ka gobane o gapeletšwa ke motho yo mongwe go dira bjalo. (Filemone 14) Tabeng ye, re ka gopola molao wa motheo wo o ngwadilwego go Diema 12:24, o rego: “Seatla sa diroto ke sona se tlago go buša, eupša seatla se se tšwafago se tla wela bokgobeng.” Ke therešo gore ke ba sego kae ba rena bao ba ka bago bokgobeng bja kgonthe. Lega go le bjalo, motho yo a dirago bonyenyane feela a ka nagana gore o dirilwe lekgoba, a ikwa ka mehla a swanetše go phetha tšeo ba bangwe ba di nyakago. Eupša motho yo a dirago go feta seo se kgopelwago—yo a dirago mo gontši ka gobane a kgetha go dira bjalo—o ikwa a laola bophelo bja gagwe. O dula a laola ditiro tša gagwe.

Go šoma ka thata go swanetše go tšeelwa godimo, fela re dira gabotse ge re gopola gore go na le dilo tše dintši bophelong go feta go šoma. Ke therešo gore Beibele e kgothaletša boroto. (Diema 13:4) Eupša ga e kgothaletše go lemalela mošomo. Mmoledi 4:6 e re: “Seatla se se tletšego khutšo se phala diatla tše pedi tše di tletšego boitapišo gotee le go kitimiša phefo.” Se se ra go re’ng? Se ra gore motho yo a lemaletšego mošomo a ka no se thabele moputso wa mošomo wa gagwe ge e ba boitapišo bja gagwe bo mo jela nako ka moka gotee le matla. Ge e le gabotse, mošomo wa gagwe o hloka mohola moo o swanago le “go kitimiša phefo.”

Beibele e ka re thuša go hlagolela pono e lekalekanego ka mošomo. Gaešita le ge e re re swanetše go šoma ka thata mošomong, e bile e re eletša gore re “kgonthišetše dilo tše bohlokwa kudu.” (Bafilipi 1:10) Dilo tše bohlokwa kudu ke dife? Tšona di akaretša go fetša nako o na le ba lapa le bagwera. Dilo tše bohlokwa kudu le go feta ke go swarega ka dilo tša moya, bjalo ka go bala Lentšu la Modimo le go naganišiša ka lona.

Bao ba bolokago bophelo bja bona bo lekalekane ba ka thabela mošomo wa bona le go feta. William, yo a tsopotšwego pejana, o re: “Yo mongwe wa batho bao nkilego ka ba šomela ke mohlala o mobotse kudu tabeng ya go ba le mekgwa e lekalekanego e mebotse ya go šoma. O šoma ka thata gomme o dirišana gabotse le bao a ba šomelago ka baka la mošomo wa gagwe wa maemo a godimo. Eupša ge le sobela, ge mošomo o phethilwe, o tseba tsela ya go šia mošomo mošomong gomme a lebiša tlhokomelo lapeng la gagwe le borapeding bja gagwe. Le gona na o a tseba gore ke’ng? Ke yo mongwe wa batho bao ba thabilego kudu bao ke ba tsebago!”