Paul, e lego monna yo a nyetšego le tatago bana ba babedi, o laodiša ka gore: “Ka morago ga gore naga ya gabo rena e hlaselwe ke go hlatloga ga ditheko ka tsela e sa laolegego, dijo di be di tura e bile di sa hwetšagale gabonolo. Re be re ema diiri tše dintši methalading, eupša gantši dijo di be di fela le pele ga ge re ka di hwetša. Batho ba be ba otišwa ke tlala kudu gomme ba bangwe ba idibala ditarateng. Dinyakwa tša motheo di ile tša thoma go bitša dimilione gomme tša hlatlogela go dibilione. Mafelelong, tšhelete ya nageng ya gabo rena e ile ya felelwa ke matla. Ke lobile akhaonto ya ka ya panka, tšhelete yeo ke bego ke e lefelela inšuranseng le yeo motho a e hwetšago ge a rola modiro.”

Paul o ile a lemoga gore e le gore lapa la gagwe le tšwele pele le phela, o be a swanetše go ba “bohlale.” (Diema 3:21) O hlalosa gore: “Ke be ke na le khamphani ya go tsenya mohlagase, eupša ke ile ka thoma go šoma mošomo o mongwe le o mongwe woo o hwetšagalago gomme ke hwetša mogolo o monyenyane kudu. Ba bangwe ba be ba ntefa ka dijo goba ka dithoto tša ka ntlong. Ge ba be ba ntefa ka disepe tše nne, ke be ke šomiša tše pedi gomme ke rekiša tše dingwe. Mafelelong ke ile ka hwetša matswiana a 40. Ge a gotše, ke ile ka a rekiša gomme ka reka a mangwe a 300. Ka morago, ke ile ka ananya dikgogo tše 50 ka masaka a mabedi a bupi bja dikhilograma tše 50. Ka bupi bjoo, ke ile ka kgona go fepa lapa la ka le malapa a mangwe ka nako e telele.”

Paul o be a bile a tseba gore selo se bohlokwa kudu seo motho yo mongwe le yo mongwe a ka se dirago ke go bota Modimo. Ge re dira seo Modimo a re laelago sona, o a re thuša. Ge Jesu a bolela ka go hwetša dinyakwa tša bophelo, o itše: “Le leseng go tshwenyega kudu, gobane . . . Tatago lena o tseba gore le nyaka dilo tše.”—Luka 12:29-31.

Ka manyami, Sathane, e lego lenaba le legolo la Modimo, o forile batho ba bantši ka go dira gore ba tshwenyege kudu ka dinyakwa tša bona tša motheo. Batho ba tshwenyegile kudu ka dinyakwa tša bona, tša kgonthe le tšeo ba di naganago, gomme ba tshwenyegile ka go katanela go hwetša dilo tšeo ge e le gabotse ba sa di nyakego. Ba bantši ba itsenya dikolotong gomme ba ithuta  gabohloko mantšu a rego: “Moadimi ke mohlanka wa moadimiši.”—Diema 22:7.

Batho ba bangwe ba dira diphetho tšeo di nago le mafelelo a gobatšago. Paul o laodiša gore: “Baagišani ba rena ba bantši ba ile ba tlogela malapa le bagwera ba bona e le gore ba inyakele ‘mafulo a matala’ ka go hudugela dinageng dišele. Ba bangwe ba sepetše ntle le go tlatša dipampiri tša bofaladi gomme ba ile ba palelwa ke go hwetša mešomo. Gantši ba be ba ikhwetša ba tšhaba maphodisa gomme ba robala ditarateng. Ga se ba ka ba nea Modimo sebaka sa gore a ba thuše. Eupša re ile ra ikemišetša go lebeletšana le mathata a ditšhelete re le lapa, re thušwa ke Modimo.”

Paul o tšwela pele ka gore: “Jesu o itše: ‘Le ka mohla le se ke la belaela ka letšatši le le latelago, gobane letšatši le le latelago le tla ba le dipelaelo tša lona. Letšatši le lengwe le le lengwe le lekanwe ke bošula bja lona.’ Ka gona letšatši le letšatši ke be ke fo rapela Modimo gore a re nee ‘dijo tša rena tša letšatši le’ gore re kgone go tšwela pele re phela. Le gona Modimo o ile a re thuša, go etša ge Jesu a holofeditše. Ga se ka mehla re bego re hwetša dilo tšeo re bego re di rata. Lebakeng le lengwe, ke be ke eme mothalading wa dijo ke sa tsebe seo se rekišwago. Ge ke fihla kua pele, ka hwetša gore e be e le yogurt. Ga ke rate yogurt, eupša ka ge e be e le tšona dijo, re ile ra nwa yogurt bošegong bjoo. Ke leboga Modimo gore nakong yeo ka moka, lapa la ka le ka mohla ga se la ka la lala ka tlala.” *

Paul o re: “Ga bjale dilo di re sepelela gabotse ditšheleteng. Eupša diphihlelong tša rena re ithutile gore selo se bohlokwahlokwa seo se re thušitšego go fenya dipelaelo ke go bota Modimo. Jehofa * o tla dula a re thuša ge feela re dula re nyaka go dira thato ya gagwe. Re bone go rereša ga mantšu a Psalme 34:8, a rego: ‘Latswang le be le boneng gore Jehofa o lokile; go thaba monna yo a tšhabelago go yena.’ Ka baka leo, ga re tšhabe go boela re lebeletšana le maemo a thata a boiphedišo.”

Paul o tšwela pele ka gore: “Bjale re kwešiša gabotse gore seo batho ba se nyakago gore ba tšwele pele ba phela, ga se mošomo goba tšhelete, eupša ke dijo. Re fagahletše nako yeo ka yona kholofetšo ya Modimo e tlago go phethagatšwa, yeo go yona a holofetšago gore: ‘Go tla ba le mabele a mantši mo lefaseng.’ Ge re sa dutše re letile seo, ‘re na le dijo le diaparo [gomme] re tla kgotsofala ka tšona.’ Re matlafatšwa ke mantšu a Beibele a rego: ‘Tsela ya lena ya bophelo a e se be ya go rata tšhelete, ge le dutše le kgotsofetše ka dilo tše di lego gona. Gobane Modimo o itše: “Le ka mohla nka se ke ka go tlogela le ge e le go go lahla.” E le gore re be le sebete kudu gomme re re: “Jehofa ke mothuši wa ka; nka se boife. Motho a ka ntira’ng?”’” *

Go nyakega tumelo ya kgonthe gore re ‘sepele le Modimo’ go etša ge Paul le ba lapa la gagwe ba dirile. (Genesi 6:9) Go sa šetšwe gore gona bjale re lebeletšane le mathata a magolo a tša ditšhelete goba mohlomongwe re ka lebeletšana le ona nakong e tlago, mohlala wa Paul wa go ba le tumelo le bohlale o re ruta dithuto tše bohlokwa.

Eupša go thwe’ng ge e ba mathata a lapa a re bakela dipelaelo?