Na o kile wa ipotšiša ge e ba go na le selo se bohlokwa kudu bophelong go feta go fo bapala, go šoma, go tsena lenyalong, go ba le lapa gotee le go tšofala? (Jobo 14:1, 2) Beibele e bontšha gore gaešita le batho ba bohlale kudu ba ipotšiša potšišo ye.—Bala Mmoledi 2:11.

Na bophelo bo na le morero? Sa pele, re swanetše go ipotšiša gore: Bophelo bo thomile bjang? Ka morago ga go ela hloko tsela yeo ka yona bjoko le mmele wa rena ka moka di hlamilwego ka tsela e makatšago, batho ba bantši ba ile ba phetha ka gore re bopilwe ke Mmopi yo bohlale. (Bala Psalme 139:14.) Ge e ba go le bjalo, gona o swanetše go ba a na le lebaka leo ka lona a re bopilego! Go ithuta lebaka leo go ka dira gore bophelo bja rena bo be le morero.

Modimo o šegofaditše batho ba babedi ba pele gomme a ba nea kabelo e kgahlišago. Morero wa gagwe e be e le gore ba tlatše lefase, ba le dire paradeise gomme ba phele ka mo go sa felego.—Bala Genesi 1:28, 31.

Morero wa Modimo o ile wa šitišwa ge batho ba be ba rabela kgahlanong le pušo ya gagwe. Eupša Modimo ga se a re lahla, e bile ga se a fetoša morero wa gagwe ka rena gotee le lefase. Beibele e re kgonthišetša gore Modimo o be a dutše a šoma e le gore a phološe batho ba botegago le gore morero wa gagwe ka lefase o tla phethagatšwa! Ka gona Modimo o nyaka gore o thabele bophelo ka tsela yeo a bego a e rerile! (Bala Psalme 37:29.) Ithute ka Beibeleng kamoo o ka holwago ke seo Modimo a se rerilego.