Seo se boletšwego ke Samuel, Teresa le Magdalene se bontšha gore batho ba rapela ka mabaka a mantši, gomme a mangwe a kwagala go feta a mangwe. Dithapelo tša batho ba bangwe ke tšeo di tšwago pelong; tša ba bangwe di rapelwa feela ntle le maikwelo. Lega go le bjalo, batho ba dimilione tše makgolo ba ikwa ba nyaka go rapela go sa šetšwe gore ba rapelela gore ba atlege ditlhahlobong tša sekolo goba go rapelela gore sehlopha sa dipapadi seo ba se ratago se thope sefoka, le ge ba rapelela tlhahlo ya Modimo bophelong bja bona bja lapa goba bakeng sa mabaka a mangwe a mantši kudu. Ge e le gabotse, dinyakišišo di bontšha gore le ba bangwe bao ba sego bodumeding bjo itšego ba rapela ka mehla.

Na o a rapela? Ge e ba go le bjalo, o rapelela eng? Go sa šetšwe gore o tlwaetše go rapela goba go se bjalo, o ka ba o ipotšiša gore: ‘Na go rapela go a hola? Na go na le motho yo a theetšago?’ Mongwadi yo mongwe o ile a bolela gore thapelo e fo ba “mohuta o mongwe wa kalafo . . . go swana le ge o bolela le hlapi yeo o e ruilego.” Ditsebi tše dingwe tša kalafo di na le pono e swanago, di bolela gore thapelo ke “mohuta o mongwe wa kalafo.” Na batho ba rapelago ba fo ba ba rapela ka gobane ba tlwaetše go dira bjalo goba ge e le gabotse mokgwa woo o ba hola ka go ba alafa ka tsela e itšego?

Go fapana le seo, Beibele ga e fo bolela ka thapelo e le mohuta wa kalafo. E re botša gore go na le motho yo a tlogago a theetša dithapelo tšeo di rapelwago ka tsela ya maleba le bakeng sa dilo tše di swanetšego. Na se ke therešo? A re hlahlobeng bohlatse bja seo.