Jesu o tlile Jerusalema bakeng sa Monyanya wa Kgakolo (goba, Hanukkah). Monyanya wo ke wa go gopola go kgakolwa lefsa ga tempele. Ka godimo ga nywaga e lekgolo pejana, Kgoši ya Siria e lego Antiochus IV Epiphanes o ile a aga aletare ka godimo ga aletare e kgolo tempeleng ya Modimo. Ka morago, barwa ba moperisita wa Mojuda ba ile ba thopa Jerusalema gape gomme ba neela tempele yeo lefsa go Jehofa. Ga e sa le go tloga ka nako yeo, go swarwa monyanya wa ngwaga le ngwaga ka Chisilefe 25, e lego kgwedi yeo e sepedišanago le go yela bofelong bja November le mathomong a December.

Ke marega, sehla sa go tonya. Jesu o sepela tempeleng mathuding a dikokwane a Solomone. Ge a le mo o dikanetšwa ke Bajuda gomme ba re: “O tla re tlogela re gakanegile go fihlela neng? Ge e ba o le Kriste, re botše ka go lebanya.” (Johane 10:22-24) Jesu o tla arabela bjang? O araba ka gore: “Ke le boditše eupša ga le dumele.” Jesu ga se a ba botša ka go lebanya gore ke yena Kriste, bjalo ka ge a ile a botša mosadi wa Mosamaria sedibeng. (Johane 4:25, 26) Lega go le bjalo, o utolotše gore ke yena mang ge a re: “Pele ga ge Aborahama a eba gona, ke be ke šetše ke le gona.”—Johane 8:58.

Jesu o nyaka gore batho ba itirele phetho ya gore ke yena Kriste ka go bapiša mediro ya gagwe le seo se ilego sa bolelwa e sa le pele gore Kriste o be a tla se dira. Ke ka baka leo ka dinako tše dingwe a bego a botša barutiwa ba gagwe gore ba se ke ba botša motho gore ke yena Mesia. Eupša bjale o botša Bajuda ba ba bogale ka go lebanya, o re: “Mediro yeo ke e dirago ka leina la Tate, yona e a ntlhatsela. Eupša ga le dumele.”—Johane 10:25, 26.

Ke ka baka la’ng ba sa dumele gore Jesu ke Kriste? O re: “Ga le dumele gobane le se dinku tša ka. Dinku tša ka di theetša lentšu la ka e bile ke a di tseba gomme di a ntatela. Le gona ke di nea bophelo bjo bo sa felego gomme di ka se ke tša fedišwa le ka mohla, e bile ga go yo a tlago go di ubula seatleng sa ka. Seo Tate a nneilego sona ke selo se segolo go feta dilo tše dingwe ka moka.” Ke moka Jesu o ba botša kamoo tswalano ya gagwe le Tatagwe e lego ya kgauswi ka gona, ge a re: “Nna le Tate re batee.” (Johane 10:26-30) Jesu o mo lefaseng gomme Tatagwe o legodimong, ka gona ga a bolele gore yena le Tatagwe ke batee ka tsela ya kgonthe. Go e na le moo, ke batee ka go ba le morero o swanago gomme ba na le botee.

Mantšu a Jesu a galefiša Bajuda kudu moo ba bušago ba topa maswika gore ba mo kgatle ba mmolaye. Jesu ga a tšhošwe ke se. O re: “Ke le bontšhitše mediro e mentši e mebotse e tšwago go Tate. Ke ofe wa mediro yeo woo le nkgatlago ka maswika ka baka la wona?” Ba araba ka gore: “Ga re go kgatle ka baka la modiro o mobotse, eupša re go kgatla ka baka la go roga Modimo, le ka baka la gore . . . o itira modimo.” (Johane 10:31-33) Jesu le ka mohla ga se a ka a bolela gore ke yena modimo, ka gona ke ka baka la’ng ba mo latofatša ka seo?

Go ba gona, Jesu o re o na le matla ao Bajuda ba dumelago gore ke a Modimo a nnoši. Ka mohlala, ge a bolela ka “dinku,” o itše: “Ke di nea bophelo bjo bo sa felego,” e lego seo batho ba ka se kgonego go se dira. (Johane 10:28) Bajuda ba hlokomologa ntlha ya gore Jesu o dumetše phatlalatša gore o amogetše matla a bolaodi go Tatagwe.

Ge Jesu a ganetša tatofatšo ya bona ya maaka, o botšiša gore: “Na Molaong wa lena [go Psalme 82:6] Modimo ga se a re: ‘Ke itše: “Le medimo”’? Ge e ba Modimo a biditše bao lentšu la gagwe le boletšego gampe ka bona a re ke ‘medimo,’ . . . na le re go nna yo Tate a mo kgethagaditšego le yo a mo romilego lefaseng: ‘O roga Modimo,’ gobane ke itše ke Morwa wa Modimo”?—Johane 10:34-36.

Ee, Mangwalo a bitša le baahlodi bao e lego batho ba ba se nago toka gore ke “medimo.” Ka gona go tla bjang gore Bajuda ba ba bone Jesu molato ge a re: “Ke Morwa wa Modimo”? O ba botša selo se sengwe seo se swanetšego go ba kgodiša, o re: “Ge e ba ke sa dire mediro ya Tate, gona le se ke la ntumela. Eupša ge e ba ke e dira, gaešita le ge nna le sa ntumele, dumelang mediro yeo, e le gore le tle le tsebe gomme le tšwele pele le tseba gore Tate o boteeng le nna gomme le nna ke boteeng le Tate.”—Johane 10:37, 38.

Bajuda ba arabela ka go leka go swara Jesu, eupša o ba phonyokga gape. O tloga Jerusalema gomme o ya ka mošola wa Noka ya Jorodane tikologong yeo go yona Johane a ilego a thoma go kolobetša nywageng e nyakilego go ba e mene e fetilego. Go bonagala e se kgole le lebopo la ka borwa la Lewatle la Galilea.

Mašaba a tla go Jesu gomme a re: “Johane ga se a ka a dira pontšho le e tee, eupša dilo tšohle tšeo Johane a di boletšego ka motho yo ka moka e be e le therešo.” (Johane 10:41) Ka baka leo, Bajuda ba bantši ba dumela go Jesu.