Ge o be o dutše o bala poroutšha ye ka moka, na o ile wa makala ge o ekwa gore Beibele e dumelelana le saense? Batho ba bantši ba kile ba makatšwa ke seo. E bile ba ile ba makatšwa ke ge ba ekwa gore Beibele ga e rute tše dingwe tša dilo tšeo dikereke tše dintši di bolelago gore Beibele e a di ruta. Ka mohlala, dikereke tše dingwe di ruta gore Modimo o ile a dira legodimo le lefase le diphedi ka moka, ka matšatši a tshela feela, ao a nago le diiri tše 24. Ge e le gabotse, ga go na moo Beibele e ganetšanago le dilo tšeo borasaense ba di bolelago tabeng ya gore legodimo le lefase di ka ba di na le nako e kaakaang di le gona. *

Le gona, tsela yeo Beibele e hlalosago kamoo Modimo a dirilego gore go be le bophelo mo lefaseng, e dirile gore go be le dithuto tše dintši tša saense le gore batho ba šale ba ipotšiša dipotšišo tše dintši. Beibele e hlalosa gore Modimo o bopile diphedi ka moka “go ya ka mehuta ya tšona.” (Genesi 1:11, 21, 24) Mantšu a a ka no tsoša dingangišano mabapi le dithuto tše dingwe tša saense, eupša e sego tšeo di theilwego dithutong tša nnete tša saense. Dilo tšeo batho ba di bolelago ka saense di bontšha gore dithuto tša batho di tsena le go tšwa, eupša dithuto tša nnete ga go na mo di yago gona, di tlo no dula di le gona.

Eupša go na le batho ba bantši bao ba sa nyakišišego Beibele ka bobona ka ge ba nyamišitšwe ke boikaketši bjo bo tletšego ka dikerekeng. Eupša na re swanetše go ahlola Beibele ka baka la boitshwaro bja batho bao ba ipolelago gore ba ruta seo se lego ka gare ga yona mola ba sa dire bjalo? Aowa. Ka mohlala, borasaense ba bantši bao ba rutago dithuto tša nnete tša saense, ba ile ba tšhošwa ke tsela yeo batho bao ba nago le kgethollo ba ilego ba diriša thuto ya gore dilo di itirile go thekga kgethollo yeo ya bona. Na re tla be re dira gabotse ge re ka no ahlola thuto ye feela ka go no kwa seo batho ba bangwe ba se dirago? Ruri re swanetše go nyakišiša thuto ye ka go e bapetša le bohlatse bjo bo lego gona.

Ka mo go swanago, le wena re go kgopela gore hle o nyakišiše seo Beibele e se rutago ka bowena. O ka no makatšwa ke gore dilo tšeo e di rutago di fapane kgole le dilo tšeo dikereke tše dintši di di rutago. Ka mohlala, go e na le gore Beibele e kgothaletše bošoro le gore batho ba ye dintweng, e  ruta gore bahlanka ba Modimo ga se ba swanela go lwa le go hloyana. (Jesaya 2:2-4; Mateo 5:43, 44; 26:52) Go e na le gore Beibele e kgothaletše batho gore e no ba bo madumelatšohle, e ruta gore motho o swanetše go lebeledišiša bohlatse pele e le gore a be le tumelo e tiilego. Ke moka tumelo yeo e tlo mo dira gore a be le matla a tlhaologanyo, goba go kgona go inaganela, e lego selo seo se tlago go mo thuša gore a hlankele Modimo. (Baroma 12:1; Baheberu 11:1) Go e na le gore Beibele e ganetše batho gore ba nyake go tseba, e re kgothaletša gore re nyakišiše tše dingwe tša dikarabo tša dipotšišo tšeo re kilego ra ipotšiša tšona. Dipotšišo tša go swana le tšeo di re tshwenyago kudu le tšeo batho ba bangwe ba sa kgonego go di araba.

Ka mohlala, na o kile wa ipotšiša gore: ‘Ge e ba ka nnete Modimo a le gona, ke ka baka la’ng a dumelela gore batho ba welwe ke mathata?’ Beibele e araba potšišo yeo le tše dingwe tše dintši, ka tsela yeo le wena o tlago go šala o kgotsofetše. * Hle, re go kgothaletša gore o tšwele pele o nyaka go tseba therešo le go ipotšiša dipotšišo. O ka hwetša dikarabo tšeo di kgahlišago kudu e bile e le tšeo di kwagalago, tšeo di theilwego go bohlatse bjo bo tshepegago. Eupša gore seo se kgonege, go ka se no direga ka mohlolo. O swanetše go dira se sengwe.