NAKO e telele pele a bopa batho, Modimo o ile a bopa dibopiwa tše dintši tše sa bonagalego tša moya—barongwa. Kua Edene, morongwa wa lerabele yoo ka morago a ilego a tsebja e le Sathane Diabolo, ka boradia o ile a leka Efa gore a je seenywa sa sehlare seo Modimo a itšego ba se ke ba ja dienywa tša sona.

A diriša noga e le mmoleledi wa gagwe, Sathane o ile a re Modimo o be a tima mosadi yoo le monna wa gagwe selo se itšego seo se kgahlišago. Morongwa yoo o ile a botša Efa gore yena le monna wa gagwe ba ka se hwe ge ba ka ja seenywa seo se ileditšwego. Ka go rialo, Sathane o ile a latofatša Modimo ka gore o boditše bana ba Gagwe ba batho maaka. Ramaaka yo o ile a dira gore go se kwe Modimo go bonale e le tsela e kgahlišago yeo e bego e tla ba nea tsebo e kgethegilego le tokologo. Eupša tšeo ka moka e be e le maaka—ge e le gabotse, e be e le maaka a mathomo a kilego a bolelwa lefaseng. Taba yeo ge e le gabotse e bego e belaelwa mo e be e le bobuši goba pušo ya Modimo e phagamego—gore na Modimo o na le tshwanelo ya go buša le gore na o buša ka tsela e lokilego le yeo e holago balata ba gagwe.

Efa o ile a dumela maaka a Sathane. O ile a thoma go kganyoga seenywa seo gomme a se ja. Ka morago o ile a se nea monna wa gagwe gomme le yena a se ja. Ka go rialo, ba ile ba fetoga badiradibe. Ge e le gabotse, tiro yeo e bonolo e be e le pontšho ya borabele. Ka go kgetha ka boomo go se kwe taelo ya Modimo, Adama le Efa ba ile ba gana go bušwa ke Mmopi yo a bego a ba neile dilo tšohle, go akaretša le bophelo bjo bo phethagetšego.

Modimo o ile a ahlola marabele ao ka baka la ditiro tša ona. O ile a bolela e sa le pele ka go tla ga Peu e holofeditšwego goba Mohlakodiši yo a bego a tla fediša Sathane yo a bego a emelwa ke noga. Modimo o ile a diegiša go phethagatšwa ga kahlolo ya lehu go Adama le Efa ka nako e itšego gomme ka go rialo a bontšha bana ba bona bao ba sešogo ba belegwa kgaugelo. Bana bao ba be ba tla ba le motheo wa kholofelo ka gobane Yoo Modimo a bego a tla mo romela lefaseng o be a tla fediša ditla-morago tše kotsi tšeo di thomilwego ke borabele bja Edene. Gore morero wa Modimo mabapi le Mophološi yo wa nakong e tlago o be o tla phethagatšwa bjang—le gore Yoo a tlago go rongwa e tla ba mang—go ile gwa utollwa ganyenyane-ganyenyane ge Beibele e be e dutše e ngwalwa.

Modimo o ile a leleka Adama le Efa Paradeiseng. Ba be ba tla swanelwa ke go šoma ka thata e le gore ba hwetše dijo mmung o lego ka ntle ga tšhemo ya Edene. Ke moka Efa o ile a ima gomme a belega Kaine, e lego leitšibulo la gagwe le Adama. Banyalani ba ba ile ba ba le barwa ba bangwe le barwedi, go akaretša Abele le Sethe, e lego rakgolokhukhu wa Noa.

—E theilwe go Genesi dikgaolo 3 go ya go 5; Kutollo 12:9.