THUTO 02

Beibele e re Tshepiša Gore Nakong e Tlago re tlo Ipshina ka Bophelo

BAPALA

Batho ba bantši lehono ba na le mathata ao a ba dirago gore ba ikwe ba nyamile, ba tshwenyegile le go kwa bohloko. Na le wena o kile wa welwa ke bothata bjo bo ilego bja go dira gore o ikwe ka tsela yeo? Mohlomongwe o kwa bohloko ka ge o babja goba o hlokofaletšwe. O ka ba o ipotšiša gore, ‘Na bophelo bo tla no dula bo le ka tsela ye?’ Beibele e re nea karabo e botse ya potšišo ye.

1. Beibele e re go tlo direga eng nakong e tlago?

E re hlalosetša gore ke ka baka la eng go tletše mathata a mantši mo lefaseng. Eupša sa go kgahliša ke gore e re botša le gore kgauswinyane mathata a ka moka a tlo fela. Beibele e re tshepiša “bokamoso” bjo bo re neago “kholofelo.” (Bala Jeremia 29:11, 12.) Seo se ka re thuša gore re kgotlelele mathata a rena, le gore re dule re thabile gona bjale, le nakong e tlago.

2. Beibele e re tshepiša gore bophelo bo tla ba bjang nakong e tlago?

Beibele e re bophelo bo tlo kgahliša kudu nakong e tlago. Ka mohlala, e re “lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” (Bala Kutollo 21:4.) Se se ra gore mathata ao a kwešago batho bohloko lehono, a bjalo ka bodiidi, go hloka toka, bolwetši le lehu, ga a sa tlo ba gona. Beibele e tshepiša gore batho ba tlo ipshina ka bophelo go ya go ile, paradeiseng yeo e tlago go ba gona mo lefaseng.

3. O ka tseba bjang gore seo Beibele e re tshepišago sona se tlo direga ka nnete?

Batho ba bantši ba duma gore dilo tše dibotse di direge, eupša ga ba tshepe gore dilo tšeo di tla tsoga di diregile. Bjale go thwe’ng ka dilo tšeo Beibele e re tshepišago tšona? Na tšona di tla tsoga di diregile? Ee, e le gore o tshepe seo, o swanetše go “hlahloba Mangwalo ka kelohloko.” (Ditiro 17:11) Ge o dutše o ithuta Beibele, o tlo kgona go ikgethela ka bowena, go bona ge e ba seo Beibele e se rutago e le nnete goba go se bjalo.

ITHUTE KA MO GO TSENELETŠEGO

Nyakišiša ka tše dingwe tša dilo tšeo Beibele e tshepišago gore di tlo direga nakong e tlago, gomme o kwe gore go tseba seo go thuša batho bjang lehono.

4. Beibele e re tshepiša gore re ka phela go ya go ile re se na mathata

Ekwa ka dilo tše di latelago tšeo Beibele e tshepišago gore di tlo direga nakong e tlago. Wena ke dilo dife tšeo di go kgahlago kudu? Ke ka baka la’ng o re di a go kgahla?

Balang mangwalo ao a bontšhitšwego kgauswi le dilo tšeo Beibele e re tshepišago gore di tlo direga, gomme le boledišaneng ka dipotšišo tše di latelago:

Na o nagana gore mangwalo a a go hola? Na o nagana gore ba lapa la geno le bagwera ba gago, le bona ba ka holwa ke go bala mangwalo a?

Nagana o phela lefaseng leo go se nago dilo tše di latelago

GO SE NA MOTHO YO . . .	BATHO KA MOKA BA TLO THABA . . .
a kwago bohloko, a tšofalago le yo a hwago.—Jesaya 25:8.	ge batho bao ba ba ratago ba tsošwa mabitleng, gomme ba phela gape mo lefaseng.—Johane 5:28, 29.
a babjago, le yo a golofetšego.—Jesaya 33:24; 35:5, 6.	ge ka moka ga rena re phetše gabotse, e bile re boetše bofseng.—Jobo 33:25.
a swarwago ka go hloka toka.—Jesaya 32:16, 17.	ge re na le dijo tše dintši, magae a mabotse, e bile re ipshina ka mešomo.—Psalme 72:16; Jesaya 65:21, 22.
a kwelego bohloko ka baka la dintwa.—Psalme 46:9.	ge ka moka ga rena re na le khutšo.—Psalme 37:11.
a naganago ka dilo tšeo di kilego tša mo kweša bohloko.—Jesaya 65:17.	ge ka moka re phela go ya go ile lefaseng leo le se nago mathata.—Psalme 37:29.

5. Go tseba seo Beibele e re tshepišago sona go ka fetoša bophelo bja gago

Batho ba bantši ba a nyama ge ba bona mathata a tletše mo lefaseng, e bile ba bangwe ba leka ka thata gore ba fetoše lefase gore le be kaone. Bona kamoo go tseba dilo tšeo Beibele e tshepišago gore di tlo direga nakong e tlago, go thušago batho lehono. Bapalang BIDIO ye, gomme le boledišaneng ka dipotšišo tše di latelago:

BIDIO: Ke be ke Nyaka go Lwantšhana le go Hloka Toka (4:07)

Go ya ka bidio ye, ke ka baka la’ng Rafika a be a nyaka go lwantšhana le go hloka toka?
Le ge a be a bona go hloka toka go sa fele, Beibele e ile ya mo thuša bjang?

Ge re tshepa gore ka nnete dilo tšeo Beibele e re tshepišago tšona di tlo direga, seo se tla re thuša gore re se sa nyama, e bile ra dula re thabile le ge re na le mathata. Balang Diema 17:22 le Baroma 12:12, gomme le boledišaneng ka potšišo e latelago:

Na o nagana gore seo Beibele e re tshepišago gore se tlo direga nakong e tlago, se ka fetoša bophelo bja gago gona bjale? Go re’ng o re’alo?

BATHO BA BANGWE BA RE: “Seo Beibele e re tshepišago gore se tlo direga nakong e tlago, se ka se tsoge se kgonegile.”

Ke ka baka la’ng o bona go le bohlokwa gore o nyakišiše taba ye ka bowena?

O ITHUTILE ENG?

Beibele e re botša ka dilo tše dintši tše dibotse tšeo di tlago go direga nakong e tlago. Se se dira gore re dule re thabile le ge re na le mathata.

Dipotšišo

Ke ka baka la’ng batho ba swanetše go tseba ka dilo tšeo Beibele e re tshepišago tšona?
Beibele e re ke dilo dife tšeo di tlago go direga nakong e tlago?
Go tshepa gore dilo tše di tla direga nakong e tlago, go ka go hola bjang gona bjale?

Re feditše go bala thuto ye ka di:

Seo o ka se dirago

Tseba dilo tšeo Beibele e rego di tlo direga nakong e tlago ka go bala ditemana tše di lego thutong ye.

Dilo tše dingwe:

Your other goal

ITHUTE KA MO GO OKETŠEGILEGO

Ekwa gore go tseba seo Beibele e re tshepišago sona, go ka go thuša bjang le ge o na le mathata.

“O ka Hwetša Kae Kholofelo?” (Phafoga! ya May 8, 2004.)

Ekwa gore go tseba ka dilo tše dibotse tšeo di tlago go direga nakong e tlago go ka thuša bjang batho bao ba phelago ka malwetši a šoro a go se fole.

“Na Beibele e ka go Thuša ge o Swerwe ke Bolwetši bjo bo sa Alafegego?” (Sehlogo seo se lego wepesaeteng)

Ge o dutše o bogetše bidio ya koša ye, ipone o na le ba lapa la geno, le ipshina ka bophelo lefaseng le lefsa la Paradeise leo le tlago go ba gona nakong e tlago.

Ipone o Phela ka Nako Yeo (3:37)