THUTO 43
Beibele e Re’ng ka Bjala?
Lefaseng ka moka, batho ba bolela dilo tša go fapafapana ka bjala. Ba bangwe ba fela ba thabela go nwa bjala ge ba na le bakgotsi ba bona. Mola ba bangwe ba kgetha go se bo nwe. Ba bangwe bona, ba nwela go tagwa. Beibele yona e re’ng ka go nwa bjala?
1. Na ke phošo go nwa bjala?
Beibele e re ga se phošo go nwa bjala. E bile e re botša gore e nngwe ya dimpho tše dintši tše dibotse tšeo Modimo a re filego tšona, ke “beine yeo e thabišago pelo ya motho.” (Psalme 104:14, 15) Banna le basadi ba bangwe bao go bolelwago ka bona ka Beibeleng bao ba bego ba tshepega, le bona ba be ba enwa bjala.—1 Timotheo 5:23.
2. Beibele e fa batho bao ba nwago bjala keletšo efe?
Jehofa ga a nyake re enwa bjala kudu e bile ga a nyake gore re tagwe. (Bagalatia 5:21) Beibele e re: “O se ke wa ba gare ga bao ba nwago beine kudu.” (Diema 23:20) Bjale ge e ba re enwa re na le batho ba bangwe goba re le nnoši, ga se ra swanela go nwa kudu go fihlela re se sa kgona go nagana gabotse, go bolela gabotse, le go dira dilo gabotse. E bile ga a nyake gore re nwe bjala kudu go fihlela re ipakela malwetši. Ge e ba motho a sa kgone go nwa bjala gabotse, go kaone a no bo tlogela.
3. O ka bontšha bjang gore o hlompha motho yo a kgethago go nwa bjala le yo a kgethago go se bo nwe?
Motho yo mongwe le yo mongwe o swanetše go ikgethela ge e ba a nyaka go nwa bjala goba go se bonwe. Ga se ra swanela go ahlola motho yo a nwago bjala gabotse, e bile ga se ra swanela go gapeletša motho yo a sa nwego bjala gore a thome go bo nwa. (Baroma 14:10) Le gona, ge e ba batho ba bangwe ba kgopišega ge ba bona re enwa bjala, re ka no kgetha go se bonwe ka nako yeo. (Bala Baroma 14:21.) Beibele e re re dire dilo tšeo di ‘holago motho yo mongwe e sego tšeo di holago rena ka noši.’—Bala 1 Bakorinthe 10:23, 24.
ITHUTE KA MO GO TSENELETŠEGO
Ekwa melao ya motheo ya Beibele yeo e ka go thušago go dira phetho ya ge e ba o tlo nwa bjala goba go se bo nwe, le gore ge e ba o bo nwa o swanetše go nwa bjang. O kwe le gore o ka thušwa ke eng ge e ba o na le bothata bja go nwa kudu.
4. Kgetha ge e ba o tlo nwa bjala goba o ka se bonwe
Jesu o be a lebelela bjala bjang? E le gore re kwe karabo, a re kwe ka mohlolo wa mathomo wo a ilego a o dira. Balang Johane 2:1-11, gomme le boledišaneng ka dipotšišo tše di latelago:
-
Go mohlolo wo Jesu a o dirilego, re ithuta gore Jesu o be a lebelela bjala bjang, le gore o be a ikwa bjang ka batho bao ba bo nwago?
-
Ka ge Jesu a se a ka a re go nwa bjala ke phošo, Mokriste o swanetše go lebelela bjang motho yo a nwago bjala?
Le ge e se phošo gore Mokriste a nwe bjala, go na le dinako tšeo a ka kgethago go se bo nwe. Balang Diema 22:3, gomme le boledišaneng ge e ba o swanetše go nwa bjala maemong a latelago:
-
Ge o tlo reila goba o tlo šomiša motšhene.
-
Ge o imile.
-
Ge ngaka ya gago e go boditše gore o se ke wa nwa bjala.
-
Ge o na le bothata bja go nwa kudu.
-
Ge molao wa naga o sa dumele gore o nwe.
-
Ge o na le motho yo a tlogetšego go nwa bjala ka gobane a be a na le bothata bja go nwa kudu nakong e fetilego.
Na o swanetše go fa batho bjala ge o dira monyanya goba ge o memile batho ba bantšinyana dijong? E le gore o tsebe gore o ka dira phetho efe, bapalang BIDIO ye.
Balang Baroma 13:13, gomme le boledišaneng ka potšišo ya ka mo fase. Le baleng le 1 Bakorinthe 10:31, 32, gomme le boledišaneng ka potšišo ya ka mo fase:
-
Lengwalo le le ka go thuša bjang go dira phetho yeo e ka thabišago Jehofa?
Mokriste yo mongwe le yo mongwe o swanetše go itirela phetho ya ge e ba a nyaka go nwa bjala goba go se bo nwe. Le ge a enwa bjala, ka dinako tše dingwe a ka kgetha go se bo nwe
5. Tseba gore o swanetše go nwa bjang
Ge e ba o enwa bjala, dula o gopola taba ye: Jehofa o re go nwa bjala ga se phošo, eupša go nwa kudu ke phošo. Ke ka baka la’ng a re ke phošo? Balang Hosea 4:11, 18, gomme le boledišaneng ka potšišo e latelago:
-
Go ka direga’ng ge motho a enwa kudu?
Re ka thušwa ke’ng gore re se ke ra nwa kudu? Re swanetše go tseba mo re felelago gona. Balang Diema 11:2, gomme le boledišaneng ka potšišo e latelago:
-
Ke ka baka la’ng go le bohlokwa gore motho a tsebe mo a felelago gona ge a enwa bjala?
6. Ke eng seo se ka thušago motho gore a tlogele go nwa kudu?
Ekwa gore monna yo mongwe o ile a thušwa ke eng gore a tlogele go nwa kudu. Bapalang BIDIO ye, gomme le boledišaneng ka dipotšišo tše di latelago:
-
Bidiong ye, Dmitry o be a dira’ng ge a be a nwele?
-
Na o ile a tlogela go nwa bjala di tloga fase?
-
O ile a thušwa ke’ng gore a feleletše a tlogetše go nwa kudu?
Balang 1 Bakorinthe 6:10, 11, gomme le boledišaneng ka dipotšišo tše di latelago:
-
Botagwa ke sebe se se kaakaa’ng?
-
Re tseba bjang gore motho yo a nago le bothata bja go nwa kudu a ka kgona go fetoga?
Balang Mateo 5:30, gomme le boledišaneng ka potšišo e latelago:
-
Ge Jesu a be a bolela ka mohlala wa go kgaola seatla, o be a era gore ka dinako tše dingwe re ka swanelwa ke go tlogela selo se itšego e le gore re thabiše Jehofa. Bjale o ka dira’ng ge e ba o palelwa ke go tlogela go nwa bjala kudu? a
Balang 1 Bakorinthe 15:33, gomme le boledišaneng ka potšišo e latelago:
-
Ge e ba o phela le batho ba go nwa kudu, seo se tlo go ama bjang?
MOTHO YO MONGWE A KA GO BOTŠIŠA GORE: “Kgane ke phošo go nwa bjala?”
-
O ka mo araba bjang?
O ITHUTILE ENG?
Jehofa o re file bjala gore re ipshine ka bjona. Eupša ga a nyake re enwa kudu e bile re tagwa.
Dipotšišo
-
Beibele e re’ng ka bjala?
-
Go nwa bjala kudu go ka re bakela mathata afe?
-
Re ka bontšha bjang gore re hlompha diphetho tša batho ba bangwe tabeng ya go nwa bjala?
ITHUTE KA MO GO OKETŠEGILEGO
Bafsa ba ka thušwa ke’ng go dira diphetho tše dibotse tabeng ya bjala?
Ekwa dilo tšeo o ka di dirago ge e ba o se sa nyaka go nwa bjala kudu.
“Go Bea Bjala Boemong bja Bjona” (Morokami wa January 1, 2010.)
Na Mokriste o swanetše go dira toasting?
“Dipotšišo tše Tšwago go Babadi” (Morokami wa February 15, 2007.)
Bala sehlogo seo se rego, “Ke be ke le Faki ya go Dutla,” gore o kwe gore monna yo mongwe o ile a thušwa ke eng gore a tlogele go nwa kudu.
a Batho bao ba nago le bothata bja go nwa bjala kudu, ba ka swanelwa ke go ya go ngaka gore e ba thuše. Dingaka tše dintši di eletša batho bao ba nago le bothata bja go nwa kudu gore ba tlogele go nwa.
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
