E le gore re dire sohle seo re ka se kgonago go tsebatša “ditaba tše dibotse” go “ditšhaba tšohle, meloko yohle, maleme ohle le batho bohle,” re tšweletša dikgatišo ka maleme a e ka bago a 700. (Kutollo 14:6) Modiro wo o thata re o phetha bjang? Re dira seo ka go thušwa ke sehlopha sa bangwadi ba ditšhabatšhaba le bafetoledi ba e ka bago ba 3 300—bao ka moka e lego Dihlatse tša Jehofa.

Di ngwalwa la mathomo ka Seisemane. Sehlopha se Bušago se okamela modiro wa Lefapha la Bongwadi ntlongkgolo ya rena ya lefase ka bophara. Lefapha le le okamela dikabelo tša bangwadi bao ba hlankelago ntlongkgolo le diofising tše dingwe tša makala. Go ba le sehlopha sa bangwadi bao ba fapafapanego go dira gore re kgone go ahlaahla ditaba tša ditšo tše di fapafapanego tšeo di dirago gore dikgatišo tša rena di ipiletše bathong ba ditšhabatšhaba.

Dingwalwa di romelwa go bafetoledi. Ka morago ga gore taba e ngwadilwego e rulaganywe le go newa tumelelo, e romelwa ka didirišwa tša elektroniki dihlopheng tša bafetoledi lefaseng ka bophara, tšeo di fetolelago, di hlahlobago le go bala taba. Ba katanela go kgetha “mantšu a nepagetšego a therešo” ao a tlago go fetiša ka botlalo seo se bolelwago ke Seisemane ka leleme leo le fetolelwago.—Mmoledi 12:10.

Dikhomphutha di akgofiša modiro. Khomphutha e ka se tšeele bangwadi ba batho le bafetoledi legato. Lega go le bjalo, mediro ya bona e ka akgofišwa ka go diriša dipukuntšu tšeo di lego khomphutheng, mananeo a mangwe a khomphutha le dilo tša go dira nyakišišo. Dihlatse tša Jehofa di hlamile lenaneo la khomphutha leo le bitšwago Multilanguage Electronic Publishing System (MEPS), leo ka lona dingwalwa di kgonago go ngwalwa ka maleme a makgolo, tša tsenywa diswantšho tšeo di sepedišanago le tšona ke moka tša rulaganywa bakeng sa go gatišwa.

Ke ka baka la’ng re dira maiteko a ka moka, gaešita le bakeng sa maleme ao a bolelwago ke batho ba dikete tše sego kae feela? Ka gobane thato ya Jehofa ke gore “mehuta yohle ya batho e phološwe gomme e fihle tsebong e nepagetšego ya therešo.”—1 Timotheo 2:3, 4.

• Ke’ng seo se akaretšwago ge go ngwalwa dikgatišo tša rena?

• Ke ka baka la’ng re fetolela dikgatišo tša rena ka maleme a mantši gakaaka?