Batho ba bantši ba nagana gore Dihlatse tša Jehofa ke leina la bodumedi bjo bofsa. Lega go le bjalo, nywageng ya ka godimo ga e 2 700 e fetilego, bahlanka ba Modimo a nnoši wa therešo ba ile ba hlaloswa e le “dihlatse” tša gagwe. (Jesaya 43:10-12) Re be re tsebja re le Barutwana ba Beibele go fihla ka 1931. Ke ka baka la’ng re ile ra amogela leina le lefsa la Dihlatse tša Jehofa?

Le hlaola Modimo wa rena. Go ya ka dingwalwa tša bogologolo, leina la Modimo la Jehofa, le tšwelela ka makga a dikete ka Beibeleng. Diphetolelong tše dintši leina le le ntšhitšwe gomme legatong la lona gwa bewa direto tše bjalo ka Morena goba Modimo. Lega go le bjalo, Modimo wa therešo o be a ikutolotše go Moshe ka leina la gagwe le le mo hlaolago, Jehofa, ge a be a re: “Le ke lona leina la ka go iša mehleng ya neng le neng.” (Ekisodo 3:15) Ka tsela ye, o ile a itlhaola medimong ya maaka ka moka. Re ikgantšha ka go rwala leina la Modimo le lekgethwa.

Le hlalosa morero wa rena. Bao ba lego lelokelelong le letelele la batho ba bogologolo, go thoma ka monna wa go loka Abele, ba neile bohlatse ka tumelo ya bona go Jehofa. Go theoša le nywagakgolo, Noa, Aborahama, Sara, Moshe, Dafida le ba bangwe ba ile ba tlatša ‘leru le la dihlatse le legolo.’ (Baheberu 11:4–12:1) Go etša ge motho a ka nea bohlatse kgorong ya tsheko a emelela motho yo a se nago molato, re ikemišeditše go tsebatša therešo ka Modimo.

Re ekiša Jesu. Beibele e mmitša “hlatse e botegago le ya therešo.” (Kutollo 3:14) Jesu o boletše ka boyena gore o ‘utolotše leina la Modimo bathong’ gomme a dula a ‘hlatsela therešo’ ka Modimo. (Johane 17:26; 18:37) Ka gona, balatedi ba kgonthe ba Kriste ba swanetše go rwala leina la Jehofa gomme ba le tsebatše. Se ke seo Dihlatse tša Jehofa di katanelago go se dira.

• Ke ka baka la’ng Barutwana ba Beibele ba ile ba ipitša ka leina la Dihlatse tša Jehofa?

• Jehofa o bile le dihlatse ka lebaka le lekaakang mo lefaseng?

• Hlatse ya Jehofa e kgolo go di feta tšohle ke mang?