1 Corinthians 4:1-21
4 Hániʼdii Christ bá neiilʼaʼgo, índa Diyin God yee naʼnitinii doo bééhózin da yę́ę baa áhwiilyą́ągo nihaa nitsídaahkees leʼ.
2 Jó, kweʼé kótʼé, diné bá aa áhojilyáanii éí hananitʼaʼí haʼólíi dooleełgo bee hazʼą́.
3 Nidi nihí shaa nídadóohtʼįįłígíí, doodaiiʼ aa náhátʼı̨́įgi shaa náhódóotʼįįłígíí doo bikʼee nitseeshdáa da. Tʼáá shí nidi doo ádá nihodeestʼáał da.
4 Háálá haʼátʼíhída doo ákogi éʼétʼéii doo łaʼ ádá shił bééhózin da, ákondi éidíígíí doo bee shohodiitʼiʼ da éí doo dishníi da. Nidi Bóhólníihii éí shaa nídóotʼįįł.
5 Éí bąą Bóhólníihii náádoodáłígíí tʼah doo baa hoolzhííshgóó tʼáadoo aa nídaahtʼı̨́įgo ándahoyoʼaahí. Bóhólníihii nádzáago índa chahałheełdi ádajíítʼįįdii yikááʼ haidoonił índa tʼáá hayiʼídi nidahodzizʼáanii ííshjání íidoolííł. Áko éí bikʼehgo tʼááłáʼí jinítínígo Diyin God haa haniih doo.
6 Shikʼisóó, díí ádíshnínígíí éí shí índa Apálas beiníshtʼı̨́, nidi nihinahjįʼ ídahwiidoołʼááł biniyé ádíshní. Áko Diyin God bizaad bikʼehgo tʼáadoo diné aghánídahohnihgo bee ádaa dahohniihí.
7 Háishąʼ náánáłaʼ biláahdi ánítʼéego ániilaa? Haʼátʼíísh nee hólónígíí tʼáadoo neílyáa da? Łaʼ neílyáago haʼátʼéegoshąʼ tʼáá ni shóisíníłtʼeʼ nahalingo bee ádaa hóʼniih?
8 Tʼáá íídą́ą́ʼ diyin kʼehgo hwiih dasiidlı̨́ı̨́ʼ danohsin! Tʼáá íídą́ą́ʼ diyin kʼehgo aa deetʼáanii dasiitʼįįd danohsin! Tʼáá nihídin naatʼáanii kʼehgo nidanohtʼáá lá yaʼ. Tʼáá aaníí nidanohtʼáa dooleeł yę́ę laanaa, áko nihí ałdóʼ nihił nidaniitʼáa dooleeł nisin.
9 Háálá daalʼaadii daniidlínígíí akéédę́ę́ʼ Diyin God ninihinínil nisin, diné nabidiʼdootsiłjįʼ ninádeetʼánígi átʼéego, diyingo nidaalʼaʼí índa nihokááʼ dineʼé tʼáá ałtso tʼóó danihidínóołʼįįł nahalingo bá chʼínihiʼdeeʼnil.
10 Nihí Christ yá naalʼaʼí daniidlı̨́; biniinaa doo ádahwiilyą́ą́góó bee nihaa nitsáhákees, nidi nihí aají éí Christ binahjįʼ dahonohsą́! Nihí doo danihidziil da, nidi nihí aají éí ayóó ádanihóodziil! Nihí aají éí nihaa dahaʼniih, nidi nihíjí danihijiʼjoodlá!
11 Tʼáá díí nihoolzhiizhíjįʼ dichin áádóó dibááʼ daniidlı̨́; bee hadiʼdooʼníiłii nihee ádaadin; nídanihidiʼniltsʼin; nihighan ádaadin,
12 áádóó tʼáá nihílaʼ bee yéego nideiilnishgo tʼáá nihí ákʼinideiildzil. Danihódziihii bá sodadiilzin; atídanihiʼdilʼı̨́įgo hadaʼííníilní;
13 tʼáá ádzaagóó nihaa dahaneʼgo kʼé nidahwiidleʼgo yádeiiltiʼ. Díí jı̨́ı̨́góó nihokáaʼgi tsʼiilzéí daniidlı̨́įgo nihaa nitsáhákees; tʼáá ałtsoní bitłʼááshjání daniidlı̨́įgo nihaa nitsáhákees.
14 Tʼóó ádaa yádadínóohdzįįł éí doo biniyé nihichʼįʼ akʼeʼashchíi da, nidi shaʼáłchíní ayóóʼóóshʼníinii danohłı̨́įgo díí bee nihiʼnishníihgo akʼeʼashchí.
15 Háálá azhą́ Christ yee nidanihinitinii doo jóołtaʼ ánéelą́ąʼ da nidi, Christ bee nihizhéʼé doo daałą́ą da, háálá shí átséedi haneʼ yáʼátʼéehii bee nihił dahweeshneʼígíí bąą Christ Jesus bee nihizhéʼé sélı̨́ı̨́ʼ.
16 Áko shidaʼołʼı̨́į dooleełígíí baa nídanihooshkąąh.
17 Éí bąą Timothy, Bóhólníihii bee shiyeʼ nilíinii, ayóóʼóóshʼníinii áádóó baʼahódlíii nilı̨́įgo nihichʼįʼ ííłʼaʼ. Haash yitʼéego Christ bee hinishnánígíí áádóó daʼoodlání tʼáá ałtsogóó áłah nídaadleehii bee naʼnishtinígíí yéénihidiyoołnih biniyé nihichʼįʼ ííłʼaʼ.
18 Nihitahgóó łaʼ doo nihaazhdoogáał da dashóʼníigo ádaa dadzódlí.
19 Nidi Bóhólníihii íinízin ládą́ą́ʼ tʼáá hahígo nihaa deeshááł, áko ádaa dadzódlíigo yee ayóó ádaalzaadígíí doo biniyé deesháał da, nidi haʼátʼíí binahjįʼ dabidziilígíí shił bééhodoozįįł biniyé aadi deeshááł.
20 Háálá Diyin God bee bóhólníihgo bił hazʼáanii éí doo tʼóó saad tʼéí átʼée da, nidi Diyin God bibee adziilii átʼé.
21 Háidíígíishąʼ danohsin? Daʼ tsihałísh yishtı̨́įłgo nihaa deeshááł, doodaiiʼ ayóóʼánihóshʼníigo shá áhwiinítʼı̨́ʼígo daatsʼí nihaa deeshááł?
