2 Timothy 4:1-22
4 Diyin God áádóó Bóhólníihii Jesus Christ, éí dahináanii índa daneeznáanii yaa nídóotʼįįłii binááł, áádóó Jesus yidooltséłígíí índa bee bóhólníihgo bił hazʼáanii binahjįʼ ándishní,
2 Haneʼ yáʼátʼéehii baa nahólneʼ, ashjaʼósingo índa doo ashjaʼósin da nidi haleebee ánítʼı̨́; bił ííshjání ádahóleʼ, adíteh, náʼiinikąąh, tʼáá ałtsojįʼ haʼíínílníigo naʼnítin.
3 Háálá diné tʼáá ákogi átʼéego naʼnitin doo yichʼįʼ hadaʼólníi da dooleełígíí baa dahodoolzhish, nidi tʼáá bí deinízinígíí tʼéiyá dayíistsʼą́ąʼgo bił yáʼádaatʼéeh doo, tʼáá bí yidádanoolníinii bikʼehgo nidaʼnitinii tʼéiyá yíchą́deídéelniʼ doo.
4 Naʼnitin tʼáá aaníinii dayíistsʼą́ąʼii yitsʼádahidookah, áádóó haneʼ tʼóó ádaalyaii yichʼįʼ yóóʼadahidookah.
5 Nidi ni, tʼáá ałtsojįʼ ádaa áhólyą́; tiʼhooʼnííh bichʼįʼ haʼíínílní, haneʼ yáʼátʼéehii baa nahólneʼ, niʼdoolʼaadígíí biʼílééh.
6 Nááshidiʼyoolnihígíí koshídę́ę́ʼ hoolzhish; dadeestsaałii baa hoolzhiizh.
7 Tʼáá shizááká nisébaaʼ, ałtso yiishteeʼ, naʼnitin woodláanii tsʼídá tʼáá ákótʼéego íínísingo ahoolzhiizh.
8 Kʼad tsʼídá tʼáá ákogi éʼétʼééjí naatʼá chʼah shá hashtʼeʼniitʼą́, éí Bóhólníihii tʼáá bí tsʼídá tʼáá ákogi ááníiłgo ánihwiiʼaahii jílíinii hainíłką́ądi shaazhdooʼááł, nidi doo tʼáá shí tʼéiyá da, hodidooltsééł biniyé ayóóʼádahóʼníigo háká dadéezʼı̨́įʼii ałdóʼ tʼáá ałtso bitaazhdoonih.
Timothy bichʼįʼ biʼdoolʼaadii
9 Tʼáá tsı̨́įłgo shaa díínáałgo haleebee bíká ánítʼı̨́.
10 Háálá Díímas, díí kʼad nihokááʼ bił nidahaztʼiʼii ayóóʼáyóʼníigo bąą yóóʼashidííʼą́ągo Thesalonáíkagóó ííyá. Kréskens éí Galéíshiyagóó ííyá, Táítas éí Dalméíshagóó ííyá.
11 Tʼáá hazhóʼó Luke tʼéiyá bił séké. Mark baa díínáałgo áádę́ę́ʼ bił dííʼash, háálá shá naalʼaʼgo tʼáá íiyisí chooʼı̨́.
12 Tíkikas éí Éfesasgóó ííłʼaʼ.
13 Trówasdi Kárpas baʼałkʼee éénééz niníłtsoozígíí áádę́ę́ʼ díníyáago yíłtsos doo, naaltsoos ałdóʼ, akágí bee ádaalyaago bikʼedaʼashchíinii éí íiyisí yíjih doo.
14 Alezáander béésh łichíʼii yitsidii ląʼígóó doo ákǫ́ǫ́ áshííłʼįįd da; baa nijiyáhígíí bikʼehgo Bóhólníihii kʼééhodidoodlííł.
15 Éí bitsʼąą ádaa áhólyą́, háálá tʼáá íiyisí bee nidaʼniitinii yikʼijįʼ naaldzil.
16 Átsé shaa hwiinístʼįįd yę́ędą́ą́ʼ tʼáadoo łaʼ shikʼíyádeestiʼí da, nidi tʼáá ałtso yóóʼadasideezʼą́. Tʼah nítʼééʼ lá Diyin God tʼáadoo yee bikʼíházʼah da łeh [dishníigo bá sodiszin].
17 Nidi Bóhólníihii shíighahgi yiizįʼgo tʼáadoo anáhóótʼiʼí haneʼ yáʼátʼéehii baa hashneʼgo, doo Jew dineʼé danilíinii tʼáá ałtso deididootsʼı̨́ı̨́ł biniyé shidziilgo áshiilaa, áádóó náshdóítsoh bitsiijįʼ daditłʼooígíí bizééʼdóó hááshiʼdooltı̨́.
18 Doo yáʼádaashóonii tʼáá ałtso bitsʼą́ąjįʼ Bóhólníihii yisdáshiiłteehgo yáʼąąshdi tʼáá bí bee bóhólníihgo bił hazʼą́ąjįʼ shił yah adooʼash. Éí hoolʼáágóó ahóyéelʼáágóó baa haʼniih leʼ. Tʼáá ákótʼée doo.
Kʼé haʼníigo bee naaltsoos niiltʼiʼii
19 Príska áádóó Ákwila shá kʼé bijiniih, índa Anesíforas bighan hazʼą́ą́dóó danilíinii shá kʼé bijiniih.
20 Iirástas tʼahdii Kórinthdi naagháa niʼ; Trófimas éí Mailíítasdi daatsaahgo bitsʼą́ą́ʼ dah diiyáa niʼ.
21 Haleebee ánítʼı̨́įgo tʼáadoo iʼniiháhí shaa díínááł. Yobúlas áádóó Púdenz índa Láínas áádóó Kládiya índa nihikʼisóó danilíinii tʼáá ałtso kʼé daniłní.
22 Niiʼ sizíinii Bóhólníihii Jesus Christ bił hólǫ́ǫ doo. Ajoobaʼ nihił hólǫ́ǫ doo. [Tʼáá ákótʼée doo.]
