3 John 1:1-14
1 Daʼoodlání yá aląąjįʼ sizíinii nishłı̨́įgo, Géíyas ayóóʼóóʼníinii, tʼáá aaníinii binahjįʼ ayóóʼóóshʼníigo, bichʼįʼ naaltsoos áshłééh.
2 Shikʼis ayóóʼánóshʼníinii, kodóó nił hózhǫ́ǫgo shił bééhózin, áko niiʼ sizíinii bił yáʼáhootʼéhígi átʼéego tʼáá ałtsoní yáʼátʼéehgo ná ááníił doo, índa doo nąąh tééhgóó hinínáa doogo ná bíká sodiszin.
3 Christ bee nihikʼisóó danilíinii łaʼ neheeskaigo tʼáá aaníinii bee sínízı̨́įgo naa dahoolneʼígíí tʼáá íiyisí baa shił hózhǫ́. Jó, tʼáá aaníinii tʼéiyá bikʼehgo hinínáago shił bééhózin.
4 Shaʼáłchíní éí tʼáá aaníinii yikʼehgo dayíkáahgo baa hodisítsʼą́ʼígíí éí biláahgo baa shił nááhodoojǫǫłii tʼáá ádin.
Géíyas éí baa haʼniih
5 Shikʼis ayóóʼánóshʼníinii, nihikʼisóó danilíinii, azhą́ doo béédahonísinii nidi, naa dadzólíigo bíká anánílwoʼ lá.
6 Kweʼé daʼoodlání áłah nádleehígi neʼayóóʼóʼóʼniʼ yee naa dahalneʼ. Éí náásgóó deíkááhgóó chodayoołʼı̨́į dooleełígíí bee bíká anánílwoʼgo Diyin God baa bił hózhǫ́ǫ doo biniyé ánítʼı̨́.
7 Háálá Christ yá nidaalʼaʼgo dah dahidiikááhgóó doo daʼoodlání, Nihíká adoohjah, doo deiłníi da.
8 Éí bąą oodlání daniidlíinii díí Christ yá nidaalʼaʼí danilíinii bíká anéiijahgo yáʼátʼééh. Bíká anéiijahgo tʼáá aaníinii bee bił nideiilnish dooleeł.
Daiyátrifiiz éí John yitsʼą́ą́jí nilı̨́
9 Aadi daʼoodlání áłah nádleehii bichʼįʼ naaltsoos íishłaa, nidi Daiyátrifiiz éí aląąjįʼ naʼídíltʼeʼgo tʼéí bił yáʼátʼééh, shóhólníhígíí doo bił nilı̨́į da.
10 Áko shí aadi níyáá ládą́ą́ʼ saad nichxǫ́ʼí yee nihá hahadziihgo tʼáá ádzaagóó nihaa halneʼgo yaa naagháhígíí béénihidiyeeshnih. Nidi nichxǫ́ʼógo nihaa nahalneʼígíí doo bił sih da, Christ bee nihił danilíinii ákwii nehekáhígíí doo yichʼįʼ kʼé nídzin da, índa tʼáá háiida bichʼįʼ kʼé daznidzin dooleeł yę́ę nidi yichʼą́ą́h naagháago oodlání áłah nádleehii bitahgi kʼé daznidzinígíí nahjįʼ hahodiiʼníił doo nízin!
Demíítriyas yáʼátʼéehgo baa haneʼ
11 Shikʼis ayóóʼánóshʼníinii, doo yáʼátʼéehii yaa nidaakaígíí tʼáadoo biʼíłʼíní, nidi yáʼátʼéehii yaa nidaakaígíí éí biʼíłʼı̨́. Tʼáá háiida yáʼátʼéhígi ájooníłígíí Diyin God bííʼ jílı̨́, nidi tʼáá háiida doo yáʼátʼéhígi ájooníłígíí éí Diyin God doo yizdoołtséeł da.
12 Demíítriyas éí diné tʼáá ałtso bił danilı̨́įgo baa chʼídahwiiʼaah, tʼáá aaníinii bikʼehgo diné yáʼátʼéehii nilı̨́. Áko nihí ałdóʼ, Diné ákótʼéii átʼé, dadiiʼní, áko tʼáá aaníígóó ádadiiʼníigo nihá nił bééhózin.
Kʼé haʼníigo bee naaltsoos niiltʼiʼii
13 Tʼóó ahayóígóó bee nił hodeeshnihii hólǫ́, ákondi akʼeʼashchíigo éí doo bee nił hodeeshnih da,
14 nidi tʼáá shí naa deesháałgo tʼáá yíní átʼéegi ahił nahodiilnihígíí éí bíká shił chohooʼı̨́. Nichʼįʼ hózhǫ́ǫ leʼ. Kodóó nikʼis danilíinii kʼé daniłní. Aadi nihikʼis danilíinii shá kʼé bijiniih.
