Amos 2:1-16
2 Bóhólníihii kóní, Móʼab kéyahdóó* dajílíinii táadi, doodaiiʼ dı̨́įdi bee hazʼáanii kʼídajiztiʼgo biniinaa dooshąʼ léiʼ tʼáadoo atíháshłééh lá, háálá Íídam dineʼé aláahgo binanitʼaʼí yę́ę bitsʼin azhdííłkʼą́ąʼgo łeeshchʼiih tʼéí násdlı̨́ı̨́ʼ.
2 Áko Móʼab bikʼijįʼ kǫʼ ádeeshłíiłgo Kíriyathgi* bidziilgo bił nahazʼáanii ałtso adidookʼą́ą́ł áádóó hahóóʼáago áádóó hahodidoodlałgo índa deenástsʼaaʼ bideeʼ bee íʼdílzoołí ayóó íitsʼaʼgo áníigo Móʼab dineʼé nabízdįįd doo.
3 Áko binííʼdóó ándahodiyiiʼaahii áádóó naatʼáanii danilíinii tʼáá bił áhodeeshdįįł, ní Bóhólníihii.
4 Bóhólníihii kóní, Jó, Júdah dineʼé táadi, doodaiiʼ dı̨́įdi bee hazʼáanii kʼídajiztiʼgo biniinaa dooshąʼ léiʼ tʼáadoo atíháshłééh lá, háálá Bóhólníihii bibee hazʼáanii doo dazniizı̨́įʼ da índa bibikʼeh óʼooʼníiłii doo bikʼeh dahojííłʼįįd da, nidi dabizhéʼé yę́ę ádáátʼįįdígi átʼéego dabiyoochʼíidgo yóóʼaheeskai.
5 Áko Júdah bikʼijįʼ kǫʼ ádeeshłíiłgo Jerúsalem kin haalʼáagi bidziilgo bił nahazʼáanii ałtso adidookʼą́ą́ł.
Diyin God éí Ízrel dineʼé yá nihodooʼááł
6 Bóhólníihii kóní, Jó, Ízrel dineʼé táadi, doodaiiʼ dı̨́įdi bee hazʼáanii kʼídajiztiʼgo biniinaa dooshąʼ léiʼ tʼáadoo atíháshłééh lá, háálá diné tʼáá ákogi ádaatʼéii béésh łigaii bikʼé haa nidahaniih índa diné badahojoobáʼíii ké bikʼé haa nidahaniih.
7 Badahojoobáʼíii dabitsiiʼ bąąhdę́ę́ʼ łeezh dibahí nidi kʼad yídin ádaanééh índa aʼohgo ádaatʼéii tʼóó nayídadziłtaał; dinééh índa bizhéʼé yił chʼikę́ę́h tʼááłáʼíígíí yaa nidiltʼé, áko shízhiʼ dílzinii doo ílı̨́ı̨́góó íílééh.
8 Bikááʼ nááʼiiniihí tʼááłáʼí níʼánígo bíighahgóó ééʼ ąąh naaznilii yikááʼ nídanjah índa biDiyin God bikin biiʼ sohodizin góneʼ wáin nináhályéhígíí áde deidlą́.
9 Shí tʼéí dahanááł Ámor dineʼé ádeeshdįįł;* éí gad alááh áníłnéezii nahalin índa chéchʼil nahalingo bidziil, nidi bineestʼąʼ wódahdę́ę́ʼ yaa nihideeshtih áádóó behétłʼóól wóyahdę́ę́ʼ hadeestsʼǫł.
10 Shą́ą́ʼ, shí éí Ííjip kéyahdę́ę́ʼ chʼínihiníʼeezhgo dízdiin nááhaijįʼ honoojíidi tánihidííʼeezh, áko Ámor dineʼé bikéyah yáʼáhootʼéehii nihííʼ dooleeł biniyé biih nihííʼeezh niʼ.
11 Ákohgo danihiyeʼké shá dahalneʼ doo biniyé łaʼ nídiinil áádóó diné ániid nidaakaii łaʼ Názarait danilı̨́į doo biniyé nídiinil. Ízrel dineʼé danohłíinii, daʼ díísh doo tʼáá aaníi da? ní Bóhólníihii.
12 Nidi Názarait danilíinii éí wáin deidlą́ągo ádaahłaa áádóó dahalneʼii danilíinii, Tʼáadoo dahołneʼé, dabidohníigo bichʼįʼ hadasoohdzííʼ.
13 Tłʼoh naadą́ą́ʼ ałchʼįʼ bidaʼastłʼǫ́ǫgo tsinaabąąs bide ályaaígi átʼéego tʼáá íiyisí yaa kódashoohłaa, jóʼakon.
14 Dilwoʼii éí doo chʼaa anóchééł átʼée da doo áádóó bitsxeʼii doo bitsxeʼ da dooleeł índa ayóó átʼéii doo yisdáʼádóltééł átʼée da dooleeł.
15 Kʼaaʼ yee adziiłtʼóóh dooleełígíí doo yíneelʼą́ą da doo áádóó dilwoʼii yisdáʼádidooltéłígíí doo yíighah da dooleeł índa łı̨́ı̨́ʼ nabiyéhígíí tʼáá bí yisdáʼádidooltéełgi nidi doo yíneelʼą́ą da doo.
16 Tʼáá éí bijı̨́ siláo dahayóii bitahdóó doo nídanilyéesii tʼáá łichíʼígo yóóʼadahidoojah, ní Bóhólníihii.
Footnotes
^ Beʼekʼid Dókʼǫ́zhí haʼaʼaahjígo kéyah. Is. 15:1-16:14; 25:10-12; Jer. 48:1-47; Ezek. 25:8-11; Zeph. 2:8-11.
^ Móʼab kéyahgi kin haalʼá óolyé.
^ Kéínan kéyahgi kéédahatʼı̨́ı̨́ nítʼééʼ. Deut. 3:8-11.
