Ephesians 6:1-24
6 Áłchíní danohłíinii, Bóhólníihii binahjįʼ danihishchíinii bikʼeh dahonołʼı̨́, háálá éí tsʼídá tʼáá ákogi éʼélʼíinii átʼé.
2 Nizhéʼé índa nimá nił nilı̨́įgo íínísin; díí bee hazʼáanii alą́ąjįʼ bee nihootʼáanii bił niilyáii átʼé,
3 áko nił yáʼáhootʼéeh doo, índa nízaadgóó niʼ bikáaʼgi hinínáa doo.
4 Azhéʼé danohłíinii, tʼáadoo nihaʼáłchíní bánídahołchįįhí, nidi tʼáá hashkée nidanohtin, índa hazhóʼó nidanohtin, éí Bóhólníihii binaʼnitinígíí bee nihaʼáłchíní danohsé.
Naalteʼ danilíinii índa naatʼáanii danilíinii
5 Naalteʼ danohłíinii, nihokáaʼgi nihinanitʼaʼí nihił danilı̨́į leʼ; yééʼ nihitah dahodíłtłidgo Christ bikʼeh dahonołʼínígi átʼéego nihijéí tʼáá átʼé bee nihinanitʼaʼí bikʼeh dahonołʼı̨́.
6 Nihinanitʼaʼí binááł tʼóó diné bił hólzhǫ́ tʼéí biniyé ádaahtʼı̨́įgo éí dooda, nidi Christ yá naalteʼ danohłı̨́įgo nihijéí tłʼááhdę́ę́ʼ Diyin God íinízinii bidaʼołʼı̨́.
7 Bóhólníihii bá nidaałʼaʼígi átʼéego bídanohdlı̨́įgo nihinanitʼaʼí bá nidaałnish, diné bá naʼanishígi átʼéego éí dooda.
8 Háálá nihił béédahózin, tʼáá háiida naalteʼ jílı̨́įgo, doodaiiʼ doo naalteʼ jílı̨́į da nidi, yáʼátʼéehgo ájooníłígíí tʼáá éí bikʼehgo Bóhólníihii hachʼįʼ ninádiʼyoodlééł.
9 Naatʼáanii danohłíinii, nihinaalteʼ bichʼįʼ haasdzíʼígi átʼéego nihí ałdóʼ tʼáá ákódaahtʼı̨́; nihíkáiishʼááł tʼáadoo dabidohníní. Nihił béédahózingo, biBóhólníihii, tʼáá éí ałdóʼ nihiBóhólníihii, éí yáʼąąshdi hólǫ́, áádóó diné doo łaʼ ałʼohgo yaa nitsíkees da.
Níłchʼi bidaʼiiníziinii binanitʼaʼí bichʼįʼ naʼabaahii
10 Shikʼisóó danohłíinii, díí bee hanáánásdziihgo bee ninishtʼééh, Bóhólníihii bee áádóó yee ayóó ábóodziilii bee danihidziil leʼ.
11 Béésh ééʼ bee naʼabaahii Diyin God nihaidiníʼánígíí tʼáá átʼé bee hadadohneʼ, áko níłchʼi bidaʼiiníziinii binanitʼaʼí binahagiz bikʼijįʼ bídanoołʼą́ągo nidasoozı̨́į doo.
12 Háálá bitsįʼ áádóó bidił dahólóonii doo bił daʼahiigą́ą da, nidi doo daatʼı̨́ı̨́góó aláahdi bídahólníihii, áádóó dabidziilii, áádóó díí kʼad nahasdzáán bikáaʼgi chahałheeł bee bídahólníihii, índa níłchʼi bidaʼiiníziinii tʼáadoo bee néelą́ʼígóó yádiłhił biyiʼ nahazʼą́ądi dahólóonii bił daʼahiigą́.
13 Ákótʼé bąą béésh ééʼ bee naʼabaahii Diyin God nihaidiníʼánígíí tʼáá átʼé bee hadadohneʼgo tsiʼooldahgo bił yoołkáłígíí bichʼįʼ nidaałdzilgo bídanoołʼą́ą doo, índa ałtso bikʼeh dasidoohdlı̨́ı̨́ʼdóó bikʼijįʼ nidi wołí bee nidasoozı̨́į doo.
14 Éí bąą tʼáá aaníinii bee áká dasoołzaazgo, áádóó tsʼídá tʼáá ákogi éʼétʼé béésh ééʼ nihijéítsʼiin bąąh nidasoołʼą́ągo nidasoozı̨́,
15 áádóó haneʼ yáʼátʼéehii bee kʼé hwiindzinii baa chʼídahoyohʼaah doo biniyé bee hashtʼeʼádadíínółzingo bee kééh dadíínółʼeez.
16 Niheʼoodląʼ nihinaageʼ ádeínóhsingo bineʼ nidaohdziʼ, áko naayééʼ níłchʼi bidaʼiiníziinii binanitʼaʼí bideezlaʼ diltłiʼii tʼáá ałtso bitsʼą́ą́ʼ dadínóołtsis.
17 Áádóó béésh chʼah bee yisdáʼiildéehii índa Níłchʼi Diyinii bidiltłish nídahidoohnííł, jó, Diyin God bizaad éí diltłish átʼé.
18 Tʼáá áłahjįʼ Níłchʼi Diyinii bee sodadołzin índa nídaʼoohkąąh. Díí biniyé tʼáadoo ádahodoołzéhí hadaʼísídółʼı̨́ı̨́ʼ, wołí bee Diyin God bidiyı̨́ı̨́ʼ tʼáá ałtso sodizin bee bá nídaʼoohkąąh.
19 Shí ałdóʼ shá sodadołzin, áko haneʼ yáʼátʼéehii doo bééhózin da yę́ę saad bohónéedzáanii shaa deetʼą́ągo tʼáadoo shizééʼ nahonitłʼaaí doo sistiʼgóó bee yáshtiʼ doo.
20 Háálá éí biniyé yilʼaadii béésh daʼahólzhaʼí bee dahaastłʼóonii nishłı̨́, áko doo sistiʼgóó haneʼ yáʼátʼéehii tʼáá baa hashneʼ dooleełígi átʼéego baa hashneʼ doogo shá sodadołzin.
Kʼé haʼníigo bee naaltsoos niiltʼiʼii
21 Kʼad áníshtʼéii áádóó baa naasháhígíí nihił béédahodoozįįł biniyé Tíkakas, nihikʼis ayóóʼóóʼníinii índa baʼahódlíigo Bóhólníihii yá naalʼaʼígíí tʼáá ałtso yee nihił hodoolnih.
22 Tsʼídá díí biniyé nihichʼįʼ ahóółʼaʼ, éí kodi nihił áhootʼéii nihił béédahodoozįįł, áádóó aají nihijéí bił nídahozhdooshǫǫł ałdóʼ biniyé akǫ́ǫ́ ahóółʼaʼ.
23 Diyin God aTaaʼ áádóó Bóhólníihii Jesus Christ bibee achʼįʼ hózhǫ́ náhásdlı̨́įʼii áádóó bibee ayóóʼóʼóʼníinii oodlą́ bóóltąʼgo ałkʼisóó danilíinii yee bikʼijidlíi doo.
24 Ayóóʼóʼóʼní tʼáá yitʼéhí yitʼéii bee nihiBóhólníihii Jesus Christ ayóóʼádayóʼnínígíí tʼáá ałtso Diyin God bibee ajoobaʼ yee yikʼijidlíi doo.
