Hebrews 10:1-39
10 Bee hazʼáanii éí yáʼátʼéehii hodooleełígíí doo bił aheełtʼée da, nidi tʼóó bichahaʼoh átʼé. Éí biniinaa Diyin God yichʼįʼ nidahałáa dooleełgo bikááʼ nááʼiiniihí yichʼįʼ deíkáhígíí tʼáá nináháhááh bikʼeh tʼáá áłahjįʼ tʼááłáhígi átʼéego náádayiiłniihígíí binahjįʼ bee hazʼáanii tsʼídá doo hadaałtʼé ádabidoolíił da.
2 Jó, náádayiiłniihígíí hadaałtʼé ádabiilaago éí ádił nidaʼiiszíiʼii doo bináádaʼdiiłʼáa da doo nítʼééʼ, áko náádayiiłniih nítʼéeʼii tsʼídá doo náádayiiłniih da doo nítʼééʼ.
3 Nidi tʼáá nináháhááh bikʼeh díí náádahaniihii éí ádił nidaʼiiszíiʼii tʼóó yéédabiyiiłníihii átʼé.
4 Háálá dóola bidił, doodaiiʼ tłʼízí bidił éí bąąhági átʼéii doo ąąh tááyógis átʼée da.
5 Ákótʼé bąą nahasdzáán bikáaʼjįʼ
Christ yigááł yę́ędą́ą́ʼ Diyin God ííłní:
Naaztseedgo nááhániihii índa tʼáadoo leʼé náádahaniihii náádayiiłniihígíí doo nínízin da,nidi shitsʼíís hodooleełgo shá hashtʼeinilaa.
6 Didlidgo náádahaniihii índa bąąhági átʼéii biniyé náádahaniihii náádayiiłniihígíí doo baa nił hóózhǫǫd da.
7 Áko ádííniid, Diyin God nílíinii, jóʼakon, tʼáá naaltsoos biyiʼ shee bee akʼeʼashchı̨́įgo bee siʼánígi átʼéego,íinínízinii baa nideeshaał biniyé níyá.
8 Átsé kótʼéego yee haadzííʼ, Naaztseedgo nááhániihii áádóó tʼáadoo leʼé náádahaniihii, áádóó didlidgo náádahaniihii índa bąąhági átʼéii biniyé náádahaniihii náádayiiłniihígíí éí doo ninizı̨́įʼ da, doo baa nił hóózhǫǫd da. Éidíígíí bee hazʼáanii bikʼehgo náádahaniihii ádaatʼée nidi ání.
9 Áádóó kótʼéego yee hanáánáádzííʼ, Jóʼakon, Diyin God íinínízinii baa nideeshaał biniyé níyá. Áko Diyin God átséédą́ą́ʼ náádahaniih nítʼéeʼii nahjįʼ kóyiilaago éí náádahaniihii bitsáskʼehgi Christ nááhaazniiʼ.
10 Áko éí Diyin God íinízinii bikʼehgo tʼááłáhídiígíí ałtso łaʼyiyiilaago Jesus Christ tʼáá bí bitsʼíís nááyiisniiʼígíí bee dadiniigingo ádanihiʼdiilyaa.
11 Náádaʼiiłniihii tʼááłáʼí nítínígo tʼáá ákwíí jı̨́ náádahaniihii tʼááłáhígi átʼéego náádayiiłniihgo binaanish danilı̨́įgo yichʼįʼ naazı̨́, nidi éí ádił niʼiidzííh doo nahjįʼ kwíyólééh átʼée da.
12 Nidi Christ tʼááłáhídi nááʼádiisniiʼígíí éí ádił niʼiidzííh biniyé hoolʼáágóó nááʼádiisniiʼ, áádóó índa Diyin God binishʼnáájígo dah neezdá.
13 Áko Diyin God éí hwedaʼanaʼí bikʼi jidéesʼeezgo áhoolaajįʼ nijólí.*
14 Jó, tʼááłáhídi nááʼázdiisniiʼii bee diné dadiyingo ádajiilaaígíí éí hoolʼáágóó doo bee bichʼįʼ anáhóótʼiʼgóó ájiilaa.
15 Áádóó Níłchʼi Diyinii tʼáá bí ałdóʼ kótʼéego nihił halneʼ. Áłtsé ání:
16 Éí yoołkáłígíí adayiiską́ą́dóó bikʼijįʼ
díí bee ahaʼdeetʼą́ nilíinii Ízrel dineʼé bee bił ahadiʼdeeshtʼááł, ní Bóhólníihii:Bee hoséłʼáanii dabijéí biih dadeeshłééł,áádóó bintsíkees biyiʼdi bee bikʼedaʼdeeshchííł.
17 Áádóó índa ánáádíʼní,
Bibąąhági ádaatʼéii índa doo ákwii ádaadzaa yę́ę doo bénáshniih da doo.
18 Áko ádił nidaʼdziisdzíʼígíí tʼáá íídą́ą́ʼ há yóóʼadootʼą́ągo nínááʼiiniih dooleełígíí kʼad ádin.
Haaʼíshąʼ Diyin God baa dahidiikah
19 Éí bąą shikʼisóó, Jesus nihá daaztsą́ągo bidił deeznaʼígíí bee tsʼídá aláahgo hodiyingo hazʼą́ą́ góneʼ tʼáadoo dasiitiʼí yah adahidiikahgo átʼé.
20 Jó, tʼáá bí bitsʼíís éí dáádiníbaal átʼéego binákáá góneʼ yah ahóótʼiʼ ániidíii índa hináanii nihá ąą áyiilaa.
21 Diyin God baʼáłchíní daniidlı̨́įgo Jesus éí tsʼídá aláahgo nááʼiiłniihii nihá jílı̨́.
22 Áko tsʼídá tʼáá aaníí ádiiʼníigo, áádóó tʼáadoo naaki nilíní dahwiiniidlą́ągo, áádóó nihijéí tłʼáahdi hadił bee nihibąąhági átʼéii nihąąh ádingo bee ádaa ákodaniidzı̨́įʼgo, índa tó niłtólíii bee danihitsʼíís táádaasgizgo Diyin God baa dahidiikah.
23 Haaʼíshąʼ sheʼoodląʼ bee shił chohooʼı̨́ dadiiʼnínígíí yéego dayíníitąʼ doo, háálá Diyin God yee haadzíʼígíí yiʼdoolíiłgo baa dadzííníidlí.
24 Áádóó haaʼíshąʼ ayóóʼádaʼííníiʼníigo índa naanish yáʼátʼéehii baa neiikaigo ałkʼi nideiildzilgo ahídaniidlı̨́į doo.
25 Áłah néiidleehígíí łaʼ nidayiisííh, nidi haaʼíshąʼ nihí tʼáadoo nidahiilzíhí doo. Bóhólníihii nídoodááł beidoołkáłígíí koshídę́ę́ʼ bichʼįʼ hoolzhishgo baa ákodanoohsįįh, haaʼíshąʼ hózhǫ́ yéego ahił yadahoniidlįįh doo.
26 Háálá tʼáá aaníinii nihił béédahoozindóó bikʼijįʼ tʼáá ákódeiiʼnéehgo ádił nináádaʼayiilzíihgo, ádił nidaʼayeelzíʼígíí biniyé nááhidoonihii doo łaʼ nááhódlǫ́ǫ da.
27 Nidi ánihwiitʼaah báhádzidii, índa kǫʼ báhádzidii éí Diyin God bitsʼą́ą́jí dajílíinii ahodidoołkʼą́ąłgo hólóonii tʼéí há nidawólní.
28 Diné éí bee hazʼáanii Mózes baa deetʼáanii doo yiʼiiłʼįįhgóó diné naaki, doodaiiʼ táaʼda ooʼíinii kʼehgo baa halnihgo, tʼáadoo baa hojoobáʼí laʼ hwiindziní biʼdiilyééh.
29 Diné tʼáá háiida Diyin God biYeʼ yádoosnihgo yikʼi naagháii áádóó dił bee ahaʼdeetʼáanii bee diyingo ábiʼdiilyaii doo ílı̨́ı̨́góó yaa nitsíkeesii índa Níłchʼi Diyinii baa joobaʼii doo bił yílįįdii, éí diné tʼáadoo asohodoobézhígóó bee atíʼélʼíinii bą́ą́h jílı̨́ ni!
30 Háálá, Kʼééhodidooʼníłígíí éí bee shóhólnííh, shí kʼéédideeshʼnííł,
jidííniidii hwéédahoniilzin. Nááʼáłdóʼ ánáázhdíʼní,
Bóhólníihii éí bidineʼé yaa nídóotʼįįł.
31 Diyin God hináanii bílákʼezhdootłishgi tʼáá íiyisí bikʼeʼíyééʼ!
32 Nahdę́ę́ʼ nihił chʼídaʼdeezdláád yę́ędóó bikʼijįʼ atéʼélʼı̨́ bikʼee tiʼhooʼnííh bichʼįʼ hadaʼíínółníigo yiníłkánígíí béédaałniih.
33 Íídą́ą́ʼ łahda nihí dahoneedlı̨́įgo hasłą́ągi nihá ninádahadis índa atídanihiʼdilʼı̨́ı̨́ nítʼééʼ, áádóó łahda ákódabiʼdilʼíinii bił ahił danohdlı̨́įgo biniinaa ákódanihiʼdilʼı̨́ı̨́ nítʼééʼ.
34 Awáalyaaí nishłı̨́įgo shaa aʼááh danoozı̨́ı̨́ʼ, áádóó nihindaalyeʼé nihighadahaasʼnil, nidi nihił dahózhǫ́ǫgo bidahishidoochid, háálá nihí éí wózhǫ́ yáʼátʼéehii índa doo nídínéeshii yáʼąąshdi nihee dahólǫ́ǫgo nihił béédahózin.
35 Éí bąą Diyin God baa dadzíínóhłíhígíí tʼááká bee nihąąh nidahókaad lágo, háálá éí ayóo ílı̨́įgo bikʼéʼazlá.
36 Diyin God íinízinii bikʼehgo ádaahdzaago nízaadgóó hadaʼíínółní, áko yee nihá haadzíiʼii nihííʼ dadooleeł.
37 Háálá tʼóó hodíínaʼgojíháahii jidoogááł, áádóó doo naʼáhozdidoolził da.
38 Tsʼídá tʼáá ákogi ájítʼéii oodląʼ bee jiináa doo,* nidi łaʼ tʼą́ą́ʼ anáátłizhgo éí doo bąą shił hózhǫ́ǫ da doo.
39 Nidi tʼą́ą́ʼ anáhineezdeeʼgo ádabiʼdisdįįdii doo bitahjí daniidlı̨́į da, nidi nihíyeeʼ daʼiiniidlą́ągo baa dadzííníidlíigo nihiiʼ naazíinii yisdádooʼnił.
Footnotes
^ Bikʼi jidéesʼeezgo áhoolaajįʼ, nínígíí éí, Há yikʼeh deesdlı̨́įʼjįʼ, níigo ání. Ps. 110:1.
^ Éí doodago kótʼé, Hweʼoodląʼ bee aʼódlí bee tsʼídá tʼáá ákogi ájítʼéii éí jiináa doo.
