Isaiah 28:1-29
28 Íífreiyim kéyahdóó daʼadláanii ádaa dahaʼniihii áádóó chʼilátah hózhóón nahalingo yee ayóó ánóolnin yę́ę néibaʼii doo hojoobaʼ ájíníi da! Éí ayóó átʼéego naʼntʼąʼgo honítsʼaaʼ de nihoneelʼánídi bił hazʼą́ áádóó wáin bikʼeh dadeesdlı̨́ʼígíí áłah nádleeh.
2 Shoo, Bóhólníihii éí bidziilii áádóó hayóígíí bee hólǫ́; éí níló naałtin áádóó ayóóʼíitsʼaʼgo níyol índa tó ayóó átʼéego daaląąhgo wóʼąnídaanahígi átʼéego tʼáá naʼníleʼdii nihokáaʼjįʼ iidiyoołhą́ą́ł.
3 Íífreiyim kéyahdóó daʼadláanii ádaa dahaʼniihii bikʼi nidooldah.
4 Índa ayóó átʼéego naʼntʼąʼgo honítsʼaaʼ de nihoneelʼánídi bił hazʼánígíí éí chʼilátah hózhóón nahalingo yee ayóó ánóolninii néibaʼii, tʼah doo chʼínáshı̨́ı̨́hgóó fig sikaadii bineestʼąʼ áłtsé neestʼánígíí éí diné łaʼ yiyiiłtsą́ągo tʼáá niʼidiiʼą́ągo yiyííyą́ʼígíí nahalin doo.
5 Éí yoołkáałdi tʼáá ałtsoní bee Bóhólníihii bidineʼé daadziihígíí bá naatʼá chʼah ayóó átʼéii áádóó ayóó ánóolninii nilı̨́į doo;
6 ánihwiiʼaahgo dah sidáhígíí doo haada yitʼéii yinízingo índa yah aʼatiingi anaaʼ dahalʼíinii tʼą́ą́ʼ yéédaʼiiłníihii yá adziil nilı̨́į doo.
Jerúsalem tʼahídą́ą́ʼ bee biʼílniiʼii áádóó bee bá nihootʼáanii
7 Áko éí ałdóʼ wáin yikʼee nidaʼntʼi áádóó tó tsiʼnaʼiiłáii yikʼee tsiʼnidaakai; náádaʼiiłniihii áádóó áhodooníiłii yaa dahalneʼígíí tó tsiʼnaʼiiłáii yikʼee tsiʼnidaakai; wáin dabisnááh áádóó tó tsiʼnaʼiiłáii yikʼee tsiʼnidaakai; nidaʼntʼigo bił ádahatʼı̨́ índa bił nidahondohgo nidahwiiʼaah.
8 Áko kwih áádóó tʼóó badaaʼihii bibikááʼ adání bił naazʼą́, áko doo łahgo chin bąąh ádingo hazʼą́ą da.
9 Háishąʼ ił ééhózin bee nizhdínóotįįł? Háishąʼ hanaʼnitinii yikʼidiʼdootı̨́įłgo ázhdoolííł? Áłchíní yázhí índa iʼdaʼdeeztʼódígíí daatsʼí.
10 Jó, bikʼeh oodáałii áádóó łaʼ bikʼeh nááʼoodáałii, bikʼeh oodáałii áádóó łaʼ bikʼeh nááʼoodáałii, bee akʼeʼashchínígíí áádóó bee akʼenááʼáshchíinii, kweʼé áłtsʼíísígo áádóó áadi ánáánáłtsʼíísígo.
11 Tʼáá aaníí díí dineʼé yichʼįʼ ałtʼandzihgo áádóó náánáłaʼ bizaad yee yáłtiʼ doo.
12 Chʼééh dadeeskaii díí yee háádadoołyįh, yidííniidii; díí hááʼáyı̨́ı̨́h baa dahidoohʼaah; ákondi tʼáadoo dabidiiztsʼą́ąʼ da.
13 Áko éí chʼíhidookah áádóó chą́ą́h dahidigeeh doo áádóó bąąh nidahwiikaad doo índa łoh yiih hekáahgo nidabiʼdiilnéeh doo biniyé kótʼéego Bóhólníihii bizaad haa hodooleeł, Bikʼeh oodáałii áádóó łaʼ bikʼeh nááʼoodáałii, bikʼeh oodáałii áádóó łaʼ bikʼeh nááʼoodáałii, bee akʼeʼashchínígíí áádóó bee akʼenááʼáshchíinii, kweʼé áłtsʼíísígo áádóó áadi ánáánáłtsʼíísígo.
14 Éí bąą diné ándahałtʼiʼii danohłíinii, Jerúsalemgi diné bindanohtʼáii Bóhólníihii bizaad deísínółtsʼą́ą́ʼ.
15 Kódadooniid, Aniné bił ahadaʼdiʼniitʼą́ áádóó hoolʼáágóó tiʼhooʼnííh bił lą́ daʼsiidlı̨́ı̨́ʼ; atídaʼałʼíinii nihikʼi chʼínínáago doo atídanihidoolíił da, háálá woochʼííd bineʼ adahiniichéehgo ádeiilyaa áádóó naʼadloʼ bineʼ nidaneetʼı̨́ı̨́ʼ;
16 éí bąą Bóhólníihii Diyin God ání, Záíyangi tsé bee naanáʼástłʼinii bóhoneestą́ąʼgo tʼáá íiyisí niłdzilgo ninishʼaah, jóʼakon, áko tʼáá háiida boodlánígíí éí doo yánízin da doo.
17 Áádóó doo haada yitʼéii bee íʼneelʼąąhí nilı̨́įgo índa tʼáá ákogi átʼéii éí kʼéhézdon tłʼóół náátʼiʼígíí ałdóʼ ádeeshłííł, áko woochʼííd bineʼ anáʼníchéehii níló bee yóóʼadeeshoh índa nínádadoohtʼı̨́ı̨́h yę́ęgi tó bikʼíizdoołhał.
18 Áádóó aniné bił ahadaʼdiʼnohtʼáanii bikʼinídoodzoh índa hoolʼáágóó tiʼhooʼnííh bił lą́ daʼsoohłı̨́ı̨́ʼ yę́ę tʼáadoo biniyéhí da doo; atídaʼałʼíinii nihitahgóó chʼínínáago nihikʼi nidooldah.
19 Tʼáá chʼídahanééh bikʼeh adanihiiʼéesh doo, háálá tʼáá ałkééhoníʼą́ągo, jı̨́įgo áádóó tłʼéeʼgo nihitahgóó chʼídahanéeh doo; éí haneʼ dazdiitsʼaʼígíí baa ákodazdínóozįįł yę́ę tʼáadoo ádajóneʼígóó tʼóó yéego nídadzildzid doo.
20 Jó, tsáskʼeh áłtsʼísígo diné yikááʼ dínóotéłígíí biʼoh áníłtso áádóó bee antéhí áłtsʼózígo ákʼízhdidoodisígíí doo bíighah da.
21 Bóhólníihii dooldził tʼáá Dził Pérazimdi ádzaaígi átʼéego áádóó Gíbiyan honítsʼaaʼdi doo bił hóózhǫǫdgóó atíʼiilaa yę́ęgi átʼéego doo bił hodoozhǫǫłgóó binaanish; tʼáadoo ájóneʼ hasingi áyoolíiłii binaanish íidoolííł áádóó tʼáadoo ájóneʼ hasingi ádooníłígíí baa hodoolzhish.
22 Éí bąą kʼad tʼáadoo nidahołtʼiʼí, áko bikʼee tiʼdahoohníhígíí doo tʼóó yówehda ádooníił da, háálá tʼáá ałtsoní bee Bóhólníihii Diyin God nihokááʼ tʼáá átʼéé nítʼééʼ ádazhdoodįįłgo yee haadzíiʼgo disétsʼą́ą́ʼ.
23 Dashíínółtsʼą́ąʼgo shiinééʼ dadoohtsʼı̨́ı̨́h; hazhóʼó dashíínółtsʼą́ąʼgo shizaad dadoohtsʼı̨́ı̨́h.
24 Daʼ diné nihwiiłdlaadiísh tʼáá ákwíí jı̨́ nihwiiłdlaad? Daʼ tʼáá áłahjįʼísh bis neiłtseed biniyé akʼi naʼashood?
25 Ałtso bis yikʼi naʼashoʼgo daʼ doósh dil áádóó kámin wolyéii bílástsiiʼ áádóó tłʼoh naadą́ą́ʼ áádóó tłʼoh naadą́ą́ʼ bideeʼí índa tłʼoh naadą́ą́ʼ rai wolyéii nihiidiyoołkał da?
26 Háálá biDiyin God nabinitin; hazhóʼó yaa nitsíkees dooleeł biniyé nabinitin.
27 Dil wolyéii éí tłʼoh naadą́ą́ʼ habéʼélʼésígi átʼéego doo habéʼélʼées da, doo nidi tsinaabąąs naaldlózígíí kámin wolyéii bikʼi naalbąąs da, nidi dil éí gish bee habéʼélghał índa kámin éí tsihał bee habéʼélghał.
28 Daʼ tłʼoh naadą́ą́ʼásh yéego dooljish? Doo nízaadgóó hayéʼéłʼées da doo, doo nidi bitsinaabąąs naaldlózígíí yikʼi neiłbąąs da doo, áádóó doo bilı̨́ı̨́ʼ yikʼi naajeehgo deidoołjish da.
29 Díí ałdóʼ tʼáá ałtsoní bee Bóhólníihii bitsʼą́ą́dę́ę́ʼ nihwiileeh; éí ayóó ánóolningo naʼnitin áádóó ayóó átʼéego naanish áyoolííł.
