Isaiah 33:1-24
33 Aghaʼayíʼníiłii nílı̨́įgo doo nighaʼiisnilii, nináʼdiyiiʼaahii nílı̨́įgo doo ninániʼdeetʼáanii doo hojoobaʼ ájíníi da! Doo aghaʼayíʼníił da sínílı̨́įʼgo nighaʼdiʼyooʼnił áádóó doo nináʼdiyíʼaah da sínílı̨́įʼgo ninándiʼdootʼááł.
2 Bóhólníihii nílíinii, nihaa jiiníbaʼ le; nibaʼ ádaniitʼéé nítʼééʼ; tʼáá ákwíí abíní nigaan bee binísíníniiʼ dooleeł; achʼįʼ nahwiiʼná biyiʼdóó yisdánihiníiłii nílı̨́į doo.
3 Ayóó íitsʼaʼgo hahodíídláadgo diné yikʼee yóóʼadahineezhchą́ą́ʼ; yinizįʼgo ałʼąą dineʼé tadaozhjééʼ.
4 Chʼosh dishooí áłah ádaʼiilaago ałtso daʼííyą́ą́ʼ nahalingo tʼáadoo leʼé aghahíníʼnilii áłah ádeidoolííł; nahachagiitsoh tádadilyeedígi átʼéego yikʼi nidoolwoł.
5 Bóhólníihii éí ił nilı̨́įgo ayóó átʼé ábiʼdiilyaa, háálá wódahgo kééhatʼı̨́; Dził Záíyan doo haada yitʼéii índa tʼáá ákogi átʼéii yiiʼ haidééłbįįd.
6 Áádóó nee hoolzhishígíí biyiʼ hódzą́ índa ił ééhózin bee níłdzilgo éí bee yisdáʼiildééh biyiʼ nidziil doo; Bóhólníihii dólzinii éí honaalyeʼé átʼé.
7 Jó, tłʼóoʼdi diné dahayóii hadadoocha, kʼé náhodoodleeł biniyé nidabiʼdisʼaʼii tʼáá íiyisí anídaachahgo dadoocha.
8 Atiinígíí doo bikááʼ naʼaldeeh da silı̨́ı̨́ʼ; diné doo nídídááh yę́ę doo nídídáah da silı̨́ı̨́ʼ; bee ahaʼdeetʼáanii kʼíinítiʼ; kin haalʼáhígíí yiyííʼįįd; doo diné łaʼ yiyíistsʼą́ąʼ da.
9 Kéyah yínííł nilı̨́ áádóó nidínéesdzá; Lébanan kéyah éí tʼóó baa yáhásingo hooʼaʼ áádóó ałtso náhooltseii; Shéran honíteel éí honoojí haazlı̨́ı̨́ʼ áádóó Béíshan honíteel índa Dził Kármel bitʼąąʼ bąąh naníídeeʼ.
10 Kʼad nídideesdził; kʼad lą́ą ayóó átʼé áshiʼdidoolnííł; kʼad wódahgo ádiʼdeeshnííł, ní Bóhólníihii.
11 Azhool éí bídíʼnííltsąął áádóó ehégod dííłchííł; niyol éí kǫʼ nahalingo anihididoołkʼą́ą́ł.
12 Dleesh didlidígi átʼéego diné dadidoolił; chʼil deeníní yildeeʼgo didlidígi átʼéego dadidoolił.
13 Nízaadi dahonohłóonii, baa niséyáhígíí baa dahodoohtsʼı̨́ı̨́h, áádóó áhánígóó dahonohłónígíí, bee ayóó áníshtʼéii baa ákodanohsįįh.
14 Záíyandi bąąhági ádaaníiłii nídaaldzid; doo Diyin God kʼehgo ádaatʼéii éí yééʼ yikʼee tsídadoolyiz. Háishąʼ nihitahgi kǫʼ óʼoołdįįłii yił kééhatʼı̨́į doo? Háishąʼ nihitahgi hoolʼáágóó hodookʼą́ąłii yił kééhatʼı̨́į doo?
15 Tʼáá ákogi átʼéego yigáałii áádóó tʼáá ákogi átʼéego yáłtiʼii, ade óʼólzin bee aʼiideeł yijoołáii, bee nahoʼdiiniihii doo yinízingóó bílaʼ yigháadii, diné bidił deeznaʼgo doo tʼáá kʼad yaa hodiiztsʼą́ąʼii, doo yáʼátʼéehgo ádahooníiłii yichʼįʼ nániilchʼiłii
16 éí wódahgo kééhatʼı̨́į doo; tséghą́ąʼdi nehedzíih doo; chʼiyáán baʼiiltsóod doo; tó éí doo bee ádoodįįł da.
17 Aláahgo naatʼáanii yee ayóó ánóolninii yidííłtsééł; kéyah doo deeghánídi hazʼánígíí deiníłʼı̨́į doo.
18 Bikʼee nił yéeʼii nijéí biyiʼdóó nabikʼítsíníłkees doo. Háájíshąʼ nahalyéii yółtaʼii? Háájíshąʼ dah adiyiileehii? Háájíshąʼ kin yadaaʼáii haisíidgo yółtaʼii?
19 Diné tʼóó báádahadzidii áádóó bizaad nantłʼago doo nił bééhózinii índa ałtʼadandzihgo yádaałtiʼgo doo bikʼidiitįįhígíí doo néidííltséeł da.
20 Záíyan kin haalʼáagi hodílzingo áłah nídaʼadleeh baa nináʼáldahígíí bichʼįʼ díníʼı̨́ı̨́ʼ; Jerúsalemgi hodéezyéelgo diné kééhatʼı̨́įgo tʼáá éí níbaal dílzinii doo niʼnidooltsosii yidííłtsééł, áádóó bá anídaalkałí doo nahjįʼ hahidooʼnił da, doo nidi tłʼóół łaʼ kʼídooʼnish da.
21 Nidi áadi tooh ayóó áníłtéelgo índa tó nílíinii nahalingo Bóhólníihii ayóó átʼéii nihichʼįʼ átʼée doo; éí tooh biiʼgóó tsinaaʼeeł bee naʼabaahii índa tsinaaʼeeł ayóó átʼéii bee akʼeh hodidlíinii doo nináádaaʼeeł da doo.
22 Háálá Bóhólníihii ánihwiiʼaahii nihá nilı̨́, Bóhólníihii bee hazʼáanii nihaidiiʼaahígíí nilı̨́, Bóhólníihii aláahgo nihinanitʼaʼí nilı̨́; éí yisdánihidoonił.
23 Tsin ałníiʼgi ííʼáhígíí tłʼóół ałtsʼą́ą́ʼ dabółdonii dadiniitłóoʼgo doo nídeidiłtsʼǫǫd da; níbaal neiłʼeełii doo nídoolbał da, áko naalyeʼé deisnánígíí ałtaidooʼnihgo, nidaʼniłhodii łaʼ bííʼ dadooleeł.
24 Áádóó kééhatʼínígíí doo łaʼ daastsaah didooniił da; diné ákwii kéédahatʼíinii doo ákwii ádáátʼįįdii bá yóóʼadahididootʼááł.
