John 3:1-36
3 Ákweʼé Férisii danilíinii bitahdóó diné łaʼ, Nikodíímas joolyéego, Jew dineʼé binanitʼaʼí jílı̨́.
2 Díí diné tłʼéeʼgo Jesus yaa níyáago áyidííniid, Naʼnitiní, Diyin God bitsʼą́ą́dę́ę́ʼ naʼnitinii nílı̨́įgo nihił béédahózin, háálá diné łaʼ Diyin God doo hoł hólǫ́ǫ́góó, bibee adziilii bee béédahózinii baa nanináhígíí chʼééh ázhdoołʼįįł.
3 Jesus áhodííniid, Tʼáá aaníí, tʼáá aaníígóó ándishní, Diné doo náábiʼdizhchı̨́ı̨́góó, Diyin God bee bóhólníihgo bił hazʼáanii tsʼídá doo yoołtsééł átʼée da.
4 Áko Nikodíímas áhodííniid, Haash yitʼéego diné łaʼ haastihgo náábidiʼdoochííł? Daʼ hamá biishchʼidísh biih nízhdoodáałgo nááhodiʼdoochííł?
5 Jesus ánááhodooʼniid, Tʼáá aaníí, tʼáá aaníígóó ándishní, Diné éí tó índa Níłchʼi Diyinii doo bee nááhoʼdizhchı̨́ı̨́góó Diyin God bee bóhólníihgo bił hazʼáanii doo biih jóyaʼ átʼée da.
6 Tsʼídá atsʼíís bee hoʼdizhchíinii éí tʼáá atsʼíís jílı̨́ índa Níłchʼi Diyinii bee hoʼdizhchíinii éí tʼáá níłchʼi jílı̨́.
7 Tsʼídá náánidiʼdoochííł nidishnínígíí tʼáadoo bikʼee tʼóó nił ahayóí.
8 Níyol tʼáá bí nízingóó níyol, tʼóó dinitsʼaʼgo éí dinitsʼaʼ, nidi deeyoldę́ę́ʼ índa ííyolgóó éí doo nił bééhózin da, áko Níłchʼi Diyinii bee nidahachíihii ałdóʼ tʼáá ákódaatʼé.
9 Nikodíímas áhodííniid, Haash yitʼéego díí ákódadoonííł?
10 Jesus hachʼįʼ hanáánáádzíiʼgo áhodííniid, Ízrel dineʼé nanítin, daʼ ákoósh díí doo bikʼiʼdiitįįh da?
11 Tʼáá aaníí, tʼáá aaníígóó ándishní, Nihí nihił béédahózinígíí bee hadahiidziih, áádóó daníilʼı̨́ʼígíí baa dahwiilneʼ, nidi baa dahwiilneʼígíí doo nídadoohłée da.
12 Nahasdzáán bikáaʼgi áhootʼéhígíí bee nił hweeshneʼ nidi doo yinídlą́ą dago, yáʼąąshdi áhootʼéhígíí bee nił hweeshneʼgo haash yitʼéego áłtʼąą éí yidíídląął?
13 Yáʼąąshgóó doo łaʼ naayáhí da, tʼáá hazhóʼó yáʼąąshdę́ę́ʼ hadááyáhígíí, Diné Silı̨́įʼii tʼéiyá [tʼáá éí yáʼąąshdi hojílónígíí].
14 Tʼáá honoojíidi Mózes éí tłʼiish dah hizhdiiłtʼeʼ yę́ęgi átʼéego, Diné Silı̨́įʼii dah hididooltʼeeł,
15 áko tʼáá háiida boodlą́ągo baa dzólíhígíí éí [doo ádoodįįł da, nidi] iiná doo ninítʼiʼii bee hólǫ́ǫ dooleeł.
16 Háálá Diyin God éí nihokááʼ dineʼé tʼáá íiyisí ayóóʼájóʼníigo bąą haYeʼ tʼááłáʼí há yizhchínígíí baazhníłtı̨́, áko tʼáá háiida boodlą́ągo baa dzólíhígíí éí doo ádoodįįł da, nidi iiná doo ninítʼiʼii bee hólǫ́ǫ dooleeł.
17 Háálá Diyin God haYeʼ nilíinii nahasdzáán bikáaʼjįʼ jiníłʼaʼígíí éí doo nihokááʼ dineʼé yá nihodiyooʼááł biniyé jiníłʼaʼ da, nidi bí bee nihokááʼ dineʼé yisdádooʼnił biniyé jiníłʼaʼ.
18 Tʼáá háiida boodlą́ągo baa dzólíii éí doo bá nihootʼą́ą da, nidi doo boodlánígíí éí tʼáá íídą́ą́ʼ bá nihootʼą́ągo átʼé, háálá Diyin God haYeʼ tʼááłáʼí há yizhchínígíí bízhiʼ doo bił danilı̨́ı̨́góó tʼáadoo dayoosdląąd da.
19 Áko díidí biniinaa diné baa nídahódóotʼįįł, jó, adinídíín nilíinii nahasdzáán yikááʼ niníyá, nidi doo bił yáʼádaatʼééhgóó chahałheełjí tʼéiyá tʼáá íiyisí bił yáʼádahootʼééh, háálá yee ádaaníiłii doo yáʼádaashǫ́ǫ da.
20 Háálá tʼáá ádzíłtso doo yáʼáshǫ́ǫ́góó ádajooníiłii éí adinídíín nilíinii dajijoołá, áko doo yitʼíní íʼdazhdiʼdoolníłígíí biniyé doo łaʼ adinídíinjįʼ chʼídajíkáah da.
21 Nidi tʼáá aaníígóó ádajooníiłii éí tʼéiyá adinídíinjįʼ nijiikááh, ádajooníłígíí Diyin God bikʼehgo átʼéego bééhodoozįįł biniyé.
Jesus áádóó John Tó Yee Ası̨́įhii
22 Kódaadzaadóó bikʼijįʼ Jesus índa hódahoołʼaahii bił kéyah Judíyadi jíkai, áko tʼáá ákwii bił nijikaigo tó bee daʼdzisı̨́ı̨́h nítʼééʼ.
23 John ałdóʼ Séílimdóó tʼáá áyídígi Íínan hoolyéegi tó yee ası̨́ı̨́h nítʼééʼ, ákweʼé tó ląʼí hólǫ́ éí bąą, áko diné áłah silı̨́įʼgo ákwii tó bee dadzíísı̨́ı̨́ʼ.
24 Háálá íídą́ą́ʼ John tʼah doo yah abiʼdiltʼeʼ da.
25 John bídahoołʼaahii łaʼ índa Jew dineʼé nilíinii hodílzingo tááʼágisígíí biniinaa ałghadaʼditʼáahgo yaa nídiikai.
26 Áko John baa jíkaigo ádabizhdííniid, Naʼnitiní, Jórdan biláahdi bił naniʼaashgo baa hwíínílneʼígíí, jóʼakon, tʼáá éí tó yee ası̨́įhgo diné tʼáá ałtso baa hakááh.
27 John haadzíiʼgo áhodííniid, Diné tʼáadoo baa doodiłí da, tʼáá hazhóʼó yáʼąąshdę́ę́ʼ tʼéí baʼdoodił.
28 Shí doo Christ nishłı̨́į da, nidi tʼóó hatsijįʼ shiʼdeelʼaʼ, dishníigo haasdzíiʼii, tʼáá nihí shá nihił béédahózin.
29 Báʼdoogehii éí adooyehii bííʼ jílı̨́, áko iiyehii bikʼis jílíinii, bíighahgóó dzizı̨́įgo jíistsʼą́ąʼii éí adooyehii biinééʼ jidiitsʼaʼgo tʼáá íiyisí baa hoł hózhǫ́, díí bił ałkʼehgo tʼáá íiyisí shił hózhǫ́ǫgo áshiʼdiilyaa.
30 Hó éí tsʼídá ayóó átʼéii jidooleeł, nidi shí éí aʼoh deeshłeeł.
Wótʼááhdę́ę́ʼ hadajííyáii
31 Wótʼááhdę́ę́ʼ hadajííyáhígíí éí tsʼídá tʼáá ałtsoní biláahgo ájítʼé; tʼáá háiida nahasdzáán bikááʼdóó jílínígíí éí tʼáá nahasdzáán bikááʼdóó nijighá, áko tʼáá nahasdzáán tʼéí baa yájíłtiʼ; yáʼąąshdę́ę́ʼ hadajííyáhígíí éí tsʼídá tʼáá ałtsoní biláahgo ájítʼé.
32 Tʼáá jiiłtsánígíí índa jidiiztsʼą́ʼígíí éí baa hojilneʼ, nidi diné doo łaʼ hahaneʼ yaʼooliih da,
33 áko hahaneʼ yaʼoozlíʼígíí tʼáá ákótʼé Diyin God tʼáá aaníí lá níigo yee lą́ asłı̨́ı̨́ʼ.
34 Jó, Diyin God biníłʼaʼígíí éí Diyin God bizaad yee yáłtiʼ, háálá éí Níłchʼi Diyinii tʼáadoo bíʼneelʼąąhí eidiiʼaah;
35 aTaaʼ éí aYeʼ ayóóʼáyóʼní, áko tʼáá ałtsoní yílákʼeidííʼą́.
36 Tʼáá łaʼ aYeʼ joodlą́ągo beijólíii éí iiná doo ninítʼiʼii hwee hólǫ́; tʼáá łaʼ aYeʼ doo joodlą́ą́góó doo bikʼeh hojíłʼíinii éí iiná doo yizdoołtséeł da, nidi Diyin God tʼóó báhádzidgo bibee atéʼélʼíinii hakʼigi hólǫ́.
