Proverbs 17:1-28
17 Haghangi ádaʼazįįdgo saad hólóonii biláahgo bááh tʼáá bízhání jiyą́ągo tʼáadoo íitsʼaʼí dzizdáájí agháago yáʼátʼééh.
2 Ayeʼ baa yáhásinii áyoolíiłii éí naalʼaʼí hóyáanii binantʼáa dooleeł, áko éí ayeʼ bikʼisóó danilíinii bííʼ dadooleełii naalʼaʼí yił ałtsʼą́ą́ʼ daʼíłkʼiiz doo.
3 Ásaaʼ biiʼ béésh łigaii bąąh hadilyı̨́hí béésh łigaii bá átʼé, áádóó déédíljah góneʼ óola biiʼ dilyı̨́hí óola bá átʼé, nidi Bóhólníihii éí ajéí nayínítaah.
4 Diné doo yáʼájíshóonii éí diné doo yáʼáshǫ́ǫ́góó yáłtiʼii ayóo jíistsʼą́ą́ʼ, áádóó hayoochʼíidii éí diné bee ádíláahgo yáłtiʼii ayóo jíistsʼą́ą́ʼ.
5 Diné łaʼ éí bahojoobáʼíii bá nahojiłtʼiʼgo Áhoolaii doo hoł nilı̨́į da áádóó diné łaʼ báádahadzidgo ádahooníiłii baa hoł hózhónígíí éí tsʼídá atíhodiʼdoolnííł doo baa dáázhdidoogáał da.
6 Hastóí danilíinii análíké índa atsóóké baa bił dahózhǫ́, áádóó áłchíní danilíinii dabizhéʼé baa bił dahózhǫ́.
7 Diné doo áhályáanii aizdooʼı̨́įgo niyáháłtéehgo doo beełtʼée da, áádóó tʼah nááyówehígo naatʼáanii biyoochʼíidgo doo beełtʼée da.
8 Bee nahoʼdiizniiʼii éí nahwiiłniihígíí nitłʼiz ílíinii nahalingo yaa nitsíkees; éí bee nahoʼdiizniiʼii dah yooléełii bee yáʼátʼéehgo bá áhooníił doo.
9 Diné łaʼ bee hazʼáanii hetíihii neiniłʼingo éí ayóóʼóʼóʼní hólǫ́ǫ dooleełgo átʼı̨́, nidi diné yeinítʼíinii éí diné ałchʼodaaʼníinii ałchʼįʼ yidiiłkʼąąh.
10 Diné hóyáanii bichʼahoʼdooshkeedgo bidídóołniił, nidi doo áhályáanii neeznádiindi nábiʼdooltsxas nidi, doo bidídóołniił da.
11 Diné ádił naalteehgo naagháii éí doo yáʼáshóonii hátʼı̨́; éí bąą doo yitsʼíídgóó haneʼ neiʼáii hachʼįʼ doolʼaał.
12 Diné doo áhályáanii bidoo hóshkał tʼáá náás yoołtʼihgo bidááshníyáii biláahgo shashtsaʼii biyázhí bee neestʼı̨́įʼii bidááshníyáájí agháago yáʼátʼééh.
13 Tʼáá háiida yáʼátʼéhígi áátʼįįdgo bidiníná doo yáʼáshónígi áńjíítʼįįdgo haghan hazʼą́ą́dóó doo yáʼáshóonii doo dah hodidooleeł da.
14 Diné łaʼ tʼóó ahinídiiltłahígo tó didlaadígíí bił ałkʼeh; éí bąą tʼah doo ahinídoołtłáádgóó ałchʼįʼ naałdzilígíí nídinoołtłóohgo nahjįʼ nidinohʼaah.
15 Tʼáá háiida diné doo yáʼáshóonii yáʼátʼéehgo yá yáłtiʼii áádóó diné tʼáá ákogi átʼéii baa níjítʼíinii tʼáá ájíłah Bóhólníihii doo hółdin da.
16 Haʼátʼíí lá biniyé diné doo hóyáanii yee akʼididootı̨́įłii bee ádingo bee hódzáanii nahashniih níigo dah doolnih?
17 Akʼis éí tʼáá áłahjįʼ bił ayóóʼáhijóʼníi łeh, áádóó hade áhootʼįįhgo tʼáá łaʼ bił hajííʼáázh yileeh.
18 Diné akʼiʼdiitįįh bee ádinii éí yił kééhatʼíinii binááł diné łaʼ béeso baʼíʼníiłgo shí bá sézı̨́į dooleeł níigo naaltsoos bikááʼ bízhiʼ áyiiłʼįįh.
19 Ahinídiiltłáád ayóóʼáyóʼníinii éí bee hazʼáanii hetííh ayóóʼáyóʼní, áádóó dooládóʼ shída nízingo bidáádílkał naashchʼąąʼgo yee ádootʼíinii éí atíbidiʼdoolnííł hátʼı̨́.
20 Diné bijéí biiʼ nahagiz hólóonii yáʼátʼéehgo doo bá áhooníił da doo, áádóó doo yáʼáshǫ́ǫ́góó yáłtiʼii bichʼįʼ hodiiʼnááh.
21 Diné éí hayeʼ há yizhchíinii doo hóyą́ą́góó deeyáii yínííł yiih hóółtʼeʼ, áádóó diné doo áhályáanii hazhéʼé doo hąą bił hózhǫ́ǫ da.
22 Ajéí bił hózhóonii éí azeeʼ idééłnínígíí nahalingo yáʼátʼééh, nidi yínííł hade átʼįįhgo hatah doo ákóhoołʼįįh da.
23 Diné doo yáʼáshóonii éí tʼáá ákótʼéego dahonítʼiʼii łahgo átʼéego ádeidoolííł biniyé tʼáá nahontʼinee tʼáadoo leʼé beilyééh.
24 Bee akʼiʼdiitįįhii bee hólóonii bidááhgóó hódzą́ hólǫ́, nidi diné doo hóyáanii nahasdzáán nidahoneesʼą́ąjįʼ déezʼı̨́ı̨́ʼ.
25 Ayeʼ doo hóyą́ą́góó naagháii bizhéʼé bąąh bíniʼ, áádóó bimá bijéí yineesgai.
26 Nááʼáłdóʼ diné tʼáá ákogi ádaatʼéii atíjíłʼíinii índa diné bídahólníihii tʼáá ákogi átʼéego deíkáahii biniinaa názníłtsʼingo doo yáʼátʼéeh da.
27 Diné ił ééhózin bee hólǫ́ǫgo éí bizaad ááyoosįįł, áádóó diné akʼidiʼyiitįįhii doo ádił nídiiltéeh da.
28 Azhą́ diné doo hóyáanii nidi, doo yáłtiʼgóó hóyą́ągo baa nitsáhákees, doo yádíłtihgóó diné akʼiʼdiitą́ą́ lá bidiʼniih.
