Proverbs 2:1-22
2 Shiyeʼ, shizaad nídiniláago, áádóó shibikʼeh óʼooʼníiłii hashtʼeʼnihidíʼníiłgo,
2 áko lá índa bee hódzáanii bíká naʼííníłtsʼąʼgo áádóó nijéí akʼidiʼyiitįįh baa dííníʼą́ągo,
3 ákótʼéego lą́ą ił ééhózin baa náʼiinikąąhgo akʼidiʼyiitįįh yéego yíníkeedgo
4 áádóó béésh łigaii hazhnitáhígi átʼéego áádóó yódí néesʼı̨́įʼii házdéezʼı̨́ʼígi átʼéego hánítʼı̨́įgo,
5 áko índa Bóhólníihii dólzingi bikʼidiʼdíítı̨́ı̨́ł áádóó Diyin God átʼéegi bééhodíísįįł.
6 Háálá Bóhólníihii bee hódzáanii eidiyiiʼaah; ił ééhózin áádóó akʼidiʼyiitįįh yee hahadziih.
7 Tʼáá ákogi ádaaníiłii yá hódzą́ yáʼátʼéehii hashtʼeʼniyiinííł. Tʼáá ákóneʼ átʼéego deíkáahii yá naagé nilı̨́.
8 Tʼáá ákogi ádaatʼíinii bá dahonítʼiʼii yikʼiiníʼı̨́ı̨́ʼ áádóó bidiyı̨́ı̨́ʼ danilíinii bá dahonítʼiʼgóó yá hashtʼeyósin.
9 Áko índa tʼáá ákogi átʼéii, áádóó doo haada yitʼéii índa aheełtʼéego iiná, tʼáá aaníí, éí tʼáá ákǫ́ǫ́ dahonítʼiʼígíí tʼáá ałtso nił bééhodoozįįł.
10 Jó, nijéí hodooyąął, áádóó ił ééhózin éí niiʼ sizíinii yił hodooshǫǫł;
11 yáʼátʼéehii áádóó doo yáʼátʼéehii nił bééhózingo éí bee nihídzíih doo; akʼidiʼyiitįįh naa áhályą́ą doo.
12 Áko doo yáʼáshǫ́ǫ́góó áhootʼéii áádóó nahagizgo yádaałtiʼii yitsʼą́ąjįʼ nélnáa doo,
13 áádóó diné chahałheeł nideinishin doo biniyé tʼáá ákogi átʼéego dahonítʼiʼ yitsʼádahaaskaii yitsʼą́ąjįʼ yisdándoołtééł.
14 Éí doo yáʼátʼéehii yaa nidaakaigo bił nidahoozhǫǫh áádóó diné doo yáʼádaashóonii bidoo yáʼáshǫʼ doo nahjįʼ nideidóʼááł átʼéégóó deíkáahii tʼáá íiyisí bił nidahooshǫǫh.
15 Éí bindaʼadloʼgo dahiná áádóó nidahagizgo deíkááh.
16 Áádóó ayóní, éí asdzání ałjiłnii nilíinii łikango yáłtiʼígíí yitsʼąą naa áhályą́ą doo.
17 Éí tʼáá ániid naagháádą́ą́ʼ bahastiin nilı̨́įgo hoolzhiizh yę́ę yóóʼiidííʼą́, áádóó Diyin God binááł ahaʼdeetʼáanii yaa yooznah.
18 Jó, bikin siʼánídóó anoonééł góyaa ahóótʼiʼ áádóó chʼı̨́įdiitah bił hazʼą́ą́ góyaa ahalóós.
19 Baa hakáahii doo tʼą́ą́ʼ hááhákáah da índa yáʼátʼéehgo iiná doo yikʼéhékáah da.
20 Áko diné yáʼádaatʼéehii dayíkááhgóó yínáał doo, áádóó diné tʼáá ákogi ádaaníiłii ádaatʼínígi ánítʼı̨́į doo.
21 Háálá tʼáá ákogi ádaatʼéii kéyah yikááʼ kéédahatʼı̨́į doo áádóó tʼáá ákogi ádaaníiłii ákwii kéédahatʼı̨́į doo.
22 Nidi diné doo yáʼádajíshóonii éí kéyah bitsʼą́ąjįʼ áhodiʼdooldįįł, índa ninádaʼdiiʼaahii kéyah bitsʼáhodiʼdooʼnił.
