Zechariah 14:1-21
14 Bóhólníihii beidoołkááł baa hoolzhiizhgo nihinaalyeʼé nihitsʼą́ą́ʼ nídeidiinilii nihitaanídooʼnih, jóʼakon.
2 Jó, ałʼąą dineʼé áłah ádeeshłíiłgo Jerúsalem yikʼijįʼ anaaʼ dahodoołeeł, índa kin haalʼáii deidoołnééł, áádóó daakin yił nidinóodah, áko asdzání danilíinii yił nidahadeeł doo índa kin haalʼáhígi diné kéédahatʼíinii ałnííʼdóó dabidisnáágóó adínóolkał, nidi diné daadzíʼígíí doo ábidiʼdooldįįł da.
3 Ákohgo átséédą́ą́ʼ Bóhólníihii anaaʼ náháłeehígi átʼéego chʼíhodooleełgo ałʼąą dineʼé yichʼįʼ naabaah doo.
4 Éí bijı̨́įdi Jerúsalemdóó haʼaʼaahjígo Dził Álivz hoolyéego bighą́ąʼgi dah yidoozįįł. Áko Dził Álivz ałnííʼdóó náhookǫsjigo adooldohgo, łaʼ éí shádiʼáahjigo adooldohgo haʼaʼaahdę́ę́ʼ áádóó eʼeʼaahjįʼ ayóó áhoníłtéelgo hahodiildzis hodooleeł.
5 Áádóó dził tʼáá hahodiildzis góyaa adahizhdínóohchééł, háálá éí dził bitaʼgóó tʼáá Éízaljįʼ hahodiildzis. Áko Júdah dineʼé aláahgo binanitʼaʼí Azáíyah bíyoołkááł yę́ędą́ą́ʼ niʼ nahaasnáaʼgo hadahinoochą́ʼígi átʼéego adahidínóohchééł. Ákohgo Bóhólníihii shiDiyin God honíleʼgo bidiyı̨́ı̨́ʼ tʼáá átʼé yił dookah.
6 Éí bijı̨́įdi díí baa hodoolzhish: doo náádiʼnídíin da doo; bitsʼádaʼdeezdíinii doo hózhǫ́ bee dadiʼnídíin da doo.
7 Áko éí łaʼa jı̨́ Bóhólníihii tʼéiyá bił bééhózin doo; doo jı̨́ da doo índa doo tłʼééʼ da doo, nidi anáʼátʼáahgo adinídíin doo.
8 Éí bijı̨́įdi díí baa hodoolzhish: Jerúsalemdóó tó hináanii háálı̨́įgo haʼaʼaahjįʼ tónteel biih yílı̨́į doo áádóó łaʼ eʼeʼaahjįʼ ałdóʼ tónteel biih yílı̨́į doo; éí tʼáá áłahjįʼ háálı̨́įgo nináháhááh áádóó nináháshı̨́įh doo.
9 Áko Bóhólníihii éí nahasdzáán nidahoneesʼą́ą́góó tʼáá átʼé yinantʼáa doo. Éí bijı̨́įdi tʼááłáʼí Bóhólníihii nilı̨́į doo índa tʼááłáʼí tʼéí bízhiʼ doo.
10 Gííba kin shijaaʼdóó* Jerúsalem shádiʼáahjigo Ríman kin haalʼáajįʼ* kéyah tʼáá átʼé honíteelgo áhodoolnííł. Nidi Jerúsalem éí Bénjamin bichʼéʼétiinídóó áłtsé chʼéʼétiin nítʼéʼíjįʼ áádóó nástłʼahgi chʼéʼétiiníjįʼ, índa Hanániyel bá yaʼdiitłʼinii ííʼáhídóó níléí naatʼáanii bichʼil naʼatłʼoʼii yiljizhgo bąąh hahaʼníhíjįʼ kin hanáánáálʼáa doo.
11 Ákwii kénáádahatʼı̨́į doo áádóó doo atínáádoolníił da, nidi Jerúsalemgi tsʼídá hasihgo ákwii diné kéédahatʼı̨́į doo.
12 Áko dadineʼé tʼáá ałtso Jerúsalem bichʼįʼ anaaʼ nídahojiłeehii éí Bóhólníihii díí naałniih yee atíhodoolííł; tʼáá nidzizı̨́įgo hatsʼíís ałtso dadidoołdził; hanááʼ tʼáá hanákʼeejįʼ ałtso dadidoołdził; hatsooʼ ałdóʼ tʼáá dahazéeʼjįʼ ałtso dadidoołdził.
13 Áko éí bijı̨́įdi díí baa hodoolzhish: Bóhólníihii bitsʼą́ą́dę́ę́ʼ tsʼídá ayóó átʼéego bikʼee ił áhodoodįįłii bikʼi hwiidooleełgo tʼááłáʼí nítínígo yił kééhatʼíinii deidoosiłgo yił nidaʼahilbaałgo daʼahidoogą́ą́ł.
14 Áko Júdah dineʼé danilíinii Jerúsalemgi anaaʼ dahodoołeeł. Áko ałʼąą dineʼé dajitʼíinii tʼáá átʼé áłah ádeidoolííł: óola ádaatʼéii índa béésh łigaii áádóó ééʼ ayóogo daʼílíinii bee hadaʼdítʼéii tʼóó ahayóigo áłah ádeidoolííł.
15 Áádóó díí naałniihígíí łı̨́ı̨́ʼ ałdóʼ baa níłniiʼ doo; dzaanéezda, ghą́ą́ʼaskʼidiida, téliida índa anaʼí dah deínéhígi naaldlooshii tʼáá ałtso ałdóʼ baa níłniiʼ doo.
16 Ákohgo ałʼąą dineʼé éí Jerúsalem kin haalʼáii yikʼi néijah nítʼéeʼii tʼáá nidahaasdzíʼígíí tʼáá nináháhááh bikʼeh Jerúsalemgóó ałnáádaakahgo Aláahgo Naatʼáanii, éí tʼáá ałtsoní bee Bóhólníihii nilíinii yichʼįʼ nidahałáa doo áádóó chahaʼohgi hodílzingo áłah náʼádleeh ádeiłʼı̨́į doo.
17 Áko nihokááʼ dineʼé tʼáá háiida Jerúsalemgóó doo ałnáádajikahígíí áádóó áadi Aláahgo Naatʼáanii, éí tʼáá ałtsoní bee Bóhólníihii nilíinii doo bichʼįʼ nidahojiłáhígíí éí doo hwee nidahałtin da doo.
18 Áádóó Ííjip kéyahdę́ę́ʼ dineʼé dajílíinii tʼáadoo ákǫ́ǫ́ dadeeskaigóó índa tʼáadoo nidadziiskaigóó doo hwee nidahałtin da doo, áádóó ałʼąą dineʼé éí chahaʼohgi hodílzingo áłah náʼádleeh doo bidaʼjiłʼínígíí éí Bóhólníihii doo nahałtingóó yee atíhodoolííł.
19 Ííjip dineʼé índa ałʼąą dineʼé tsʼídá tʼáá ałtso chahaʼohgi hodílzingo áłah náʼádleeh bidaʼjiłʼı̨́į doo biniyé doo ákǫ́ǫ́ ałnáádajikahígíí díí bee atídahoʼdilʼı̨́į doo.
20 Éí bijı̨́įdi łı̨́ı̨́ʼ biyoʼ bizéédadéenilígíí Bóhólníihii Bichʼįʼ Diyinii Átʼé, níigo bikááʼ akʼedaʼashchı̨́į doo, índa Bóhólníihii bikin biiʼ sohodizin góneʼ ásaaʼ chodaoʼínígíí éí bikááʼ nááʼiiniihí bíighahgi łeetsʼaaʼ sinilígíí nahalin dooleeł.
21 Áko Jerúsalemgi índa Júdahgi ásaaʼ tʼááłáʼí níʼánígo tʼáá ałtsoní bee Bóhólníihii bá atsʼádeetʼą́ągo dadílzin dooleeł. Ákohgo náádadiʼyoołnihgo nidahakáhígíí tʼáá ałtso éí yee atsįʼ nááhániihii nídeiłbish doo. Áádóó éí bijı̨́įdi tʼáá ałtsoní bee Bóhólníihii bikin biiʼ sohodizin biyiʼ Kéínan dineʼé doo łaʼ hojílǫ́ǫ da dooleeł.
Footnotes
^ Jerúsalemdóó náhookǫsjigo tsostsʼid tsin sitą́.
^ Jerúsalemdóó shádiʼáahjigo tádiindóó baʼaan tseebíí tsin sitą́.
