NÓAH biyóołkáałgo tó yíląąd yę́ę dóó bikʼijįʼ 350 nááhai. Éíbraham éí Er hoolyéedi diné ayóó átʼéego daʼatʼı̨́įgo bił kééhojitʼı̨́ı̨́ ńtʼééʼ. Éí kʼad ákweʼé Iraq hoolyé. Éíbraham éí hweʼoodląʼ ayóó ábóodziil, ńtʼééʼ hweʼoodląʼ éí nabíhoʼdineestą́ą́ʼ.

Jiihóvah éí Éíbraham kéyah biiʼ niʼdizhchínígíí bitsʼą́ąjįʼ, Kéínan kéyah doo ééhonísingóó díínééł hodííniid. Áko Éíbraham tʼáá akǫ́ǫ́ akʼeh hojííłʼįįd. Hweʼasdzą́ą́ Sárah, hatsilí biyeʼ Lat, dóó há nidaalʼaʼii tʼáá ałtso bił dashdiiná. Áádóó nízaadgóó nizhnínáago Kéínandi níbaal biiʼ dahaghango naa níjooʼnééł. Jiihóvah éí Éíbraham yił ahaʼdeetʼą́ągo kódííniid, ni nitsʼą́ą́dóó dineʼé ayóó átʼéego ádeeshłííł. Áádóó nahasdzáán bikááʼ tʼáá ałtso dahooghangóó ninahjįʼ bikʼidahojídlíi doo, dóó nitsʼą́ą́dóó daʼdeezhchínígíí éí kéyah Kéínan daa bííʼ dadooleeł.

Éíbraham dóó Lat éí ayóó átʼéego ajitʼı̨́ jizlı̨́ı̨́ʼ, tʼóó ahayóí dibé dóó béégashii háánootʼı̨́įłgo dashʼnoołkał. Éíbraham éí Lat áłtsé yaa nitsíkeesgo kéyah yinízinígíí bichʼįʼ kójiilaa. Lat éí Jórdan tooh binaagóó ayóó nidaʼnitʼąʼígi níizhdiiʼą́ áádóó Sádam bíighahgi nizhníná. Sádamgi diné tʼáá hó ahaa ninájíldeehgo bee béédahoʼdílzin. Éí tʼóó badaaʼihii Jiihóvah bikʼijįʼ baa jookah.

Jiihóvah God éí tʼahádóó Éíbraham anáánéedooʼniid, ni éí yá biyiʼdi sǫʼ doo jóołtaʼ ánéelą́ʼígi átʼéego naʼáłchíní háánootʼı̨́ı̨́ł doo. Díí bee haʼoodzíʼígíí joosdląąd. Ákondi hweʼasdzą́ą́ Sárah tʼahdoo awééʼ hwee haleeh da. Éíbraham éí 99 hwinááhaigo, áádóó Sárah éí kʼadę́ę 90 hwináháahgo God éí Éíbraham ííłní; niheʼawééʼ hodooleeł. God ádííniid yę́ę tʼáá aaníí silı̨́ı̨́ʼ, Sárah éí Áízak yishchı̨́. Éíbraham éí haʼáłchíní łaʼ nááhódlǫ́ǫ ndi, Áízak éí Íídendi Yisdáʼiiníiłii bee haʼoodzííʼ yę́ę hatsʼą́ą́dóó biʼdidoochííł.

Tʼáá ákweʼé nahalzhiishgo, Lat dóó baʼáłchíní Sádamgi dabighan. Ndi Lat tʼáá ákogi ájoonííł, éí ákweʼé diné tʼóó baaʼihgo tʼáá hó ahaa ninájíldeehígíí doo ajítah da. Jiihóvah éí Sádamgi diné áhodeeshdįįł niizı̨́ı̨́ʼ, áko níłchʼigo bá nidaalʼaʼí léiʼ, Lat bił hodoonih biniyé tʼáá bítséedi akǫ́ǫ́ yichʼįʼ ayííłʼaʼ. Éí níłchʼigo nidaalʼaʼí Lat dóó baʼáłchíní Sádamdę́ę́ʼ tsı̨́įłgo chʼínóhjeeh tʼáadoo nátʼą́ą́ʼ nídasídóotʼı̨́ʼí yidííniid. Áádóó God éí kǫʼ dóó tsékǫʼ łitsoii yee Sádam yikʼijįʼ nayííłtą́ dóó Gomárah kin łaʼ áyídígóó dah náánáshjaaʼígíí tʼáá bił. Díí ákwii kéédahojitʼínígíí ałtso íísdįįd. Lat éí bitsiʼ nidiltʼéego tʼáá bí tʼéiyá yił yisdáákai. Ndi hweʼasdzą́ą́ éí nátʼą́ą́ʼ nízhdéétʼı̨́ı̨́ʼ. Haʼátʼííshı̨́ı̨́ hwee hólónę́ę bitsʼą́ąjįʼ joojahígíí daatsʼí bíká nátʼą́ą́ʼ nízhdéétʼı̨́ı̨́ʼ. Áko Jiihóvah doo bikʼeh ájiidzaaígíí biniinaa dajiztsą́.

​—Genesis wóltaʼii 11:10dóó 19:38jįʼ biiʼ baa haneʼ.