Jiihóvah Yá Dahalneʼé dah yiihkahígíí éí hastóí nihá naazínígíí doo bichʼįʼ ndaʼazláa da. Tʼáá níléídę́ę́ʼ oodlání áłah nídaʼadleehę́ęgi átʼéego, hastóí Diyin God Bizaad bibee hazʼáanii binahjįʼ yíneełʼą́ągo akʼidadéezʼı̨́ı̨́ʼ doo biniyé nídabiʼdiisʼnil. Díí éí ‘dibégi átʼéego Diyin God dayoodláanii tʼáá łaʼ bizhiʼee baa ádahołyą́’ dabiʼdooʼniid. (Acts 20:28) Díí hastóí dahóyą́ągo níłchʼi diyinii yikʼeh ádaatʼé, éí áłah nídaʼadleehgi yá alą́ąjįʼ naazı̨́įgo yaa ádahalyą́. “Tʼáadoo bínihidiʼnilkadí, . . . Bikʼé shichʼįʼ azláago tʼéiyá tʼáadoo danohsiní, nidi bídanoohdlı̨́įgo baa nidaahkai” dabiʼdooʼniid. (1 Peter 5:1-3) Haʼátʼíísh naanishígíí nihá ádeełʼı̨́?

Nihaa ádahalyą́ dóó nihikʼidadéezʼı̨́ı̨́ʼ. Hastóí oodlání yá naazíinii áłah náʼádleehígíí diyin kʼehgo yaa ádahalyą́ągo dayéeʼéesh. Díí hastóí bił béédahózingo éí God baa dzoozlíiʼgo naanish nitsaago baa dadeestʼánígíí God bidineʼé doo yikʼih ádídahólníih da. Áko tʼóó nihitah yáʼádahoohtʼééh dóó nihił nidahozhǫǫhgo ádanihósin. (2 Corinthians 1:24) Dibé yaa áhályáanii bidibéhéh tʼáá łáʼí nítínígo hazhóʼó yaa áhályą́ nahalinígi átʼéego, díí hastóí yił áłah nádleehígíí tʼáá łáʼí nítínígo yéédahósin.​—Proverbs 27:23.

God íinízinii bikʼehgo íitʼı̨́į dooleełígíí yee nidanihinitin. Tʼáá damóo náʼoodleeł bikʼeh díí hastóí oodlání yá naazíinii nihee oodlą́ dabidziilgo ánídayoodlííł. (Acts 15:32) Díí hastóí ádaa ádaʼdeestʼánígíí nahaneʼ yá alą́ąjįʼ naazı̨́įgo nihił nidahalneʼ, dóó díí nahaneʼígíí yee nidanihinitin.

Tʼááłáʼí niitínígo chánah ádanihósin. Hastóí oodlání yá naazíinii diyin kʼehgo oodááłígi yee nihíká anídaalwoʼ. Tʼáá nihighangi łaʼ da nihaa dooʼash, doodaiiʼ Kingdom Hallgi Diyin God Bizaad yee chánah niidlı̨́įgo ádanihidoolííł.​—James 5:14, 15.

Díí hastóí éí áłah náʼádleehgi bindaanish dahólǫ́. Áádóó tʼáá bíghą́ąhjįʼ béeso ádá yikʼé deiyílníísh dóó dabighangi binaanish dahólǫ́, áájí ałdóʼ yá ndahasʼą́ągo binaanish ádayósin. Díí hastóí yéigo nihá deiyílníshígíí nihił danilı̨́į doo.​—1 Thessalonians 5:12, 13.

• Hastóí oodlání yá naazínígíísh haʼátʼíí bindaanish?

• Díí hastóí oodlání yá naazíiniiígííshąʼ haitʼéego tʼááłáʼí niitínígo nihaa ntsídaakees?