AYÓÓʼÍÍNÍʼNÍNÍGÍÍ łaʼ doodaiiʼ tʼáá yéigo nąąh dahazʼą́ niʼdooʼniidgo, díí tʼáá íiyisíí nitsíhwiiłkees łeh. Azeeʼálʼı̨́ı̨́dę́ę́ʼ haʼátʼíísh naashiʼdiʼnih jinízingo bééjíldzid łeh. Éí bikʼeh nídoolyéełgi doodaiiʼ hoʼdínóolʼįįł tʼáá biʼoh níjídleeh biniinaa bééjíldzid łeh. Doodaiiʼ azeeʼ haiʼníłígíí ndi tʼáá baʼátʼeʼ hólǫ́ǫgo bééjíldzid dóó idaʼdiiłʼáhígíí hade áhoołʼįįh. Kótʼéego yéigo hąąh dahazʼą́ągo baa nitsáhákeesii hade atʼįįh.

Haʼátʼíísh nihíká adoolwoł? Ląʼída éí God yichʼįʼ sodadilzingo bíká análwoʼ dóó Diyin Bizaad  dajółtaʼgo bee hadaʼjólní. Ayóóʼádahóʼníigo łaʼ háká anídaajah.

Robert, 58 honááhai, ájíní: “God yiniidlą́ągo bee nichʼįʼ nahwiiʼnánígíí yee níká adoolwoł. Jiihóvah bichʼįʼ sodílzin. Biníłchʼi diyinii yíníkeedgo ánítʼéhígíí bee bił hólneʼ. Yáʼátʼéehgo nitsíníkees dóó nikʼéí yee hadaʼólníi doo, índa nichʼįʼ nahwiiʼnánígíí bichʼįʼ haʼíínílníi doo, Jiihóvah bííníikeedgo níká adoolwoł.”

“Yínííł nijigháago, hakʼéí háká anídaajahgo éí yáʼátʼééh. Tʼáá ákwíí jı̨́ shichʼįʼ nídahalnih, ‘Tʼáásh yáʼátʼéehgo nee ooʼááł?’ daaní. Dashikʼis danízaad dabighan ndi saad haʼahóní yee shichʼįʼ yádaałtiʼ. Éí tʼáá íiyisíí shitah yáʼáhootʼéehgo áshósin, doo niʼ kódeeshłíił da nisin yee shíká análwoʼ.”

Nikʼis bitah honeezgaigo bééníyáago, Linda ánínígíí baa nitsíníkees: “Bitah honeezgaígíí éí iiná yáʼátʼéehgo ájíłʼínę́ę jinízin. Dóó kʼad ájítʼéhígíí doo baa yájíłtiʼ da. Haʼátʼíí shı̨́ı̨́ bee ałchʼįʼ yájíłtiʼ yę́ę tʼáá bighą́ąhjįʼ łaʼ baa yináájíłtiʼ.”

God bitsʼą́ą́dóó bee adziil dóó Diyin Bizaad deiyíníiltaʼgo bee hadaʼííníilní, nihikʼéí dóó danihikʼis yee yíká anídaajah. Tʼáá áhánéehii dahiniiʼnáa doo. Azhą́ tʼáá yéigo nihąąh ndahazʼą́ą ndi bee hadaʼííníilní.