Ku haahingwireho obwire Yesu aherize kweyoreka entumwa, Petero akaza kujuba eby’enyanja aha Nyanja Galilaaya. Tomasi, Yakobo, Yohaana, n’entumwa abamwe bakagyenda nawe. Ekiro kyona bakajuba kwonka tihaine kibaakwastire.

Omu kasheeshe akakuratsireho, ku bwabaire nibusheesha bakareeba omushaija ayemereire aha nkungu. Akabeeta ari seeri y’enyanja yaababuuza ati: ‘Hariho eki mwakwatsire?’ Bakamugarukamu bati: “Ngaaha!” Omushaija akabagira ati: “Mutegye akatimba aha rubaju rwa buryo rw’obwato.” Ku baakikozire, akatimba kakaijura eby’enyanja bingi kabarema n’okwiha omu maizi. Bwanyima Yohaana akamanya ngu omushaija ogu ni Yesu kandi akagira ati: “Ni Mukama waitu.” Ahonaaho, Petero akaguruka yaagwa omu maizi yaaziha yaaza aha nkungu. Abeegi abandi bakamukuratira bari omu bwato.

Ku baahikire aha musheenyi, bakareeba omugaati n’eby’enyanja biri aha muriro. Yesu akabagira ngu bareete bimwe aha by’enyanja byabo  boongyere aha by’okurya. Bwanyima akabagira ati: ‘Mwije mutungye kyantsya.’

Ku baaherize kurya kyantsya, Yesu akabuuza Petero ati: ‘Noonkunda okukira okujuba eby’enyanja?’ Petero akamugarukamu ati: ‘Eego, Mukama wangye; naiwe nookimanya.’ Yesu akamugira ati: “Riisa abaana b’entaama zangye.” Yesu akagaruka yaabuuza Petero ati: ‘Petero, noonkunda?’ Petero akamugarukamu ati: ‘Mukama wangye; noomanya ngu niinkukunda.’ Yesu akamugira ati: “Riisa entaama zangye.” Yesu akamubuuza omurundi gwa kashatu. Petero akehurira kubi. Akamugarukamu ati: ‘Mukama wangye, iwe noomanya byona; noomanya ngu niinkukunda.’ Yesu akamugira ati: “Riisa entaama zangye.” Bwanyima akagambira Petero ati: “Nkurata.”