Omwisraeli orikumanywa nka Elukaana akaba aine abakazi babiri, Hanna na Penina, kwonka akaba naakunda munonga Hanna. Penina akaba areetera Hanna kugira amaganya obwire bwona, ahakuba Hanna akaba ataine mwana kandi Penina akaba aine abaana baingi. Buri mwaka, Elukaana akaba atwara eka ye Shiilo aha ihema kuramya. Eizooba rimwe ku baabaire bariyo, akeetegyereza ngu omukazi we omukundwa Hanna akaba aine amaganya. Akamugira ati: ‘Hanna, otarira. Onyine. Niinkukunda.’

Bwanyima, Hanna akaza kushaba ari wenka. Akaba naarira arikweshengyereza Yehova ngu amuhwere. Akaraganisa Yehova ati: ‘Yehova, ku orampe omwana w’omwojo, niinyija kumukuha, kandi naija kukuheereza ebiro byona ebi arimara omu nsi.’

Omunyamurwa Omukuru Eli akareeba eminwa ya Hanna neeguma neimuka, kandi akateekateeka ngu akaba asinzire. Hanna akamugarukamu ati: ‘Tikwo kiri mukama wangye, tiinsinzire. Nyine amaganya maingi, kandi nigo ndiyo niingambira Yehova.’ Eli akamanya ngu eki yaateekateekire kikaba kitahikire kandi yaamugira ati: “Ruhanga akuhe eki waamushaba.” Hanna akahurira gye kandi yaagyenda. Omwaka gutakahweire, akazaara omwana w’omwojo yaamweta Samueli. Teekateeka aha kushemererwa oku Hanna yaagizire.

 Hanna tareebirwe eki yaaraganiise Yehova. Ku yaaherize kucuutsya Samueli, akamuhayo kuheereza aha ihema. Akagambira Eli ati: ‘Omwana ogu nkamushaba Ruhanga. Ebiro bye ebi arimara omu nsi, aryaguma ahongyeirwe Yehova.’ Elukaana na Hanna bakaba bataayaayira Samueli buri mwaka kandi bamureetera akakooti. Yehova akaha Hanna abandi baana bashatu b’aboojo n’abaishiki babiri.