Omwana ku arikuzaarwa, abazaire be nibagira okushemererwa, kwonka obumwe nikibaasa n’okubareetera bingi by’okukora. Nk’abazaire abarikuba baherize kutunga omwana, nikibaasa kubatangaaza kushanga ngu mwine kukoresa obwire bwanyu obwingi n’amaani kureeberera omwana waanyu. Ahabw’okugira ngu obumwe timurikubyama kandi nimugira ebiteekateeko bingi ahabw’omwana, nikibaasa kureetaho oburemeezi omu mukago gwanyu. Iwe n’ou ori nawe omu bushwere mwine kukora empindahinduka okureeba ngu mwareeberera omwana kandi mwarinda obushwere bwanyu. Obuhabuzi bwa Baibuli nibubaasa buta kubahwera omu nshonga ezi?

EKI BAIBULI ERIKWEGYESA: ‘Okukunda kugumisiriza kandi kugira embabazi.’ Kandi, okukunda ‘tikwesherurira byakwo, kandi tikurahuka kuguubwa kubi.’ (1 Abakorinso 13:4, 5) Butoosha omukazi ku arikuzaara omwana w’okubanza naamutaho munonga omutima. Kwonka, omushaija waawe naabaasa kuteekateeka ngu torikumufaho, n’ahabw’ekyo otakaayebwa ngu nawe naayenda ngu omuhe obwire. Waaba oine okugumisiriza hamwe n’embabazi, naija kumanya ngu noomukunda kandi ngu nawe naahwera omu kureeberera omwana waanyu.

“Naimwe abashaija. . . mugume mutyo n’abakazi baanyu, nk’abarikwetegyereza.” (1 Petero 3:7) Manya ngu omukazi waawe naakoresa amaani maingi omu kureeberera omwana waanyu. Ahabw’okugira obujunaanizibwa obu atamanyiriire, nikibaasa kumureetera kuruha, n’okugira amaganya. Obumwe, naabaasa kukugambira kubi, kwonka guma oikaikaine, ahabw’okuba “otarikurahuka kugira ekiniga naakira emanzi.” (Enfumu 16:32) Koresa okwetegyereza, kandi ogume omuhwere.—Enfumu 14:29.

EKI ORIKUBAASA KUKORA:

• Abashaija: Omushaija aine kuhwera omukazi we omu kureeberera omwana, nangwa n’obu burikuba buri nyekiro. Teeraho kutuubya obwire obu orikumara aha bintu ebindi kugira ngu obaase kugirira omukazi waawe n’omwana waawe obwire burikumara

• Abakazi: Omushaija waawe yaayehayo kukuhwera omu kureeberera omwana, mwikirize akuhwere. Yaaba atakozire gye eki waamuha kukora, otamucwera orubanja, kureka omu muringo gw’embabazi mworekye oku ashemereire kukikora

EKI BAIBULI ERIKWEGYESA: ‘Nibaba omubiri gumwe.’ (Okutandika 2:24) N’obu muraabe mwagira omwana omu ka yaanyu, ijuka ngu iwe n’ou ori nawe omu bushwere nimuguma muri “omubiri gumwe.” Kora kyona ekirikubaasika kureeba ngu omukago gwanyu gwaguma guhami.

Abakazi, musiime abashaija baanyu ahabw’okukwatanisa naimwe hamwe n’okubahwera. Waakoresa ebigambo ebirikworeka ngu noosiima, nibyongyera kuhamya omukago gwanyu. (Enfumu 12:18) Omushaija, oine kugambira omukazi waawe ngu noomukunda kandi ngu noomutwara nk’ow’omuhendo. Musiime ahabw’omuringo ogu arikureebereramu eka.—Enfumu 31:10, 28.

“Omuntu weena arekye kwesherurira ebye ahabwe, kureka asherure eby’okuhwera mutaahi we.” (1 Abakorinso 10:24) Ou ori nawe omu bushwere guma noomukorera ebirungi. Gira obwire bw’okumusiima, kugaaniira nawe, hamwe n’okumuhurikiza. Orekye kworeka ou ori nawe omu bushwere ngu nooyefaho wenka omu bikwatiraine n’okuteerana, kwonka ofeyo n’aha byetengo bye. Baibuli neegira eti: “Murekye kwimana, kureka mwaba muragaine omwanya.” (1 Abakorinso 7:3-5) N’ahabw’ekyo, enshonga egi mugigaaniireho mwembi mutaine ki murikusherekana. Mwagira okugumisiriza kandi mukakoresa okwetegyereza omukago gwanyu nigwija kuhama.

EKI ORIKUBAASA KUKORA:

• Otakaayebwa kugirira obwire ou ori nawe omu bushwere

• Ou ori nawe omu bushwere mmukorere obuntu bukye bw’okumureetera kwehurira ngu naakundwa, nk’okumuhandiikira akabaruha nari kumuha akaconco

EKI BAIBULI ERIKWEGYESA: “Okuruga omu buto bwawe okamanya Ebyahandiikirwe ebirikwera ebirikubaasa kukuhaisa obwengye bw’okukuhabura omuhanda gw’okujunwa.” (2 Timoseo 3:15) Tebeekanisa ebi oraije kukora kubaasa kwegyesa omwana waawe. Omwana aine bingi ebi arikubaasa kwega, n’obu arikuba akiri omunda atakazairwe. Omwana waawe yaaba akiri omunda, naabaasa kumanya eiraka ryawe kandi akwatweho n’enyehurira yaawe. Guma noomushomera n’obu yaakuba akiri muto atakeegire kushoma. N’obu yaakuba atarikwetegyereza ebi orikumushomera, nikibaasa kumuhwera kukunda okushoma yaakura.

Omwana waawe naaba atari muto kutahurikiza waaba noogamba ebirikukwata ahari Yehova. N’ahabw’ekyo, shaba omwana waawe ahuriire. (Eky’Ebiragiro 11:19) Na waaba noozaana nawe, mugambire ebi Ruhanga yaakozire. (Zaaburi 78:3, 4) Omwana waawe yaaba naakura, naija kwetegyereza ngu nookunda Yehova kandi nawe ayegye kumukunda.

EKI ORIKUBAASA KUKORA:

• Shaba Yehova kukuha obwengye bw’okwegyesa omwana waawe

• Teeraho kugarukamu ebigambo ebikuru waaba nooyegyesa omwana waawe kugira ngu atandikye kwega akiri muto