EISHOMO 41
Baibuli Neegamba ki aha Kuteerana?
Abantu baingi nibatiina kugamba aha kuteerana. Kwonka, Baibuli neegamba butunu aha kuteerana omu muringo ogutarikuhemurana. Ebi erikugamba nibitugasira. Kandi ekyo nikikora amakuru. Ahakuba Yehova niwe Omuhangi waitu. N’ahabw’ekyo naamanya ebirikutugasira. Naatworeka oku turikubaasa kukora ebirikumushemeza, n’ebiraatuhwere kwesiimira amagara ebiro byona.
1. Yehova naagamba ki aha kuteerana?
Okuteerana n’ekiconco kuruga ahari Yehova. Naayenda ngu omukazi na iba abari omu bushwere obuhikire babe nibo baateerana. Ekiconco eki nikibaasisa omukazi na iba kuzaara abaana, n’okworeka ngu nibakundana kandi ngu buri omwe naashemeza mugyenzi we. Niyo nshonga ahabw’enki Ekigambo kya Ruhanga nikigira ngu, ‘oshemererwe n’omukazi w’omu butsigazi bwawe.’ (Enfumu 5:18, 19) Yehova naayenda ngu Abakristaayo abari omu bushwere bahamire aha bakundwa baabo, kugira ngu batashambana.—Shoma Abaheburaayo 13:4.
2. Ebihagaro by’obushambani niki?
Baibuli neegira ngu ‘abashambani tibarikwija kuhungura Obukama bwa Ruhanga.’ (1 Abakorinso 6:9, 10) Abaahandiikire Baibuli bakakoresa ekigambo por·neiʹa kumanyisa ebihagaro by’obushambani. Ekigambo ekyo nikitwariramu (1) okuteerana a kw’abantu abatari hamwe omu bushwere, (2) obutingwa, (3) n’okuteerana n’enyamaishwa. Buzima ‘twayerinda obushambani,’ nitushemeza Yehova kandi naitwe nitugasirwa.—1 Abatesalonika 4:3.
SHWIJUMA GYE
Yetegyereze oku orikubaasa kwetantara ebihagaro by’obushambani, n’oku orikwija kugasirwa waaguma ori oshemeire omu micwe.
3. Yetantare ebihagaro by’obushambani
Yosefu omushaija omwesigwa akateeraho munonga kuguma ashemeire omu micwe. Shoma Okutandika 39:1-12, kubaasa kugarukamu ebibuuzo ebi:
-
Niki ekyahigire Yosefu kuhunga?—Reeba omushororongo 9.
-
Ahabw’enki nooteekateeka ngu Yosefu akacwamu gye?
Abato nibabaasa kutooreza bata Yosefu omu kuhunga obushambani obunaku obu? Zaana VIDIYO.
Yehova naayenda ngu twena twetantare ebihagaro by’obushambani. Shoma 1 Abakorinso 6:18, kubaasa kugarukamu ebibuuzo ebi:
-
Ni mbeera eki ezirikubaasa kureetera omuntu kushambana?
-
Noobaasa kwetantara ota ebihagaro by’obushambani?
4. Noobaasa kwangira okwohibwa
Ahabw’enki kitoorobi kwangira okwohibwa kugwa omu bushambani? Zaana VIDIYO, kubaasa kugarukamu ekibuuzo ekirikukurataho.
-
Ow’eishe-emwe omu vidiyo akakora ki, ku yaamanyire ngu ebiteekateeko bye n’ebikorwa bye nibibaasa kumureetera kureebya mukazi we?
Nangwa n’Abakristaayo abeesigwa obumwe tikirikuboorobera kuguma baine ebiteekateeko ebishemeire. Noobaasa kukora ki kwetantara kuguma nooteekateeka aha bintu ebitashemeire? Shoma Abafilipi 4:8, kubaasa kugarukamu ebibuuzo ebi:
-
Ni bintu ki ebi twine kuteekateekaho?
-
Okushoma Baibuli n’okwejumbira kimwe omu buheereza, nibibaasa kutuhwera bita kwetantara kushiisha?
5. Emitindo ya Yehova neetugasira
Yehova naamanya eky’oburungi bwaitu. Naatugambira oku turikubaasa kuguma turi abeecumi omu micwe, n’oku turikugasirwa twakikora. Shoma Enfumu 7:7-27 nari zaana VIDIYO, kubaasa kugarukamu ebibuuzo ebirikukurataho.
-
Omutsigazi akeeta ata omu mbeera y’okwohibwa?—Reeba Enfumu 7:8, 9.
-
Kurugiirira aha Enfumu 7:23, 26, obushambani nibubaasa kurugamu oburemeezi bw’amaani. Twaguma twine emicwe eshemeire, nitwetantara buremeezi ki?
-
Okuba abashemeire omu micwe nikituhwera kita kwesiimira amagara ebiro byona?
Abamwe nibateekateeka ngu eki Baibuli erikugamba aha butingwa ti kikorwa kya rukundo. Kwonka Yehova Ruhanga, oine rukundo naayenda ngu buri omwe ayesiimire omu kugira amagara ebiro byona. Kubaasa kuhika ahari eki, twine kugyendera aha mitindo ye. Shoma 1 Abakorinso 6:9-11, kubaasa kugarukamu ekibuuzo eki:
-
Ruhanga shi naagira ngu ebyetengo by’obutingwa nibyo bitahikire byonka?
Kubaasa kushemeza Ruhanga, twena twine kukora empinduka. Ebirungi ebirikurugamu shi nibikira okuteeraho kwaitu? Shoma Zaaburi 19:8, 11, kubaasa kugarukamu ebibuuzo ebi:
-
Ahabw’enki nooteekateeka ngu emitindo ya Yehova erikukwata aha micwe n’ey’obwengye?
Yehova ahweraire baingi kugyendera aha mitindo ye ey’emicwe. Naiwe naabaasa kukuhwera
ABAMWE NIBAGIRA NGU: “Ti kigwire omuntu kuteerana n’ou arikwenda kasita baba nibakundana.”
-
Iwe nookigambaho ki?
OMU BUGUFU
Okuteerana n’ekiconco eki Yehova yaahaire omukazi na iba abari omu bushwere obuhikire.
Okweijutsya
-
Ebihagaro by’obushambani nibitwariramu ki?
-
Niki ekirikwija kutuhwera kwetantara ebihagaro by’obushambani?
-
Nitugasirwa tuta twagyendera aha mitindo ya Yehova ey’emicwe?
JUMBURA EBINDI
Manya yaaba Ruhanga naayenda ngu omushaija n’omukazi bagaitwe kubaasa kutuura hamwe.
“Baibuli Neegamba ki aha Kutuura Hamwe Mutagaitsirwe?” (Eky’aha mukura)
Yetegyereze ahabw’enki omutindo gwa Baibuli ogurikukwata aha butingwa gutarikwenegyeza rwango.
Manya ahabw’enki ebiragiro bya Ruhanga ebirikukwata aha kuteerana okw’emiringo yoona nibiturinda.
“Okurigatsa Ebicweka by’Omubonano shi n’Okuteerana?” (Eky’aha mukura)
Omu ky’okureeberaho “Bakaantwariza omu Muringo gw’Ekitiinisa,” reeba ekyahigire owaabaire ari ekitingwa kuhindura emitwarize ye kubaasa kushemeza Ruhanga.
“Baibuli Neehindura Emitwarize y’Abantu” (Omunaara gw’Omurinzi, Apuri 1, 2011)
a Okuteerana oku okugwire nikutwariramu ebikorwa bingi, nk’okuteerana okw’obuhangwa, okuteerana omu kibunu, okurigatsa ebicweka by’enshoni eby’ondiijo, nari okubikwatakwata ngu amare.
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
