1. Abrahamu akooreka ata ngu naahamiza kimwe ngu Yehova aine oburingaaniza? (Reeba ekishushani aha kutandika.)

“OMUCWI w’emanja z’ensi yoona tarikora ebihikire?” (Okutandika 18:25) Omushaija omwesigwa Abrahamu tarabuurize ekibuuzo ekyo ahabw’okugira ngu akaba naabanganisa. Omu mwanya gw’ekyo, ekibuuzo kye kikaba nikyoreka ngu akaba naahamya ngu Yehova naija kucwera endembo ibiri, Sodoma na Gomora orubanja orw’oburingaaniza. Akaba naahamiza kimwe ngu Yehova tarikubaasa kwita “abahikiriire hamwe n’ababi.” Nikyo Abrahamu yaagiriire ngu “nikikabure.” Bwanyima, Yehova akeegambaho ati: “Rukiri, omurimo gwe guhikire; ahakuba emitwarize ye yoona n’ey’oburyo; ni Ruhanga ow’okwesigwa, otagira kutahikiirira; n’ow’amazima, kandi ohikiriire.”—Eky’Ebiragiro 31:19; 32:4.

2. Ahabw’enki kitarikubaasika Yehova kuba otaine buringaaniza?

² Ahabw’enki Abrahamu yaabaire naahamya ngu Yehova butoosha naakora ebihikire? Ahabw’okuba Yehova niwe eky’okureeberaho kikuru omu kworeka oburingaaniza n’okuhikiirira.  Nangwa ebigambo ‘oburingaaniza’ hamwe ‘n’okuhikiirira’ nibikira kukoresibwa hamwe omu Byahandiikirwe eby’Oruheburaayo ahakuba biine amakuru garikushushana. Obu emitindo ya Yehova erikuba ehikire butoosha, nikimanyisa ngu naija kucwa emanja omu muringo guhikire. Baibuli neegira eti: “Akunda okuhikiirira n’eby’oburyo” nari oburingaaniza.—Zaaburi 33:5.

3. Gamba bumwe aha butari buringaaniza oburi omu nsi obunaku obu.

³ Nikihuumuriza kumanya ngu Yehova butoosha n’omuringaaniza. Kwonka, ensi ebiro ebi eijwiremu obutari buringaaniza. Nk’eky’okureeberaho, abantu abamwe nibacwerwa emanja bateebwa omu bihome bataine mishango ei bakozire. Kwonka bwanyima y’okutunga obuhame obusya, babaasize kushanga ngu abamwe tibaine rubanja, kwonka nabwo nibaba baaherize kumara emyaka mingi omu kihome. Obutari buringaaniza nk’obwo nibureeta okutamwa n’ekiniga. Kwonka, hariho obutari buringaaniza obundi oburikubaasa kuba bugumire kwemera. Ni buuha?

4. Okwikiriza kw’Omukristaayo nikubaasa kugyezibwa kuta?

⁴ Abakristaayo nibamanya ngu nibabaasa kutwarizibwa omu muringo gutari gw’oburingaaniza aheeru y’ekibiina Ekikristaayo. Kwonka, okwikiriza kwaitu nikubaasa kugyezibwa twareeba embeera erikureebeka nk’etari y’oburingaaniza nari yaatuhikaho omu kibiina. Eki kyabaho, noija kutwaza ota? Noija kwikiriza kuteerwa entsibo?

5. Ahabw’enki kitashemereire kututangaaza twareeba nari twahikwaho obutari buringaaniza omu kibiina?

⁵ Twena turi abatahikiriire kandi nitukora enshobe, n’ahabw’ekyo nikibaasika omuntu kukutwariza omu muringo gutari gw’oburingaaniza nari iwe kutwariza ondiijo omu muringo gutari gw’oburingaaniza omu kibiina. (1 Yohaana 1:8) N’obu eki kiraabe nikibaasa kubaho, Abakristaayo abeesigwa tibarikutangaara nari kuteerwa entsibo haabaho obutari buringaaniza. Yehova atuhaire obuhabuzi omu Baibuli kutuhwera kuguma turi abeesigwa, ab’eishe-emwe baatutwariza omu muringo gw’obutari bwesigwa.—Zaaburi 55:12-14.

6, 7. Ow’eishe-emwe omwe akahikwaho obutari buringaaniza ki, kandi ni mitwarize ki eyaamuhwereire?

⁶ Teekateeka aha kyahikire ahari Willi Diehl. Kutandika na 1931, Ow’eishe-emwe Diehl akaheereza omu bwesigwa aha Beseeli ya Bern, omuri Switzerland. Omuri 1946, akaza omu Ishomero rya Gileadi erya munaana omuri New York, U.S.A. Ku yaarugire omu ishomero eryo, bwanyima bakamwohereza omuri Switzerland kutaayaayira ebibiina. Omu byafaayo, ow’eishe-emwe Diehl akagira ngu omu Kwakataano 1949, akamanyisa ab’ah’eitaagi rya Switzerland ngu akaba naatebeekanisa kushwera. Ab’eishe-emwe abaine obushoboorozi bakamugira ngu nibaija kumwihaho obujunaanizibwa bwe. Bakamugira ngu nibaija kumwikiriza kuba payoniya kyonka. Ow’eishe-emwe Diehl akagira ati: “Nkaba ntarikwikirizibwa kuha embazo.” Naayongyeraho ati: “Baingi bakaba batakituramutsya, barikututwariza nk’abantu ababingirwe omu kibiina.”

⁷ Ow’eishe-emwe Diehl akatwaza ata? Akagira ati: “Kwonka tukaba nitumanya ngu okuza omu bushwere tikirikuhenda emisingye y’Ebyahandiikirwe, n’ahabw’ekyo tukatunga obuhungiro omu kushaba n’okwesiga Yehova.” N’obu ab’eishe-emwe abamwe baraabe  baabaire batarikwetegyereza emiteekateekyere ya Yehova aha bushwere, bwanyima bakaija baayetegyereza enshonga egyo, kandi ow’eishe-emwe Diehl akagarurirwa obujunaanizibwa bwe. Yehova akamuha emigisha ahabw’obwesigwa bwe. * (Reeba obugambo obw’ahansi.) Nitubaasa kwebuuza tuti: ‘Ku naakuhikwaho obutari buringaaniza nk’obwo, ninyija kugumisiriza ntegyereze Yehova kushoboorora embeera? Nari ninyija kweyesiga nteereho kurwanisa obutari buringaaniza?’—Enfumu 11:2; shoma Miika 7:7.

8. Ahabw’enki nikibaasa kuba kitahikire okuteekaateeka ngu itwe nari abandi tutwariziibwe omu muringo gw’obutari buringaaniza?

⁸ Ku oraabe nooteekateeka ngu omu kibiina harimu obutari buringaaniza, ijuka ngu emiteekateekyere yaawe neebaasa kuba etahikire. Ahabw’enki? Turi abatahikiriire n’ahabw’ekyo noobaasa kuba otarayetegyereize embeera. Kandi nitubaasa kuba tutarikumanya byona. Yaaba okwetegyereza kwaitu kuhikire nari kutahikire, twine kushaba Yehova aha bikwatiraine n’embeera egyo, tumwesigye, kandi tugume tumuhamiireho. Eki nikiija kuturinda ‘kuteetomboitera’ Yehova.—Shoma Enfumu 19:3.

9. Ni by’okureeberaho ki ebi turikuza kushwijuma omu kicweka eki n’ekirikukurataho?

⁹ Ka tureebe obutari buringaaniza bw’emiringo eshatu obwahikire aha baheereza ba Yehova omu bwire obu Baibuli yaabaire neehandiikwa. Omu kicweka eki nituza kureeba ekyahikire ahari mwijukuru wa Abrahamu Yosefu na beene ishe. Omu kicweka ekirikukurataho, nitwija kureeba oku Yehova yaakwatsire enshonga z’Omugabe Ahabu n’entumwa Petero obu yaabaire ari Antiokia eya Siria. Twaba nitushwijuma eby’okureeberaho ebi, reeba emiringo ei orikubaasa kwongyera kuta omutima ahari Yehova okarinda omukago gwawe nawe, na munonga waaba noikiriza ngu otwariziibwe omu muringo gw’obutari buringaaniza.

10, 11. (a) Yosefu akahikwaho obutari buringaaniza ki? (b) Yosefu akatunga mugisha ki obu yaabaire ari omu kihome?

¹⁰ Yosefu akaba ari omuheereza wa Yehova owaahikirweho obutari buringaaniza kuruga aha bu atarikumanya. Kwonka ekyamukozire kubi munonga n’obutari buringaaniza bwa beene ishe. Obu Yosefu yaabaire aine emyaka 17, beene ishe bakamukwata baamuguza nk’omuhuuku. Bakamutwara omuri Misri. (Okutandika 37:23-28; 42:21) Bwanyima, Yosefu ku yaabaire ari omu ihanga eryo, bakamubeiherera ngu akaba naateeraho kuhamba muka bandi, reero baamutwara omu kihome batabandize kumuhozesa. (Okutandika 39:17-20) Yosefu akabonabona nk’omuhuuku kandi embohe kumara emyaka 13. Nitubaasa kwegyera ki aha byahikire ahari Yosefu ebiraatuhwere twahikwaho obutari buringaaniza kuruga aha b’eishe-emwe?

 ¹¹ Obu Yosefu yaabaire ari omu kihome, omugabuzi mukuru w’omugabe nawe akateebwa omu kihome. Ekiro kimwe, omugabuzi akaroota ekirooto, eki Yosefu yaashobooroire arikuhwerwa Yehova. Yosefu akashoboorora ngu omugabuzi akaba naija kurekurwa kuruga omu kihome agarukye kugaburira Faraho. Yosefu akatunga omugisha gw’okushoboororera omushaija ogu embeera ye. Nitubaasa kwega bingi kuruga aha bi Yosefu yaagambire n’ebi yaakozire.—Okutandika 40:5-13.

12, 13. (a) Nitumanya tuta ngu Yosefu taraikiririize eryo obutari buringaaniza? (b) Niki eki Yosefu ataragambiire omugabuzi?

¹² Shoma Okutandika 40:14, 15. Yetegyereze ngu Yosefu akagira ngu akaba ‘aihirwe’ owaabo kifuba. Ekigambo eki Baibuli erikukoresa nikibaasa n’okumanyisa okwibwa. Buzima akaba ahikirweho obutari buringaaniza. Kandi Yosefu nabwo akooreka ngu akaba atakozire rubanja oru baabaire nibamujunaana. Niyo nshonga ahabw’enki yaashabire omugabuzi kumanyisa Faraho ebirikumukwataho. Akaba aine kigyendererwa ki? Akagira ati: “Onyihise omuri egi nju.”

¹³ Mbwenu shi Yosefu akaikiririza eryo embeera ye atabandize kugira eki yaakora? Ngaaha! Yosefu akaba naamanya ngu ahikirweho obutari buringaaniza bwingi. Niyo nshonga ahabw’enki yaashoboororoire omugabuzi enshonga ye, arikuteekateeka ngu  omushaija ogwo naija kumuhwera. Kwonka yetegyereze ngu Ebyahandiikirwe tibirikugira ngu Yosefu haine ou yaabaire yaagambiire, otwariiremu na Faraho, ngu beene ishe bakaba bamwibire bamugurize Misri. Nangwa na beene ishe Yosefu ku baizire Misri bakagaruraho obusingye na Yosefu, Faraho akabeeta kutuura omuri Misri bakarya “ebirungi by’omu nsi” egyo.—Okutandika 45:16-20.

14. Niki ekirikwija kuturinda kutagamba ebintu ebirikusaasa twatwarizibwa omu muringo gw’obutari buringaaniza omu kibiina?

¹⁴ Twaba nituteekateeka ngu haine otutwariize omu muringo gutari gw’oburingaaniza omu kibiina, tushemereire kwegyendesereza kutagambuuka aha nshonga egyo. Kandi nituba twine n’okushaba abareeberezi kutuhwera, kandi tubagambire ow’eishe-emwe yaaba akozire ekibi ky’amaani. (Abaleevi 5:1) Kwonka obutari buringaaniza obwo bwaba butarikutwariramu ekibi ky’amaani, noobaasa kugaruraho obusingye n’ow’eishe-emwe ogwo otangambiire ndiijo muntu, nangwa n’obu baakuba n’abareeberezi. (Shoma Matayo 5:23, 24; 18:15.) Ka tuhamire ahari Ruhanga kandi tugyendere aha misingye ya Baibuli omu mbeera ezi. Obumwe noobaasa kushanga ngu obaire oyetegyereize kubi enshonga kandi oshangye ngu totwariziibwe omu muringo gw’obutari buringaaniza. Obwo nooba oshemereire kwesiima ahabw’okugira ngu tobeire rwongyerera maganya orikugamba ebintu bibi aha w’eishe-emwe! Ijuka ngu yaaba tuhikire nari tugwire, okugamba ebintu ebirikusaasa abandi tiharimu karungi koona. Okuhamira ahari Yehova n’ab’eishe-emwe bagyenzi baitu nikiija kuturinda okukora enshobe nk’egyo. Omuhandiiki wa Zaaburi akagira ngu hariho “ogwo ogyenda ataine ki arikuhanwa.” Omuntu nk’ogwo tarikugambuura “bandi na rurimi rwe, n’obu kwakuba okukora kubi mugyenzi we.”—Zaaburi 15:2, 3; Yakobo 3:5.

15. Omukago ogu Yosefu yaabaire aine na Yehova gukamuhwera guta?

¹⁵ Haine ekindi kintu kikuru eki turikwegyera ahari Yosefu. Omu myaka 13 obu Yosefu yaabaire naatwarizibwa omu muringo gw’obutari buringaaniza, akooreka ngu akaba naareeba enshonga nk’oku Yehova arikuzireeba. (Okutandika 45:5-8) Tarateire ahari Yehova orubanja ahabw’embeera ye. N’amazima, Yosefu tarayebirwe obutari buringaaniza obwamuhikireho, kwonka taragizire kiniga. Ekikuru munonga, taraikiriize obutahikiirira n’ebikorwa by’abandi ebigwire kumutaanisa na Yehova. Yosefu okuhamira ahari Yehova kikamuha omugisha gw’okureeba Yehova naihaho obutari buringaaniza obwo, kandi akamuha omugisha.

16. Ahabw’enki twine kwirira haihi na Yehova twahikwaho obutari buringaaniza omu kibiina?

¹⁶ Omu muringo nigwo gumwe, naitwe twine kusiima omukago gwaitu na Yehova kandi tukagurinda. Titushemereire kwikiriza obutahikiirira bw’ab’eishe-emwe bagyenzi baitu  kututaanisa na Yehova ou turikukunda kandi ou turikuramya. (Abarooma 8:38, 39) Omu mwanya gw’ekyo, twahikwaho obutari buringaaniza omu kibiina, ka tutooreze Yosefu kandi twirire haihi na Yehova. Teeraho kugira emiteekateekyere nk’eye aha nshonga. Bwanyima y’okukora kyona ekirikubaasika kushoboorora oburemeezi turikukuratira emisingye ya Baibuli, enshonga twine kuzireka omu mikono ya Yehova. Nitubaasa kugira obuhame ngu naija kushoboorora enshonga omu bwire bwe n’omu muringo gwe.

17. Nitubaasa kworeka tuta ngu nitwesiga “omucwi w’emanja z’ensi yoona”?

¹⁷ Twaba tukiri omu nsi egi embi, nitukimanya ngu nitwija kuhikwaho obutari buringaaniza. Obumwe, iwe nari ondiijo nimubaasa kureeba nari kutwarizibwa omu muringo ogurikureebeka nk’ogutari g’oburingaaniza omu kibiina. Otakateerwa entsibo. (Zaaburi 119:165) Omu mwanya gw’ekyo, guma ohamiire ahari Ruhanga, mushabe obuhwezi, kandi omwesigye. Ijuka ngu ahabw’okugira ngu tohikiriire, noobaasa kuba waayetegyereza kubi enshonga, nari otarikumanya enshonga zoona. Tooreza Yosefu kandi yetantare okugamba aha bandi kubi, ekirikubaasa kureetera enshonga kweyongyera kuba mbi. Eky’aha muheru, omu mwanya gw’okweyesiga, mariirira kuhamira ahari Yehova kandi ogumisirize omutegyereze kuba niwe yaashoboorora enshonga. Waakora otyo, noija kusiimwa Yehova kandi akuhe emigisha nka Yosefu. Noobaasa kuhamya ngu Yehova, “omucwi w’emanja z’ensi yoona,” butoosha naakora ekihikire, “emitwarize ye yoona n’ey’oburyo” nari ey’oburingaaniza.—Okutandika 18:25; Eky’Ebiragiro 32:4.

18. Nituza kureeba ki omu kicweka ekirikukurataho?

¹⁸ Omu kicweka ekirikukurataho nituza kureeba ebindi by’okureeberaho bibiri eby’obutari buringaaniza ebyahikire aha baheereza ba Yehova omu bwire obu Baibuli yaabaire neehandiikwa. Eby’okureeberaho ebi nibiija kutuhwera kureeba oku obucureezi n’okusaasira birikutubaasisa kutooreza emiteekateekyere ya Yehova aha buringaaniza.