1, 2. (a) Ni miteekateekyere ki etarikushushana ei abantu baine aha bugabe bw’okwecweramu? (b) Baibuli neetwegyesa ki aha bugabe bwaitu bw’okwecwaramu, kandi nituza kushwijuma bibuuzo ki?

OMUKAZI omwe akagambira munywani we ati: “Naaba nincwamu, otakaandetera kuteekateeka; ngambira butunu eki nyine kukora. Ekyo kyorobi.” Omukazi ogwo akaba naayenda kugambirwa eky’okukora omu mwanya gw’okukoresa obugabe bwe bw’okwecweramu, ekiconco ky’omuhendo kuruga aha Muhangi we. Kandi shi iwe? Nookunda kwecweramu, nari nooyenda ngu abandi baakucweremu? Nootwara ota obugabe bw’okwecweramu?

² Abantu baine emiteekateekyere etarikushushana aha obugabe bw’okwecweramu. Abamwe nibagira ngu tihariho bugabe bw’okwecweramu ahabw’okugira ngu Ruhanga yaaherize kucwamu ebi turikukora byona. Abandi nibagira ngu okwecweramu nikibaasika twaba twine obugabe bwingi. Kwonka, Baibuli neegira ngu tukahangwa twine okubaasa n’obugabe bw’okucwamu gye. (Shoma Yoshua 24:15.) Omu Baibuli, nitugaruka tushangamu eby’okugarukamu by’ebibuuzo ebi: Mbwenu shi obugabe bwaitu bw’okwecweramu bwine obugarukiro? Twine kukoresa tuta obugabe bwaitu bw’okwecweramu? Ebi turikucwamu nibyoreka bita oku turikukunda Yehova? Nitubaasa kworeka tuta ngu nituha ekitiinisa ebi abandi barikucwamu?

3. Yehova naakoresa ata obugabe bwe obutaine bugarukiro?

³ Yehova aine obugabe obutaine bugarukiro, kandi nitubaasa kumwegyeraho oku arikubukoresa. Nk’eky’okureeberaho, Yehova akatoorana Abaisraeli kuba abaheereza be, “eihanga eri yaayetooraniire.” (Eky’Ebiragiro 7:6-8) Akaba aine enshonga ahabw’okucwamu atyo. Yehova akaba naayenda kuhikiiriza eki yaaraganiise munywani we Abrahamu. (Okutandika 22:15-18) Okwongyera ahari ekyo, Yehova aine rukundo kandi naatwaza gye yaaba naakoresa obugabe bwe. Nitubaasa kureeba ekyo omu muringo ogu yaabaire ahanamu Abaisraeli ku baabaire bamugomera. Ku baabaire beeteisa enshobe zaabo, Yehova akaba abagirira rukundo n’embabazi. Akagira ati: “Ndyabakiza okugaruka enyima kwabo, mbakunde, bataine ki bahaire” nari nyekundiire. (Hosea 14:4) Yehova akatuteeraho eky’okureeberaho kirungi arikukoresa obugabe bwe kuhwera abandi!

4, 5. (a) N’oha owaabandize kutunga ekiconco ky’okwecweramu, kandi akakikoresa ata? (b) Buri omwe ahariitwe aine kwebuuza kibuuzo ki?

⁴ Yehova akacwamu kuhanga baamaraika n’abantu, baine obugabe bw’okwecweramu. Yehova akabanza kuhanga Yesu. Yesu akahangwa omu nshusha ya Ruhanga, kandi akaba aine obugabe bw’okwecweramu. (Abakolosai 1:15) Yesu atwire naakoresa ata obugabe bwe? Atakaizire mu nsi, akacwamu kuguma ahamiire ahari Ruhanga n’okutegaita ahari Sitaane omugomi. Yesu ku yaizire omu nsi, akacwamu kwangira Sitaane kumureetera kugwa omu kwohibwa. (Matayo 4:10) Aha kiro eki Yesu yaafeereireho, akahamiza Ishe ngu naayenda kukora ebi arikukunda. Akagira ati: “Taata, ku oraabe noikiriza, onyiheho ekikopo eki; kwonka kirekye kuba nk’oku ndikwenda, kureka nka Iwe oku orikwenda.” (Luka 22:42) Mbwenu shi buzima nikibaasika itwe kutooreza Yesu, kandi tukakoresa obugabe bwaitu bw’okwecweramu kuhimbisa Yehova n’okukora ebi arikukunda?

⁵ Eego, nitubaasa kumutooreza ahakuba naitwe tukozirwe omu nshusha ya Ruhanga. (Okutandika 1:26) Kwonka, titwine obugabe obutaine bugarukiro nk’obu Yehova aine. Ekigambo kya Ruhanga nikishoboorora ngu Yehova akataho obugarukiro aha bugabe bwaitu, kandi naayenda ngu twikirize obugarukiro obwo. Nk’eky’okureeberaho, omu ka, abakazi bashemereire kworobera baibabo n’abaana bashemereire kworobera abazaire baabo. (Abaefeso 5:22; 6:1) Obugarukiro obwo nibukwata buta aha muringo ogu turikukoresamu obugabe bwaitu bw’okwecweramu? Eky’okugarukamu ky’ekibuuzo ekyo nikibaasa kukwata aha biro byaitu by’omumaisho.

6. Ha eky’okureeberaho ekirikworeka ahabw’enki ni kikuru obugabe obu twine kugira obugarukiro.

⁶ Obugabe obwine obugarukiro nibubaasa kuba obwabuzima? Eego, nibubaasa! Ahabw’enki? Ahabw’okuba okugira obugarukiro  nikibaasa kuturinda. Nk’eky’okureeberaho, nitubaasa kucwamu kuvuga emotoka kuza omu rurembo oruri hare. Kwonka shi ku haakuba hatariho biragiro by’enguuto, buri omwe arikuvuga nk’oku arikwenda. Okaahurira oine oburinzi kuvugira aha ruguuto orwo? Buzima ngaaha. Abantu nibaba nibenda kugira obugarukiro kugira ngu boona babaase kugasirwa. Ka tureebe eby’okureeberaho ebiri omu Baibuli ebirikworeka oku obugarukiro obu Ruhanga yaatuteeraireho burikubaasa kutugasira.

7. (a) Ni ntaaniso ki eyaabaire eri ahagati ya Adamu n’enyamaishwa? (b) Shoboorora omuringo gumwe ogu Adamu yaakoreisemu ekiconco ky’okwecweramu.

⁷ Obu Yehova yaahanga omuntu w’okubanza, Adamu, akamuha ekiconco nk’eki yaabaire ahaire baamaraika, ekiconco eky’okwecweramu. Kwonka Ruhanga tarahaire enyamaishwa ekiconco ky’okwecweramu. Mbwenu shi Adamu akakoresa ata ekiconco kye eky’okwecweramu omu muringo murungi? Adamu akashemererwa ahabw’okugira omugisha gw’okuha enyamaishwa amaziina. Ruhanga ‘akabireetera ogwo muntu, ngu areebe oku araabyete.’ Bwanyima ya Adamu kureeba buri nyamaishwa, buri emwe akagiha eiziina eriine amakuru. Yehova tarahindwire kintu na kimwe eki Adamu yaabaire acwiremu. ‘Oku Adamu yaayetsire ekihangirwe kyona ekiine amagara, niryo ryabaire eiziina ryakyo.’—Okutandika 2:19.

8. Adamu akakoresa ata kubi obugabe bwe bw’okwecweramu, kandi niki ekyarugiremu?

⁸ Yehova akaha Adamu obujunaanizibwa bw’okuhindura ensi paradiso arikumugira ati: “Muzaare, mukanye, mwijure ensi, ebe eyaanyu; mutegyekye eby’omu nyanja, n’ebirikuguruka omu mwanya, na byona ebiine amagara ebirikwegyendesa ahansi.” (Okutandika 1:28) Kwonka Adamu akacwamu kurya aha kijuma eki yaabaire atashemereire kuryaho, omu kukora ekyo, akeehuzya obugarukiro obu Yehova yaabaire amuteeraireho. Ahabw’okugira ngu Adamu akakoresa kubi obugabe bwe bw’okwecweramu, abantu babonaboine kumara emyaka mingi. (Abarooma 5:12) Ka tugume nitwijuka ebyarugire omu kucwamu kwa Adamu. Eki nikiija kutuhiga kukoresa obugabe bwaitu omu muringo murungi kandi twikirize n’obugarukiro obu Yehova atuteeraireho.

9. Yehova akaikiriza Abaisraeli kucwamu ki, kandi bakaraganisa kukora ki?

⁹ Abantu boona bakahungura obutahikiirira n’okufa kuruga ahari Adamu na Haawa. Kwonka, tukiine omugisha gw’okukoresa obugabe bwaitu bw’okwecweramu. Ekyo nitubaasa kukireebera aha ku Ruhanga yaatwariize eihanga rya Israeli. Yehova akabaha omugisha gw’okwecweramu kuba abantu be abatoorainwe nari kwanga. (Okuruga 19:3-6) Eihanga rikacwamu kuba abantu ba Ruhanga kandi baikiriza obugarukiro obu Ruhanga yaabateeraireho. Bakagira bati: ‘Byona ebi Mukama yaagamba, nitwija kubikora.’ (Okuruga 19:8) Eky’obusaasi, abantu abo bwanyima bakacwamu kutahikiiriza eki baaraganiise Yehova. Nitubaasa kwega ekintu kikuru aha ky’okureeberaho  ekyo. Ka tugume tutware obugabe bwaitu bw’okwecweramu nk’eky’omuhendo, kandi tugume tuhamiire ahari Yehova turikworobera ebiragiro bye.—1 Abakorinso 10:11.

10. Ni by’okureeberaho ki kuruga omu Abaheburaayo eshuura 11 ebirikworeka ngu abantu nibabaasa kukoresa ekiconco kyabo ky’okwecweramu kuha Ruhanga ekitiinisa? (Reeba ekishushani aha kutandika.)

¹⁰ Omu Abaheburaayo eshuura 11, nitushangamu amaziina g’abashaija n’abakazi 16 abeesigwa abaacwiremu kuha ekitiinisa obugarukiro obu Yehova yaabateereireho. N’ekyarugiremu, bakatunga emigisha mingi n’amatsiko ag’omutaano aha biro by’omumaisho. Nk’eky’okureeberaho, Noa akaba aine okwikiriza kw’amaani kandi yaacwamu kworobera obuhabuzi bwa Yehova oburikukwata aha kwombeka emeeri y’okucungura eka ye n’abantu abaizire kubaho bwanyima. (Abaheburaayo 11:7) Abrahamu na Saara bakoorobera Ruhanga beekundiire baaza omu nsi ei yaabaire abaraganiise. N’obu baraabe baabaire baine omugisha ‘gw’okugaruka’ omu rurembo Uri, bakata omutima aha ki Ruhanga yaabaire araganiise aha biro by’omumaisho. Baibuli neegira ngu bakaba “nibeetenga ensi erikukira oburungi.” (Abaheburaayo 11:8, 13, 15, 16) Musa akanga eby’obutungi ebya Misri yaatoorana “okukorwa kubi hamwe n’abantu ba Ruhanga, yaayanga kuguma omu by’okweshemeza by’ekibi ebirikuhwaho juba.” (Abaheburaayo 11:24-26) Ka tutooreze okwikiriza kw’abashaija n’abakazi abo, kandi tworekye okusiima ahabw’ekiconco ky’okwecweramu, tukikorese kukora ebi Ruhanga arikukunda.

11. (a) Obugabe bw’okwecweramu nibutugasira buta? (b) Niki ekirikukuhiga kukoresa gye obugabe bwawe bw’okwecweramu?

¹¹ Nikibaasa kureebeka nk’ekyorobi kugambira omuntu ondiijo kutucweramu, kwonka ekyo tikirikubaasa kutureetera kutunga gumwe aha migisha y’amaani ey’okwecweramu. Mugisha ki? Baibuli neegugambaho omu Eky’Ebiragiro 30:19, 20. (Kishome.) Omu mushororongo 19, nitushoma ngu Ruhanga akaba naayenda ngu Abaisraeli beecweremu. Omu mushororongo 20, nitwega ngu Yehova akabaha omugisha gw’okworeka oku baabaire nibamukunda. Naitwe nitubaasa kucwamu kuramya Yehova. Kandi naitwe twine omugisha gw’omutaano gw’okukoresa obugabe bwaitu bw’okwecweramu kuha Yehova ekitiinisa n’okumworeka oku turikumukunda!

12. Ekiconco kyaitu ky’okwecweramu titushemereire kukikoresa kukora ki?

¹² Ka tugire ngu waaha munywani waawe ekiconco ky’omutaano. Noija kwehurira ota yaanaga ekiconco ekyo omu kasasiro, nari akakikoresa kukora kubi abandi? Noobaasa kwehurira kubi. Yehova atuhaire ekiconco ky’okwecweramu. N’ahabw’ekyo naayehurira kubi abantu baakoresa kubi obugabe bwabo bw’okwecweramu nari kukora kubi abandi. Baibuli neegira eti: “Omu biro by’aha mperu,” abantu baryaba “entasiima.” (2 Timoseo 3:1, 2) Mbwenu shi nitubaasa kworeka tuta ngu nitusiima ekiconco kyaitu ky’omuhendo eky’okwecweramu kuruga ahari Yehova? Nitubaasa kwetantara tuta kukikoresa kubi?

13. Nitubaasa kwetantara tuta okukoresa kubi obugabe bwaitu?

¹³ Twena twine obugabe bw’okutoorana abanywani abu turikwenda, oku turikwenda kujwara n’endeebeka, n’eby’okweshemeza byaitu. Kwonka, nitubaasa kukoresa obugabe bwaitu nka rwekwatso y’okucwamu ebi Ruhanga atarikusiima nari okutooreza  emitwarize mibi y’abantu b’ensi egi. (Shoma 1 Petero 2:16.) Omu mwanya gw’okukoresa obugabe obu twine nka rwekwatso y’okukora ebibi, tushemereire kukora “byona okuhimbisisa Ruhanga.”—1 Abakorinso 10:31; Abagalatia 5:13.

14. Ahabw’enki twine kwesiga Yehova twaba nitukoresa obugabe bwait

¹⁴ Yehova akagira ngu niinye Yehova “Ruhanga waawe orikukwegyesa eby’okukugasira, nkakwebembera omu muhanda ogu oshemereire kutoora.” (Isaaya 48:17) Twine kwikiririza omuri Yehova kandi tukaikiriza obugarukiro obu atuteeraireho kugira ngu tubaase kucwamu gye. Omu bucureezi, nitwikiriza ngu “omuhanda gw’omuntu tiguba mu bushoboorozi bwe. Kandi omuntu weena ogyenda tabaasa kwehabura mu rugyendo rwe ahu yaahika hoona.” (Yeremia 10:23) Adamu n’Abaisraeli abaabaire batari beesigwa bakacwamu kwanga obugarukiro obu Yehova yaabateeraireho, kandi omu mwanya gw’ekyo, bakeeyesiga. Ka tureebe eki turikwega aha ky’okureeberaho kyabo kibi. Omu myanya gw’okweyesiga, ka twesigye Yehova ‘n’omutima gwaitu gwona.’—Enfumu  3:5.

15. Nitwega ki aha musingye oguri omu Abagalatia 6:5?

¹⁵ Twine kuha ekitiinisa obugabe bw’abandi obw’okucwamu. Ahabw’enki? Obu twena twine ekiconco eky’okwecweramu, Abakristaayo babiri butoosha tibarikubaasa kucwamu ebirikushushana. Eki nikitwariramu okucwamu kwaitu aha ku twine kutwaza n’okuramya. Ijuka omusingye oguri omu Abagalatia  6:5. (Kishome.) Twamanya ngu buri Mukristaayo naajunaanizibwa ebi arikucwamu, nitwija kuha ekitiinisa obugabe bw’abandi obw’okucwamu.

16, 17. (a) Obugabe bw’okwecweramu bukareetaho nshonga ki omuri Korinso? (b) Paulo akahwera ata Abakristaayo abo, kandi eki nikitwegyesa ki?

¹⁶ Ka tureebe eky’okureeberaho ekiri omu Baibuli ekirikworeka ahabw’enki twine kuha ekitiinisa obugabe bw’ab’eishe-emwe bagyenzi baitu obw’okucwamu. Abakristaayo b’omu kibiina kya Korinso bakahakana aha kurya enyama obundi ebaire ehongiirwe ebishushani reero bwanyima ekatwarwa omu katare kuguzibwa. Omuntu w’omunda ow’Abakristaayo abamwe akaba nabaikiriza kurya enyama ahakuba bakaba nibamanya ngu ekishushani ni busha. Kwonka, abandi abaabaire nibaramya ebishushani ebyo enyima, bakaba nibateekateeka ngu okurya enyama kikaba nikishushana n’okuramya ebishushani. (1 Abakorinso 8:4, 7) Obu bukaba buri oburemeezi bw’amaani obwabaire nibubaasa kubaganisamu ekibiina. Paulo akahwera ata Abakristaayo kushoboorora oburemeezi obwo?

¹⁷ Eky’okubanza, Paulo akaijutsya abo abaabaire nibahakana, ngu eby’okurya tibirikubaasa kuhamya omukago gwabo na Yehova. (1 Abakorinso 8:8) Ekindi, Paulo akabarabura okutaikiriza ‘obusingye bwabo’ bw’okucwamu kugwisa kubi abatahamire. (1 Abakorinso 8:9) Bwanyima, akagambira abaabaire baine omuntu w’omunda otahamire kutacwera rubanja abarikucwamu kurya enyama nk’ezo. (1 Abakorinso 10:25, 29, 30) N’ahabw’ekyo, omu nshonga nkuru ezirikukwata aha kuramya, buri Mukristaayo akaba aine kwecweramu. Mbwenu shi naitwe titushemereire kuha ekitiinisa obugabe bw’ab’eishe-emwe bagyenzi baitu obw’okwecweramu nangwa n’omu nshonga nkye munonga?—1 Abakorinso 10:32, 33.

18. Noija kworeka ota ngu nootwara ekiconco kyawe ky’okwecweramu nk’eky’omuhendo?

¹⁸ Yehova atuhaire ekiconco ky’okwecweramu, ekirikutureetera kugira obugabe. (2 Abakorinso 3:17) Nitukitwara nk’eky’omuhendo ahakuba nikitubaasisa kucwamu omu muringo ogurikworeka ngu nitukunda Yehova munonga. N’ahabw’ekyo ka tugume nitucwamu omu muringo ogurikuhaisa Yehova ekitiinisa, kandi ka tuhe ekitiinisa obugabe bw’abandi obw’okukoresa ekiconco eki eky’omuhendo.