1, 2. Abantu baingi nibatwara bata emirimo yaabo?

ABANTU baingi nibateekateeka ngu nibaba bari ab’omugasho nari batari b’omugasho kurugiirira aha murimo ogu barikukora. Omu mahanga agamwe, waaba nooyenda kumanya omuntu, n’ekya butoosha kumubuuza oti: “Nookora murimo ki?”

² Omu byahandiikirwe ebimwe Baibuli neeshoboorora aha bantu erikworeka emirimo ei baabaire nibakora. Nk’eky’okureeberaho, neegamba ahari “Matayo omuhooza,” “Simooni omuhazi w’empu,” na “Luka” omushaho orikukundwa. (Matayo 10:3; Ebyakozirwe 10:6; Abakolosai 4:14) Ahandi, Baibuli neegamba aha bujunaanizibwa obu abantu baabaire baine barikuheereza Yehova. Teekateeka aha Mugabe Daudi, nabi Eliya, n’entumwa Paulo. Abashaija aba bakaba nibakunda obujunaanizibwa obu Yehova yaabaire abahaire. Naitwe, tushemereire kukunda obujunaanizibwa bwona obu twine omu kuheereza Yehova.

3. Ahabw’enki abakuzire bashemereire kutendeka abakiri bato? (Reeba ekishushani aha kutandika.)

 ³ Nitukunda kuheereza Yehova kandi nitutwara obuheereza bwaitu nka bukuru. Baingi ahariitwe nitukunda munonga obuheereza bwaitu kandi twine amatsiko ngu nitwija kugumizamu n’obuheereza obu kyaba nikibaasika. Kwonka eky’obusaasi, abantu ku barikukura, nibaba batakibaasa kukora byona ebi baabaire nibakora bakiri bato. (Omubuurizi 1:4) Eki nikiremesa bamwe aha baheereza ba Yehova. Ebiro ebi, omurimo gw’okubuurira nigweyongyera kutunguuka, kandi ekibiina kya Yehova nikikoresa entunguuka n’obwengye bw’ensi kuhitsya aha bantu baingi amakuru marungi. Kwonka obumwe nikibaasa kugumira abakuzire, kwega emiringo misya y’okukoramu ebintu. (Luka 5:39) Kandi n’ekya butoosha abantu kuhwamu amaani baaba nibeyongyera kukura. (Enfumu 20:29) N’ahabw’ekyo, nikiba kiri ekikorwa kya rukundo kandi eky’oburyo, abakuzire kutendeka abakiri bato kugira ngu babaase kuheebwa obujunaanizibwa omu kibiina kya Yehova.—Shoma Zaaburi 71:18.

4. Ahabw’enki abamwe nibagumirwa kweihaho obushoboorozi kubuha abandi? (Reeba akabokisi “ Ekirikutureetera Kugumirwa Kurekurira Abandi.”)

⁴ Butoosha tikirikworobera abaine obushoboorozi kurekurira abandi abakiri bato. Nikibaasa kureetera ab’eishe-emwe enaku kuruga omu buheereza obu babaire nibakunda munonga. Nikibaasa kubareetera obusaasi baateekateeka aha kureka omurimo gw’omutaano ogu barikukunda munonga. Nari nibabaasa kutiina ngu baaba bateejumbire omu murimo ogumwe, tigurikukorwa gye. Obundi nibateekateeka ngu tibaine bwire bw’okutendeka abandi. Kwonka nabwo, abato baine kugumisiriza baaba batoongyeirwe obujunaanizibwa.

5. Nituza kugarukamu bibuuzo ki omu kicweka eki?

⁵ Ahabw’enki ni kikuru ngu abakuzire bahwere abakiri bato kwongyera aha bujunaanizibwa obu baine? Eki nibabaasa kukikora bata? (2 Timoseo 2:2) Ahabw’enki abato bashemereire kwegyera aha bakuru abarikumanya bingi, kandi bakagira emiteekateekyere mirungi baaba nibaheereza nabo? Ka tubanze tureebe oku Omugabe Daudi yaatebeekaniise omwana we kukora omurimo mukuru munonga.

6. Omugabe Daudi akaba aine ekigyendererwa ky’okukora ki, kandi Yehova akamugambira ki?

⁶ Daudi akamara emyaka mingi naahiiganisibwa, kandi akaba aine kuruga omu mwanya akaza omu gundi. Bwanyima ku yaabaire omugabe, akatuura omu nju nungi y’obuteeka. N’ahabw’ekyo akagambira nabi Nasani ati: “Reeba, hati ndi omu nju y’emyereezi, kwonka eshanduukye y’endagaano ya Mukama eri omu ihema.” Daudi akaba aine ekihika ky’okwombekyera Yehova hekalu nungi munonga. Nasani akagira ati: “Kora ekiri omu mutima gwawe kyona, ahakuba Ruhanga ari hamwe naiwe.” Kwonka eki tikyo eki Yehova yaabaire naayenda. Yehova akagambira Nasani kugambira Daudi ati: “Toriinyombekyera nju y’okutuuramu.” N’obu Yehova araabe yaaraganisa Daudi ngu naija kuguma nawe, Daudi akamanya ngu omutabani niwe yaabaire naija kwombeka hekalu. Daudi akatwaza ata?—1 Obusingye 17:1-4, 8, 11, 12; 29:1.

7. Daudi akatwaza ata Yehova ku yaamuhaire obuhabuzi?

⁷ Buzima omugabe Daudi akaba naayenda  kwombekyera Yehova hekalu, n’ahabw’ekyo aine kuba atarashemereirwe. Kwonka nabwo akashagika omurimo gw’okwombeka ogu omutabani Sulemaani yaabaire naija kwebembera. Daudi akahwera omu kutebeekanisa emirimo n’okurundaana ebyoma, ebikomo, ezaabu, efeeza, n’embaaho. Akaba atarikufayo weena oraayetererwe omurimo gw’okwombeka hekalu, kandi buzima ekaija yaayetwa hekalu ya Sulemaani. Omu mwanya gw’ekyo, akahiga Sulemaani ati: “Mbwenu, mwana wangye, Mukama agume naiwe, obone kwombeka enju ya Mukama Ruhanga waawe, ogiheze gye, nk’oku yaakugambireho.”—1 Obusingye 22:11, 14-16.

8. Ahabw’enki Daudi yaateekateekire ngu Sulemaani takahikire kwombeka hekalu, kwonka akakora ki?

⁸ Shoma 1 Obusingye 22:5. Daudi naabaasa kuba yaateekateekire ngu Sulemaani takahikire kwebembera omurimo mukuru nk’ogwo. Hekalu ekaba eine “kuba ey’ekitiinisa kingi munonga,” kandi Sulemaani akaba ‘akiri muto, atakahamire.’ Kwonka Daudi akaba naamanya ngu Yehova naija kuhwera Sulemaani kukora omurimo gw’omutaano ogu. N’ahabw’ekyo Daudi akakora kyona ekirikubaasika kumuhwera kwetebeekanisiza omurimo muhango ogu.

9. Ahabw’enki abakuzire nibakunda kuha abandi obujunaanizibwa? Ha eky’okureeberaho.

⁹ Ab’eishe-emwe abakuzire tibashemereire kutiina kurekurira abakiri bato obujunaanizibwa obumwe. Nitumanya ngu ekikuru munonga hati n’omurimo ogu Yehova atuhaire. Okutendeka abatsigazi kwongyera aha bujunaanizibwa obu baine nikiija kuhwera omurimo ogu kukorwa. Teekateeka ahari eki. Obu waabaire okiri omwana, noobaasa kuba waareebire sho naavuga emotoka ye. Ku waakuzire, yaakushoboorerera eki yaabaire naakora. Bwanyima y’obwire, naiwe okatunga ebipapura ebirikukwikiriza kuvuga. Kwonka nabwo, sho akaguma naakuha  obuhabuzi. Obumwe mukaba mwihaihana omu kuvuga. Kwonka sho ku yaakuzire, niiwe waabaire nookira kuvuga munonga. Mbwenu shi ekyo kikagwisa kubi sho? Ngaaha, akashemererwa ahabw’okumuvuga. Omu muringo nigwo gumwe, ab’eishe-emwe abakuzire nibashemererwa kureeba ab’eishe-emwe abakiri bato abu batendekire nibongyera kutunga obujunaanizibwa omu kibiina kya Yehova.

10. Musa akeehurira ata aha bikwatiraine n’okuheebwa ekitiinisa n’okugira obushoboorozi?

¹⁰ Twine kwegyendesereza kutagirira eihari obuheereza bw’abandi. Nitubaasa kwegyera aha ku Musa yaatwarize obu Abaisraeli baatandika kukora nka baanabi. (Shoma Okubara 11:24-29.) Yoshua akaba naayenda kubazibira, kwonka Musa akagira ati: “Waagira eihari ahabwangye? Nkaabaasibwa ki abantu ba Mukama boona baba baanabi, Mukama abaha omwoyo gwe.” Musa akamanya ngu Yehova niwe yaabaire naayebembera omurimo. Omu mwanya gwa Musa kwesherurira ekitiinisa, akaba naayenda ngu abaheereza ba Yehova boona beejumbe omu buheereza. Kandi shi itwe? Mbwenu shi nitushemererwa abandi baaza omu buheereza obw’omuringo ogundi?

11. Ow’eishe-emwe omwe akagamba ki aha kuha abandi obujunaanizibwa?

¹¹ Hariho ab’eishe-emwe abatwire nibaheereza Yehova kumara emyaka mingi kandi abatendikire abatsigazi baingi kwongyera kuheebwa obujunaanizibwa. Nk’eky’okureeberaho, ka tuteekateekye aha w’eishe-emwe orikwetwa Peter. Emyaka 74 ei amazire omu buheereza obw’obutwire, emyaka 35 akagimara naaheereza aha ofiisi y’eitaagi omuri Buraaya. Kumara emyaka mingi akaba naakurira eby’obuheereza aha ofiisi egyo. Kwonka bwanyima, obuheereza bwe bukaheebwa Paul, ow’eishe-emwe muto ou Peter yaabaire atendekire. Mbwenu shi Peter akahurira kubi ahabw’empindahinduka egi? Ngaaha. Akagira ati: “Ninshemererwa kureeba ngu hariho ab’eishe-emwe abatendekirwe kwongyera aha bujunaanizibwa bwabo kandi abarikukora gye munonga kuhikiiriza omurimo ogu.”

12. Nitubaasa kwegyera ki ahari Rehoboamu?

¹² Mutabani wa Sulemaani orikwetwa Rehoboamu ku yaabaire omugabe, akeebuuza aha bashaija bakuru oku yaabaire aine kuhikiiriza obujunaanizibwa bwe. Kwonka obuhabuzi obu baamuhaire akabwanga! Omu mwanya gw’ekyo, akakuratira obuhabuzi bw’abatsigazi abu yaakuzire nabo.  Hakarugamu akabi k’amaani. (2 Obusingye 10:6-11, 19) Nitubaasa kumwegaho ki? N’eky’obwengye kushaba obuhabuzi abakuzire kandi abarikumanya bingi kutukira. Abato tibashemereire kuhurira nibagyemeserezibwa kugumizamu nibakora ebintu nk’oku byabaire nibikorwa enyima. Kwonka nabwo, bashemereire kuha ekitiinisa ebiteekateeko by’abakuzire, kandi tibashemereire kurahuka kuteekateeka ngu omuringo ogu babaire nibakoramu ebintu ti murungi.

13. Abato nibabaasa kukorera hamwe bata n’abakuru?

¹³ Obumwe, ab’eishe-emwe abato nibaheebwa obujunaanizibwa kwebembera ab’eishe-emwe abakuru abarikumanya bingi. Nikiba kiri eky’obwengye kwegyera aha bakuzire aba. Omu ky’okureeberaho eki twaba twagambireho, bwanyima ya Paul kuza omu mwanya gwa Peter arikukurira eby’obuheereza aha Beseeli, akagira ati: “Nkaba nshaba Peter obuhabuzi, kandi nkahiga abandi abu naabaire nimpeereza nabo kuba nikwo baakora.”

14. Nitwega ki aha ku Timoseo n’entumwa Paulo baakozire hamwe?

¹⁴ Timoseo akaba ari muto munonga aha ntumwa Paulo, kwonka bakakora hamwe kumara emyaka mingi. (Shoma Abafilipi 2:20-22.) Paulo akagambira Abakorinso ati: “Nikyo naatumira Timoseo ahariimwe, niwe mwana wangye omuri Mukama, ou ndikukunda, omwesigwa; aryabaijutsya emitwarize yangye ey’omuri Kristo, nk’oku nyegyesa hoona-hoona omu” bibiina byona. (1 Abakorinso 4:17) Eki nikibaasa kutuhwera kumanya gye ngu Paulo na Timoseo bakakora hamwe kandi baahwerahwerana. Paulo akeegyesa Timoseo ‘emitwarize ye ey’omuri Kristo,’ kandi Timoseo akagyega gye. Paulo akaba naakunda Timoseo, kandi akaba naahamya ngu naija kureeberera gye ab’eishe-emwe omuri Korinso. Abareeberezi nibabaasa kutooreza entumwa Paulo baaba nibatendeka ab’eishe-emwe abandi kwija kwebembera ekibiina.

15. Ebiri omu Abarooma 12:3-5 nibituhwera bita kwemera empindahinduka?

¹⁵ Turi omu biro birikushemeza. Ekicweka eky’omu nsi eky’ekibiina kya Yehova nikyeyongyera kutunguuka omu miringo mingi. Eki nikimanyisa ngu nihaija kuguma nihabaho empindahinduka. Zimwe aha mpindahinduka ezi nizibaasa kukwata aha muntu, kandi tizoorobi kwemera. Nikibaasa kutuhwera twaba abacureezi, kandi tukata omutima aha birikuhwera omurimo gw’Obukama omu mwanya gw’okuta omutima aha bi turikwenda. Twakora eki, nituguma twine obumwe. Paulo akahandiikira Abakristaayo omuri Rooma ati: “Ningambira buri muntu weena omuriimwe, ngu arekye kweteekateekaho okukira oku ari.” Bwanyima akashoboorora ngu nk’oku buri kicweka ky’omubiri kiine omugasho gwakyo, buri omwe omu kibiina aine omwanya ogurikutaana n’ogw’ondiijo.—Abarooma 12:3-5.

16. Buri Mukristaayo naabaasa kurinda ata obusingye n’obumwe omu kibiina kya Yehova?

 ¹⁶ Abaheereza ba Yehova boona nibenda kushagika Obukama kandi bakakora buri kimwe eki arikubashaba. Ab’eishe-emwe abakuzire nibabaasa kutendeka abakiri bato. Ab’eishe-emwe abakiri bato nibabaasa kwikiriza obujunaanizibwa omu muringo gw’obucureezi, kandi barikuha abandi ekitiinisa. Kandi abashaija boona Abakristaayo abari omu bushwere nibashemererwa abakazi baabo baabashagika embeera zaaba zihindukire. Abakazi aba nibabaasa kutooreza Priskila, owaakozire hamwe na iba Akula omu bwesigwa.—Ebyakozirwe 18:2.

17. Yesu akatendeka beegi be kukora ki?

¹⁷ Yesu akataho eky’okureeberaho kirungi eky’okuba ayeteekateekire kutendeka abandi. Yesu akaba naamanya ngu abandi baine kugumizamu n’omurimo ogu yaabaire naakora. Akaba naamanya ngu abeegi be tibahikiriire. Yesu akaba aine obwesigye ngu nibabaasa kujanjaaza hare amakuru marungi kumukira. (Yohaana 14:12) Akabatendeka gye, kandi bakabaasa kubuurira omu buri ihanga eri baabaire bazamu.—Abakolosai 1:23.

18. Twine murimo ki hati, kandi omu biro by’omumaisho nitwija kugira murimo ki?

¹⁸ Yesu ku yaafiire, Yehova akamuzoora yaamuha ogundi murimo n’obushoboorozi “ahaiguru munonga y’obutegyeki bwona n’obushoboorozi bwona n’amaani goona n’obugabe bwona.” (Abaefeso 1:19-21) N’obu twakufa Haramagedoni etakahikire, kwonka twaba turi abaheereza ba Yehova abeesigwa, nitwija kuzooka tugire emirimo mingi erikureeta okumarwa omu nsi ensya. Kandi hati twena twine omurimo gurikushemeza ogw’okubuurira amakuru marungi n’okuhindura abantu abeegi. N’ahabw’ekyo, yaaba turi bato nari bakuru, buri omwe ahariitwe naabaasa kuguma aine bingi by’okukora omu ‘murimo gwa Mukama.’—1 Abakorinso 15:58.