Okucwamu oku Twine Kukora
Emitindo y’emicwe ei turikucwamu kugyenderaho neebaasa kutureetera kushemererwa nari kutashemererwa. Ekyo Yehova naakimanya. Niyo nshonga ahabw’enki naayenda ngu tugyendere aha mitindo ye.
Yehova naayenda ngu tugire obusingye n’okushemererwa.
“Niinye [Yehova] Ruhanga waawe orikukwegyesa eby’okukugasira, nkakwebembera omu muhanda ogu oshemereire kutoora. Nangwa kuri waayorobeire ebiragiro byangye! Obwo obusingye bwawe bukaabaire nk’omugyera, n’okuhikiirira kwawe kuba nk’ebingonzi by’enyanja.”—Isaaya 48:17, 18.
Omuhangi waitu naamanya ekirikukirayo oburungi eki twine kukora kubaasa kugira embeera nungi. Naayenda ngu tukuratire obuhabuzi bwe ahabw’okuba n’obw’oburungi bwaitu. Twayorobera ebiragiro bya Ruhanga, titurikwija kwerarikirira aha biraarugye omu kucwamu kwaitu. Butoosha nitwija kuba nitucwamu ebihikire, ebirikutureetera kugira obusingye n’okushemererwa.
Yehova tarikubaasa kutushaba kukora eki tutarikubaasa.
“Ekiragiro eki, eki ndikukuragira eri izooba, tikirikukurema, n’obu kwakuba okuba hare.”—Eky’Ebiragiro 30:11.
Okugyendera aha mitindo ya Ruhanga ey’emicwe nikibaasa kutwetengyesa kuhindura emiteekateekyere yaitu n’ebikorwa byaitu. Kwonka, Yehova tarikutushaba kukora bingi. Ahabw’okugira ngu n’omuhangi waitu, naamanya eki turikubaasa kukora. Ku turikweyongyera kumanya Yehova nitwetegyereza ngu ‘ebiragiro bye tibirikurusya.’—1 Yohaana 5:3.
Yehova naaraganisa kuhwera abarikucwamu kugyendera aha mitindo ye.
‘Nyowe, [Yehova] Ruhanga waawe, niinyija kukukwata omukono gwa buryo, nkugire nti: Otatiina, naija kukuhwera.’—Isaaya 41:13.
Nitubaasa kukora ebirikuhikaana n’emitindo ya Ruhanga ey’emicwe ahabw’okugira ngu naatuhwera. Ekyo naakikora arikurabira omu Kigambo kye Baibuli, ekirikutuhiga, kikatugumya kandi kikatuha amatsiko.
Omu nsi yoona, abantu baingi beetegyereize ngu okugyendera aha mitindo ya Baibuli kibahweraire kugira embeera nungi. Nitukuhiga kwongyera kwega aha buhabuzi oburi omu Baibuli. Noobaasa kutandika orikushoma akatabo Yesiimire Amagara Ebiro Byona! akarikwegamira ahari Baibuli akari aha jw.org. Karimu amashomo aga:
-
Baibuli Neebaasa Kukuhwera Eta?
-
Baibuli Neeha Amatsiko
-
Noobaasa Kwesiga Baibuli?
Waaba nooshwijuma Ekigambo kya Ruhanga, Baibuli, noija kwetegyereza ngu tikihwaire aha murembe, kandi butoosha nikyesigwa. (Zaaburi 111:8) Okugyendera aha mitindo y’emicwe eri omu Baibuli nikyo kirikukirayo oburungi eki twine kukora. Kwonka, Ruhanga tarikutugyema kugigyenderaho. (Eky’Ebiragiro 30:19, 20; Yoshua 24:15) Buri omwe ahariitwe aine kwecweramu.
