DOREEN akagwerwa akagwe ku baacebeire iba Wesley, owaabaire aine emyaka 54 yonka bakashanga ngu aine ekookoro y’omu bwongo. * Abashaho bakamugira ngu naaza kumaraho ameezi makye reero afe. Naagira ati: “Nkaba ntarikubaasa kwikiriza ebi naabaire nimpurira. Nkamara saabiiti zimwe ntarikumanya ekirikugyenda omu maisho. Okaba nooshusha ngu eki kiriyo nikiba aha muntu ondiijo, tutari itwe. Nkaba ntetebeekaniise.”

Eky’obusaasi, abantu baingi nibakira kwehurira nka Doreen. Endwara etarikukira neebaasa kukwata omuntu weena obwire bwona. Nitusiima baingi, abarikuba beteekateekire kureeberera abakundwa baabo abaine endwara etarikukira. Kwonka, okureeberera abarwaire nkabo kigumire munonga. Ab’omu ka egyo nibabaasa kukora ki kuhwera ogwo orwaire endwara etarikukira? Abarikureeberera abarwaire nibabaasa kwemera bata enyehurira ezirikubaho omu bwire obwo bwona? Omurwaire yaaba ari haihi kufa, niki ekirikubaasa kubaho? Ka tubanze tureebe ahabw’enki okureeberera omurwaire oine endwara etarikukira kiine oburemeezi obwakyo.

Entunguuka omu by’obushaho ereetsireho empinduka omu muringo ogu abantu barikufamu. Ekyasha nka kimwe nari n’okurengamu enyima, nangwa n’omu mahanga agatunguukire, abarwaire bakaba nibarahuka kufa. Abantu bakaba nibafa ahonaaho barikwitwa endwara ezirikuturira nari butandu. Kikaba kitoorobi kuhika omu marwariro, kandi abantu bakaba nibareebererwa abanyabuzaare baabo omu ka kuhitsya baafa.

Obunaku obu, okutunguuka omu by’emibazi nikubaasisa abashaho kurwanisa endwara kireetera amagara kuhangaara. Endwara ezaabaire nizibaasa kwita abantu ahonaaho ira, hati abantu nibabaasa kuguma nazo kumara emyaka. Kwonka, omuntu kumaraho emyaka aine endwara tikirikumanyisa ngu naaza kukira. Abazaire abakuzire nibakira kuba baine obumuga bwabo oburikukira kubaremesa kwereeberera.  Okureeberera abari nk’abo nikyeyongyera kuguma munonga.

N’ekirugiremu, abantu nibeeyongyera kufeera omu marwariro okukira okufeera omu maka gaabo. Abantu baingi obunaku obu tibarikumanya ebirikukwata aha kufa, kandi bakye nibo baraareebire omuntu naafa. Okutiina eki batarikumanya nikibaasa kubaremesa kureeberera omunyabuzaare orwaire. Niki ekirikubaasa kuhwera?

Nk’oku kyabaire ahari Doreen, baingi nibagwerwa akagwe omukundwa waabo yaashangwa aine endwara erikwita. Oyihireho okwerarikirira, okutiina, n’okuganya, niki ekirikubaasa kukuhwera kwetebeekanisiza ebiraabeho omumaisho? Omuheereza wa Ruhanga omwesigwa akashaba ati: “Otwegyese kubara ebiro byaitu, tubone kugira omutima gw’obwengye.” (Zaaburi 90:12) Yeshengyereze Yehova omu kushaba abaase kukworeka oku oine ‘kubara gye ebiro byawe’ kugira ngu omukundwa waawe abe gye nk’oku kirikubaasika omu biro ebi arikuba atsigaizeyo.

Eki nikyetengyesa okutebeekanisa gye. Omukundwa waawe yaaba naakibaasa kugamba kandi arikwenda, noobaasa kumubuuza ou arikwenda ngu amucweremu yaaba atakibaasa kwecweramu. Ab’eka mwagaaniira mukareeba yaaba omurwaire naayenda kuteebwa aha byoma, kuteebwa aha kitanda omu irwariro akagumayo, nari yaaba naayenda kuheebwa obujanjabi nanka, nikibaasa kutuubya obuteetegyerezana n’okweshinja ahabw’okucweramu omurwaire otakigamba. Ab’omu ka baagaaniira kare batarikusherekana, nikibahwera kuta omutima aha kureeberera omuntu waabo orwaire. “Ahatari kuhanuura enaama zifa busha,” nikwo Baibuli erikugira.​—Enfumu 15:22.

Obwire obwingi, omurimo mukuru gw’ogwo orikureeberera orwaire n’okumuhuumuriza. Omuntu orikuza kufa naaba aine kuhamizibwa ngu naakundwa kandi ngu tatsigirweho. Eki nikibaasa kukorwa kita? Shomera omurwaire nari omweshongorere, obwo orikutoorana ebitabo nari ebyeshongoro ebirikwombeka kandi ebi arikukunda. Abantu baingi nibahuumurizibwa ab’omu maka gaabo baabakwata engaro bakagamba nabo omu muringo murungi.

Nikiba nikihwera kushoboororera omurwaire, abagyenyi abaija kumureeba. Okucondooza kumwe nikugira kuti: “Okuhurira nikigambwa ngu nigwo mutwarize ogu muntu arikuhererukayo kuguma aine. Omurwaire n’obu yaakuba naareebeka nk’ogwejegyeire naabaasa kuguma naahurira, mbwenu  otagira eki waagamba eki otarikubaasa kugamba yaaba naareeba.”

Kyaba nikibaasika shaba nawe. Baibuli neegira ngu eizooba rimwe, entumwa Paulo n’abagyenzi be bakaba baine okugyemeserezibwa kwingi batarikumanya n’ekiraahikye aha magara gaabo. Bakashaba buhwezi ki? Paulo akeeshengyereza banywani be ati: “Naimwe mushemereire kukwatanisa kutuhwera omu kushaba kwanyu.” (2 Abakorinso 1:8-11) Okushaba kuruga aha mutima omu bwire bw’obujune bw’amaani n’endwara y’amaani, ni kikuru munonga.

Okurwaza omukundwa otarikuza kukira nikireeta amaganya. Ekyo tikirikutangaaza, ahakuba okufa ti kya butoosha. Titurahangirwe kwikiriza rufu nk’ekintu kya butoosha. (Abarooma 5:12) Niyo nshonga ahabw’enki Ekigambo kya Ruhanga nikyeta rufu “omuzigu.” (1 Abakorinso 15:26) N’ahabw’ekyo omuntu okuhurira atarikwenda kuteekateeka aha kufa kw’omukundwa we nikyetegyerezibwa, kandi n’ekya butoosha.

Kwonka okuteekateeka aha kirikubaasa kubaho nikihwera ab’omu ka egyo kutuubya aha kutiina, reero bakata omutima aha kureeberera omurwaire nk’oku kirikubaasika. Ebimwe ebirikubaasa kukorwa nibyorekwa omu kabokisi “ Saabiiti Ezirikuhererukayo Omurwaire Akihuriire.” Amazima gari ngu, embeera ezi tizirikuba ahari buri murwaire, kandi tikirikwetengyesa kuzikuratanisa nk’oku ziri. Kwonka, abarwaire abaingi nibahikwaho empindahinduka ezi.

Bwanyima y’okufa kw’omukundwa, nikibaasa kuba eky’obwengye kumanyisa omunywani owaabaire yaaraganiise kuhwera. Orikuhwera n’abandi ab’omu ka egyo nibabaasa kuba nibenda kuhamizibwa ngu omukundwa waabo takigyezibwa kandi takibonabona. Omuhangi w’abantu oine rukundo naatuhamiza ngu “abafiire tibagira ki bamanya.”​—Omubuurizi 9:5.

Okwesiga Ruhanga ni kikuru omu bwire obu omuntu arikuba arwaire na bwanyima y’okufa. Ruhanga naabaasa kukuhwera kurabira omu bigambo birungi n’obuhwezi bw’abandi. Doreen naagira ati: “Nkeega kwikiriza obuhwezi bw’omuntu weena. Kandi obuhwezi obu twatungire bukaba nibutangaaza. Nyowe na ibanyi hatariho kubangaanisa tukamanya ngu Yehova akaba ariyo naagira ngu ‘ndi hanu naimwe kubahwera kuraba omu mbeera egi.’ Tindikubaasa kwebwa obuhwezi obwo.”

Buzima, Yehova Ruhanga niwe muhwezi orikukirayo. Obu ari omuhangi waitu, naayetegyereza gye obusaasi bwaitu n’enaku yaitu. Naaba ayeteekateekire kutuha obuhwezi oburikwetengyesa n’okuhuumurizibwa kugira ngu tubaase kwemera embeera. Kwonka ekirungi, araganiise ngu juba naija kwihiraho kimwe okufa kandi azoore n’abaafiire abu arikwijuka, obutagaruka kufa. (Yohaana 5:28, 29; Okushuuruurwa 21:3, 4) Obwo boona nibaija kwikirizana n’ebigambo by’entumwa Paulo ebi: “Iwe Rufu, okusingura kwawe kurahi? Iwe Rufu, oruburi rwawe rurahi?”​—1 Abakorinso 15:55.