• Kutooranwa Ruhanga. ‘Nyowe nyemekire omugabe wangye. Ninyija kukuha amahanga gabe obutaka bwawe, n’embaju zoona ez’ensi zibe eitungo ryawe.’​—Zaaburi 2:6, 8.

• Kuba omuhunguzi w’Omugabe Daudi. ‘Omwana atuzaariirwe, omwana w’omwojo atuhairwe. Okweyongyera kw’obutegyeki bwe n’obusingye tibirikwija kugira bugarukiro aha kitebe kya Daudi n’aha bukama bwe,’ kubaasa kubutaho n’okubuhamya.​—Isaaya 9:6, 7.

• Kuzaarirwa omuri Betelehemu. ‘Iwe Betelehemu, omuriiwe nimwo harikwija kuruga orimbeera omutegyeki, naija kuba mukuru okuhitsya aha muheru gw’ensi.’​—Miika 5:2, 4.

• Kwangwa abantu kandi bamwite. ‘Nikwo yaagayirwe atyo, naitwe tutamwetemu kaabuntu. Akahutaazibwa aha bw’eby’okushiisha byaitu, yaahondahondwa ahabw’okutahikiirira kwaitu.’​—Isaaya 53:3, 5.

• Kuzoorwa omu bafu kandi aheebwe ekitiinisa. ‘Torikwija kutsiga amagara gangye kuzimu, n’obu kwakuba okureka Orikwera waawe kujunda. Omu mukono gwawe gwa buryo harimu ebirikushemeza ebiro byona.’​—Zaaburi 16:10, 11.

Omu byafaayo by’abantu byona, omuntu omwe wenka niwe ahikire kuba Omutegyeki ahakuba naahikiiriza ebyo byona ebyagambwaho aha ruguru, kandi omuntu ogwo ni Yesu Kristo. Nangwa na maraika akaba agambiire Mariamu nyina Yesu ati: ‘Ruhanga naija kumuta aha kiteebe ky’Obugabe bwa ishenkuru Daudi, kandi Obukama bwe tiburikwija kuhwaho.’​—Luka 1:31-33.

Yesu tarabaire mutegyeki omu nsi. Omu mwanya gw’ekyo, naija kutegyeka abantu ari omu iguru nk’Omugabe w’Obukama bwa Ruhanga. Niki ekirikumureetera kuba Omutegyeki murungi? Yetegyereze ebi Yesu yaakozire obu yaabaire ari omu nsi.

•   Yesu akaba naafayo aha bantu. Akahwera abashaija n’abakazi, abato n’abakuru, atarikwihirira aha bukomooko bwabo nari aha bi baine. (Matayo 9:36; Mako 10:16) Omubembe ku yaagizire ngu “ku oraabe nookunda, noobaasa kunshemeza,” Yesu akamugirira esaasi yaamukiza.​—Mako 1:40-42.

• Yesu akatwegyesa oku twine kushemeza Ruhanga. Akagira ati: “Timurikubaasa kuheereza Ruhanga” n’eby’obugaiga. Kandi akagira ngu twine kutwariza abandi nk’oku turikwenda batutwarize, omusingye ogu nigwetwa ekiragiro ky’okutwarizana gye. Kandi akooreka ngu Ruhanga tarikufayo aha bi turikukora byonka, beitu ngu naafayo n’aha biteekateeko byaitu n’enyehurira zaitu. N’ahabw’ekyo twaba nitwenda kushemeza Ruhanga, twine kurinda enyehurira z’omu mitima yaitu. (Matayo 5:28; 6:24; 7:12) Yesu akooreka ngu kubaasa kutunga okushemererwa okwabuzima, twine kumanya ebi Ruhanga arikwenda ngu tukore reero tubikore.​—Luka 11:28.

• Yesu akatwegyesa oku twine kukunda abandi. Ebigambo bya Yesu n’ebikorwa bye bikaba biri eby’amaani, kandi bikahika abamuhurikiize aha mutima. ‘Abantu bakatangaarira okwegyesa kwe, ahabw’okuba akabeegyesa nk’oine obushoboorozi.’ (Matayo 7:28, 29) Akabeegyesa ati: “Mukunde abazigu baanyu.” Nangwa akashabira n’abantu abaamwitsire arikugira ati: “Taata, obasaasire, ahakuba tibarikumanya ki barikukora.”​—Matayo 5:44; Luka 23:34.

Yesu niwe Omutegyeki w’ensi ohikire orikufayo kandi oine embabazi. Kwonka shi naija kutandika kutegyeka ryari?